اسلام آباد سمیت 47 ضلعیاں وچ ووٹراں دی تعداد 10 لاکھ توں ودھ

لاہور وچ سب توں ودھ 74 لاکھ 14 ہزار 704 ووٹر، بلوچستان دا کوئی شہر شامل نہیں، پنجاب دے 31، سندھ دے 9 تے خیبر پختونخوا دے 6 ضلعے شامل نیں: الیکشن کمیشن

اسلام آباد (اے پی پی) وفاقی دارالحکومت اسلام آباد سمیت ملک دے 47 ضلعیاں وچ رجسٹرڈ ووٹراں دی تعداد 10 لاکھ توں ودھ اے۔ ملک بھر وچ سب توں ودھ لاہور وچ 74 لاکھ 14 ہزار 704 ووٹر رجسٹرڈ نیں، جدوں کہ صوبہ بلوچستان وچ کوئی وی شہر 10 لاکھ ووٹراں دی حد تک نہیں پہنچ سکیا۔

الیکشن کمیشن توں دستیاب تفصیلات دے مطابق اسلام آباد وچ رجسٹرڈ ووٹراں دی کل تعداد 12 لاکھ 52 ہزار 287 اے۔ خیبر پختونخوا دے 6 ضلعیاں وچ رجسٹرڈ ووٹراں دی تعداد 10 لاکھ توں تجاوز کر گئی اے۔ انہاں وچ ضلع پشاور دے رجسٹرڈ ووٹراں دی تعداد سب توں ودھ 22 لاکھ 51 ہزار 292 اے۔

خیبر پختونخوا دے ہور ضلعیاں وچ مردان، سوات، صوابی، مانسہرہ تے چارسدہ شامل نیں۔

پنجاب دے 31 ضلعیاں وچ رجسٹرڈ ووٹراں دی تعداد 10 لاکھ توں ودھ اے۔ انہاں وچ لاہور، فیصل آباد، راولپنڈی، رحیم یار خان، ملتان، گوجرانوالہ، سیالکوٹ، سرگودھا، بہاولپور، قصور، شیخوپورہ، گجرات، اوکاڑہ، وہاڑی، بہاولنگر، خانیوال، مظفرگڑھ، ساہیوال، نارووال، جھنگ، ٹوبہ ٹیک سنگھ، اٹک، پاکپتن، راجن پور، لیہ، منڈی بہاؤالدین، لودھراں، میانوالی، بھکر تے جہلم شامل نیں۔

صوبہ سندھ دے 9 ضلعیاں وچ ووٹراں دی تعداد 10 لاکھ توں ودھ اے۔ انہاں وچ کراچی سنٹرل، کراچی ایسٹ، کورنگی کراچی، خیرپور، کراچی ساؤتھ، سانگھڑ، حیدرآباد، کراچی ویسٹ تے نوشہرو فیروز شامل نیں۔