10 ارب ڈالر دی سویپ لائن دے معاملے اُتے تعمیری پیش رفت: وزیرِ خزانہ
اسلام آباد (اے پی پی) وفاقی وزیرِ خزانہ تے محصولات سینیٹر محمد اورنگزیب نے آکھیا اے کہ 10 ارب ڈالر دی سویپ لائن دے معاملے اُتے پاکستان نوں امریکا ولوں تعمیری پیش رفت ملی اے۔
انہاں امید ظاہر کیتی کہ اگلے کجھ مہینیاں وچ جواب مل جائے گا۔ انہاں آکھیا کہ درآمدات اُتے انحصار دی بجائے برآمدات اُتے مبنی ترقی تے نمو اُتے ڈونگھی نظر اے۔ پاکستان رواں مالی سال وچ یورو بانڈز توں 1 توں 2 ارب ڈالر حاصل کرن دا ہدف رکھدا اے، جدوں کہ 75 کروڑ ڈالر دے پانڈا بانڈز جاری کرن لئی چوتھے ٹینڈر دی منصوبہ بندی دے مرحلے وچ نیں۔
فنانشل ٹائمز نوں دتے گئے انٹرویو وچ وزیرِ خزانہ نے آکھیا کہ عالمی کیپٹل مارکیٹاں وچ واپسی دی منصوبہ بندی دے تناظر وچ پاکستان نے امریکا نال مالی تعاون اُتے توجہ مرکوز کیتی اے۔
گزشتہ ماہ امریکا توں منگئی گئی 10 ارب ڈالر دی سویپ لائن دا مقصد نجی سرمایہ کاراں نوں اعتماد دینا سی۔ امریکی ایکسپورٹ امپورٹ بینک (ایگزم بینک) تے ڈویلپمنٹ فنانس کارپوریشن دا اہم کردار اے، جنہاں پاکستان وچ سرمایہ کاری دے ممکنہ مالی خطرے برداشت کرن اُتے آمادگی ظاہر کیتی اے۔
حکومت درآمدات اُتے انحصار گھٹاؤن تے ملک نوں ادائیگیاں دے توازن دے مسلسل بحراناں توں کڈھن لئی برآمدات نوں فروغ دینا چاہندی اے۔
وفاقی وزیرِ خزانہ سینیٹر محمد اورنگزیب نال پاکستان وچ جرمن سفیر انا لیپل نے ملاقات کیتی۔ جرمن سفیر نے موڈیز ولوں پاکستان دی خودمختار کریڈٹ ریٹنگ وچ حالیہ بہتری اُتے مبارکباد دِتی تے پاکستان دی معاشی صورتحال وچ ہور رہیاں پیش رفتاں نوں سراہیا۔
