برآمدات اُتے مبنی صنعتی ترقی ترجیحاں وچ شامل، بلال کیانی
کراچی (بزنس رپورٹر): وزیر مملکت برائے خزانہ تے ریلوے بلال اظہر کیانی نے آکھیا اے کہ حکومت برآمدی صنعت نوں درپیش مسائل دے حل، ٹیکس نظام نوں آسان بناؤن تے کاروباری ماحول نوں ہور سازگار بناؤن لئی ہر ممکن اقدامات کر رہی اے۔ برآمدات اُتے مبنی صنعتی ترقی حکومت دیاں ترجیحاں وچ شامل اے۔
ایہ گل اوہناں آل پاکستان ایکسپورٹرز ایسوسی ایشنز دے نمائندگان تے اہم کاروباری رہنماؤں نال اعلیٰ سطح دے مشاورتی اجلاس وچ گفتگو کردیاں آکھی۔ اجلاس وچ بلال اظہر کیانی نے صنعتکاراں دے تحفظات غور نال سنے تے مسائل دے حل لئی ممکنہ اقدامات اُتے تفصیلی تبادلہ خیال کیتا۔
وزیر مملکت نے دَسیا کہ حکومت نے بجٹ توں بعد ایکسپورٹ فسیلیٹیشن کمیٹیاں نوں نوٹیفائی کیتا اے، جنہاں دا بنیادی مقصد برآمد کنندگان نوں درپیش مسائل دے حل لئی مؤثر پلیٹ فارم فراہم کرنا اے۔
اوہناں آکھیا کہ حکومت ایہ وی یقینی بنانا چاہندی اے کہ برآمد کنندگان نوں ٹیکس حکام ولوں غیر ضروری ہراسانی یا مشکلات دا سامنا نہ کرنا پئے۔ ایکسپورٹ فسیلیٹیشن کمیٹیاں دے ذریعے شکایتاں تے تنازعات دے ازالے لئی مؤثر طریقہ کار وضع کیتا جاوے گا۔
بلال اظہر کیانی نے برآمد کنندگان نوں یقین دلایا کہ حکومت صنعت تے کاروباری برادری نال مسلسل رابطے وچ رہے گی تے پالیسی سازی دے عمل وچ نجی شعبے دیاں تجاویز نوں اہمیت دِتی جاوے گی۔
