عمران دے علاج دے حکم اُتے من و عن عمل کیتا جائے: سہیل آفریدی
وفاقی حکومت نے فراڈ کیتا، بانی پی ٹی آئی نوں رات دے ہنیرے وچ ہسپتال پہنچایا گیا: سہیل آفریدی
عدالتی احکاما ں نوں ردی دی ٹوکری وچ سٹنا عدلیہ تے ججاں دی توہین دے مترادف اے
پشاور (مانیٹرنگ ڈیسک) وزیراعلیٰ خیبرپختونخوا سہیل آفریدی نے بانی پی ٹی آئی عمران خان دی صحت دے حوالے نال شدید تشویش دا اظہار کردیاں وفاقی حکومت توں مطالبہ کیتا اے کہ عدالتاں ولوں عمران خان دے علاج تے طبی سہولتاں نال متعلق جاری احکاما ں اُتے من و عن عملدرآمد یقینی بنایا جائے۔
۵۷ویں صوبائی کابینہ اجلاس نوں خطاب کردیاں وزیراعلیٰ نے آکھیا کہ سپریم کورٹ نے عمران خان نوں اُنہاں دی بہن تے ذاتی ڈاکٹرز دی موجودگی وچ شفا انٹرنیشنل ہسپتال منتقل کرن دا حکم دِتا سی، تاہم وفاقی حکومت نے مبینہ طور اُتے عدالتی حکم اُتے عمل کرن دی بجائے فراڈ کیتا تے عمران خان نوں رات دے ہنیرے وچ پمز لے جایا گیا۔
اُنہاں آکھیا کہ وفاقی حکومت دی نگرانی وچ بانی پی ٹی آئی دی صحت خراب ہوئی اے۔ جدوں اُنہاں نوں گرفتار کیتا جا رہیا سی، اوہ مکمل طور اُتے صحت مند سن۔
سہیل آفریدی نے دعویٰ کیتا کہ عمران خان نوں پچھلے ۸، ۹ مہینیاں توں مسلسل قیدِ تنہائی وچ رکھیا گیا اے تے پاکستان دی تاریخ وچ ایس نوعیت دا رویہ پہلے کدے نہیں ویکھیا گیا۔ اُنہاں دے صحت دے مسئلے وی ایس صورتحال دا نتیجہ نیں۔
وزیراعلیٰ نے عدالتاں توں مطالبہ کیتا کہ بانی پی ٹی آئی دے حوالے نال جاری احکاما ں اُتے مکمل عملدرآمد کروایا جائے۔ اُنہاں آکھیا کہ عدالتی احکاما ں نوں ردی دی ٹوکری وچ سٹنا عدلیہ تے ججاں دی توہین دے مترادف اے۔
