علی زیدی جی آئی ٹی نوں متنازعہ بنا کے ملزماں نوں فیدہ اپڑا رہے نیں: وزیراعلیٰ سندھ

اسلام آباد: وزیراعلیٰ سندھ مراد علی شاہ آکھیا اے عزیر بلوچ جی آئی ٹی نوں متنازعہ بنا کے علی زیدی ملزمان نوں فیدہ اپڑانا چاہندے نیں۔ مراد علی شاہ جعلی اکاؤنٹس بارے سندھ روشن پروگرام کرپشن کیس وچ نیب وچ پیش ہوئے جتھے اوہناں توں اک گھنٹے توں ودھ ویلے تک پوچھ گچھ کیتی گئی۔پیشی دے بعد میڈیا نال گل کردیاں وزیراعلیٰ سندھ نے عزیر بلوچ دی جی آئی ٹی بارے سوال دے جواب وچ آکھیا کوئی موٹرسائیکل سوار علی زیدی دے گھر دے بوہے تے غیر دستخط شدہ کاغذات دے کے چلا جاندا اے تے اوہ ایہنوں آسمانی صحیفہ من کے گلاں کرنا شروع ہو جاندے نیں۔مراد علی شاہ آکھیا عزیر بلوچ دی 7رکنی جے آئی ٹی بنی سی تے جہدے وچ پلس، سی ٹی ڈی، آئی بی، آئی ایس آئی، ایم آئی تے رینجرز دے نمائندے شامل سن، ایہناں سب نے اپنے دستخط دے نال جے آئی ٹی رپورٹ محکمہ داخلہ نوں جمع کروائی سی۔ مراد علی شاہ دا کہنا سی علی زیدی نے غیر ذمہ دارانہ حرکت دا مظاہرہ کردیاں غیر دستخط شدہ کاپی ساہمنے لے آئے تے آکھیا عزیر بلوچ نے 198قتل دا اعتراف کیتا اے۔ اوہناں نے عزیر دے نال ملوث دوجے ملزمان نوں وی ہوشیار کر دتا، جنی غیر ذمہ داری علی زیدی نے وکھائی ایہدے توں لگدا اے اوہ ملزمان نوں فیدہ اپڑانا چاہندے نیں۔