فیلڈ مارشل دا دورۂ ایران ڈاڈھا فائدہ مند ریا : مثبت اثرات جلدے ہی سامنے آؤن گے: ایرانی حکام
ایران تے عمان دا ہرمز وچ عارضی لنگھاہ (راہداری) بنان تے بارودی سرنگاں ہٹان تے اتفاق ہو گیا اے، جدوں کہ امریکا نے آبنائے ہرمز کھولن دے بدل ناکہ بندی تے پابندیاں ختم کرن دی پیشکش کیتی اے۔ ٹرمپ دا کہنا اے کہ تہران فوج دے وڈے حصے نوں تنخواہاں نہیں دے رہا، جبکہ چین نے آکھیا اے کہ ایران نال تعاون وچ رکاوٹ نہیں پاؤنی چاہیدی۔ دوجے پاسے عمان دے نیڑے ٹینکر تے حملے دے باوجود تیل ہور سستا ہو گیا اے۔
اسلام آباد، تہران تے واشنگٹن توں خبراں مطابق ایرانی حکومت نے چیف آف ڈیفنس فورسز فیلڈ مارشل عاصم منیر دے حالیہ دورہ تہران نوں انتہائی نتیجہ خیز تے فائدہ مند قرار دتا اے۔ ایرانی صدارتی دفتر ولوں جاری بیان وچ آکھیا گیا کہ فیلڈ مارشل دے دورے نال اہم سفارتی کامیابیاں ملیاں نے۔ ترجمان سید مہدی طباطبائی تے وزیر داخلہ سکندر مومنی نے آکھیا کہ ایہناں ملاقاتاں دے مثبت اثرات جلد سامنے آؤن گے تے دوہاں دیساں وچالے تعلقات ہور مضبوط ہوݨ گے۔
وفاقی وزیرِ داخلہ محسن نقوی نے وی دسا کہ ایران دے صدر مسعود پزشکیان نال ملاقات ڈاڈھی تعمیری رہی، جیہدے وچ ایران-امریکا تنازع، مشرقِ وسطیٰ دی صورتحال تے ‘اسلام آباد مفاہمتی یادداشت’ (ایم او یو) دی بحالی تے گل بات ہوئی۔ ایرانی پارلیمان دی خارجہ تعلقات کمیٹی دے سربراہ عباس گلرو تے دیگر عہدیداراں نے دسا کہ فیلڈ مارشل نے امریکی پیغام پہنچایا جیہدا مقصد رکے ہوئے سیاسی عمل نوں بحال کرنا سی، جدوں کہ ایران نے امریکی پابندیاں ختم کرن تے ‘اسلام آباد میمورنڈم’ دیاں شقاں تے عمل درآمد نوں مذاکرات لئی لازمی قرار دتا۔
دوجے پاسے، عمان دے وزیر خارجہ بدر البوسعیدی تے ایرانی ہم منصب عباس عراقچی نے آبنائے ہرمز وچ عارضی بحری راہداری قائم کرن تے بارودی سرنگاں صاف کرن دے مشترکہ پلان تے اتفاق کیتا اے۔ امریکی صدر ڈونلڈ ٹرمپ نے دعویٰ کیتا کہ ایرانی حکومت اپنی فوج نوں تنخواہاں نہیں دے پا رہی تے اوتھے انسانی بحران پیدا ہو رہا اے، نال ای اوہناں دسا کہ امریکی بحریہ نے آبنائے ہرمز توں سرنگاں ہٹا دتیاں نے۔
امریکا ولوں ایران تے نویاں پابندیاں توں بعد تہران وچ پٹرول پمپان تے لمیاں قطاراں لگ گئیاں نے۔ ایہناں کشیدگیاں تے سفارتی کوشلاں دے وچالے عالمی منڈی وچ برینٹ خام تیل دی قیمت 2.8 فیصد گھٹ کے 88 دالر فی بیرل ہو گئی اے۔
