لارک جزیرے اُتے دھماکے، متعدد ہلاکتاں، میزائل لانچراں نوں نشانہ بنایا: امریکا، جواب دی کارروائی کراں گے: ایران

اک ماہ بعد پہلی کارروائی کیتی، امریکی فورسز علاقے دی کڑی نگرانی کر رہیاں نیں، اہم آبی گزرگاہ توں تجارتی سرگرمیاں دی آزادانہ آمدورفت یقینی بناؤن لئی ہر وقت تیار: امریکا۔ اسرائیل ولوں فیر حملے دی دھمکی، مضبوطی نال کھڑے آں: ایرانی صدر، خلیجی ممالک حقیقی دشمن نال لڑن، مسلم ممالک امریکا تے اسرائیل دے خلاف متحد ہو جان: ایرانی سپریم لیڈر

تہران، واشنگٹن (نیوز ایجنسیاں) امریکی عہدیدار نے آکھیا اے کہ فوج نے اتوار نوں ایران دے جزیرے لارک نوں نشانہ بنایا، جتھے ایرانی فورسز نوں آبنائے ہرمز وچ بارودی سرنگاں نصب کرن والے میزائل داغن دی تیاری کردے ویکھیا گیا سی۔ ایہہ اک ماہ توں ودھ عرصے بعد امریکا ولوں ایران اُتے کیتا گیا پہلا حملہ اے۔

امریکی عہدیدار نے دَسیا کہ فورسز نے جزیرے اُتے موجود ایران دے دو میزائل لانچراں نوں نشانہ بنایا۔ ایران دی نیم سرکاری خبر رساں ایجنسی فارس دے مطابق مقامی رہائشیوں نے اتوار نوں جزیرہ لارک دے نیڑے دھماکے دی آواز سنی۔

جزیرہ لارک آبنائے ہرمز دے نیڑے واقع اے، جو عالمی تجارت لئی اک انتہائی اہم بحری گزرگاہ اے تے خطے وچ جاری کشیدگی تے سفارتی کوششاں دا مرکز رہی اے۔

ٹرمپ انتظامیہ دے مطابق امریکی سنٹرل کمانڈ نے گزشتہ ہفتے آبنائے ہرمز دے بین الاقوامی بحری راستیاں توں سمندری بارودی سرنگاں صاف کرن دا کم مکمل کیتا سی۔ امریکی عہدیدار نے آکھیا کہ امریکی فورسز علاقے دی کڑی نگرانی کر رہیاں نیں تے ایس اہم آبی گزرگاہ دے ذریعے تجارتی سرگرمیاں دی آزادانہ آمدورفت یقینی بناؤن لئی ہر وقت تیار نیں۔

ایران دے اسلامی انقلابی گارڈ کور (آئی آر جی سی) نے آکھیا اے کہ اوہ جوابی کارروائی کرن گے۔

آئی آر جی سی نے جزیرہ لارک اُتے حملے دا الزام امریکا تے اسرائیل اُتے لاؤندیاں آکھیا کہ حملے وچ ایرانی فورسز تے شہریاں نوں جانی نقصان پہنچیا اے۔ ایرانی سرکاری نشریاتی ادارے آئی آر آئی بی اُتے نشر کیتے گئے بیان وچ آئی آر جی سی نے آکھیا کہ حملے دے نتیجے وچ ساڈے متعدد اہلکار تے ہم وطن شہید تے زخمی ہوئے نیں۔

برطانوی میری ٹائم ایجنسی یوکے ایم ٹی او نے آکھیا اے کہ ہفتے نوں آبنائے ہرمز توں لنگھن والے اک ٹینکر نوں کسے نامعلوم پروجیکٹائل نے نشانہ بنایا اے۔ یو کے ایم ٹی او نے اک ایڈوائزری نوٹ وچ دَسیا کہ ایہہ واقعہ عمان دے علاقے خصب توں 12 ناٹیکل میل شمال ول پیش آیا۔ ایجنسی نے ہور واضح کیتا کہ ایس حملے دے نتیجے وچ ہن تک کسے قسم دے جانی یا ماحولیاتی نقصان دی کوئی اطلاع موصول نہیں ہوئی۔

دوجے پاسے ایران دے سپریم لیڈر مجتبیٰ خامنہ ای نے مشرق وسطیٰ جنگ شروع ہوئے چھ ماہ مکمل ہون اُتے خطے دے مسلم ممالک نوں امریکا تے اسرائیل دے خلاف متحد ہون اُتے زور دِتا اے۔ ایرانی سپریم لیڈر نے اپنے تحریری پیغام وچ آکھیا کہ اسلامی ممالک دے مسئلے دا حل باہمی اتحاد، دوستی تے نیک مقصد لئی تعاون وچ اے۔

مجتبیٰ خامنہ ای نے خلیجی ممالک دے حکمراناں نوں زور دِتا کہ اوہ حقیقی دشمن نال لڑن، اپنے حقیقی دشمن دی شناخت کرن، اوہ دے منصوبیاں نوں سمجھّن تے مقابلہ کرن۔ انہاں آکھیا کہ امریکی تے اسرائیلی مجرم حکمران صرف ایران دے نہیں بلکہ پوری مسلم امہ دے دشمن نیں۔

مجتبیٰ خامنہ ای 28 فروری نوں جنگ دے آغاز اُتے اپنے والد علی خامنہ ای دی شہادت توں بعد سپریم لیڈر بنے سن، تاہم تقرری توں بعد توں اوہ عوامی سطح اُتے نظر نہیں آئے تے حکام نے انہاں دی کوئی ویڈیو یا آڈیو وی جاری نہیں کیتی۔

اسرائیل نے ایران اُتے اک واری فیر حملے دی دھمکی دِتی اے۔ اسرائیلی وزیر توانائی ایلی کوہن نے اسرائیلی میڈیا نوں انٹرویو دیندیاں آکھیا کہ جے ایران نے جوہری یا بیلسٹک میزائل بنائے تاں ایران اُتے دوبارہ حملہ کراں گے۔

انہاں آکھیا کہ ایران امریکا نال معاہدہ کر وی لے، فیر وی جے اوہ جوہری ہتھیار بناؤن دی کوشش کرے گا تاں ایران اُتے حملہ کیتا جاوے گا۔ ایران جے اپنا جوہری پروگرام دوبارہ شروع کرن دی غلطی دُہرائے گا تاں اوہنوں نشانہ بنایا جاوے گا۔

ایلی کوہن نے آکھیا کہ جے اسرائیل نے حملہ نہ کیتا ہوندا تاں ایران جوہری ہتھیار حاصل کر چکیا ہوندا۔ امریکا تے اسرائیل دے حملیاں نے ایرانی جوہری پروگرام نوں دو توں چار سال پچھے دھکیل دِتا اے۔ انہاں آکھیا کہ اسرائیل اپنی فوجی صلاحیت پہلے ہی ثابت کر چکیا اے۔

ایرانی صدر مسعود پزشکیان نے تہران وچ بنیادی ڈھانچے دے کئی منصوبیاں دے افتتاح دے موقع اُتے خطاب کردیاں آکھیا کہ کسے وی طاقت لئی ایس قوم نوں ہتھیار سٹّن اُتے مجبور کرنا ممکن نہیں، جیہڑی مزاحمت دے پکے عزم نال کھڑی ہووے۔

ایرانی صدر دا کہنا سی کہ ایران نے جنگ شروع نہیں کیتی تے نہ ای اسیں جنگ دے خواہش مند آں، پر کسے وی جارح دے خلاف پوری طاقت نال مضبوطی نال کھڑے رہواں گے تے ایران دھمکیاں دے سامنے سر نہیں جھکاوے گا۔

مسعود پزشکیان نے آکھیا کہ جے دنیا وچ امن تے استحکام قائم کرنا اے تاں ایہہ امن ساڈے خطے دے اندر توں ای جنم لے گا۔

ایرانی وزیر خارجہ عباس عراقچی نے تقریب نوں خطاب کردیاں آکھیا کہ امریکا میڈیا دے ذریعے توانائی مارکیٹ وچ ہیرا پھیری کرکے جنگ نوں طول دین دی کوشش کر رہیا اے۔ اسرائیل نال جڑے عناصر امید افزا جائزے پیش کر رہے نیں، تاہم صورتحال دا اصل بوجھ امریکی صارفین اُتے پے رہیا اے۔

ایران دے نائب وزیر خارجہ کاظم غریب آبادی نے آکھیا اے کہ ایران نے آبنائے ہرمز توں بحری جہازاں دی آمدورفت دے انتظامات دے حوالے نال عمان نال اتفاقِ رائے کر لیا اے، تاہم جدوں تک امریکا اپنی ذمہ داریاں پوری نہیں کردا، آبنائے ہرمز دوبارہ نہیں کھولی جاوے گی۔

ایرانی میڈیا دے مطابق کاظم غریب آبادی دا کہنا سی کہ ایران نوں آبنائے ہرمز دوبارہ کھولن دی کوئی جلدی نہیں تے اوہ اپنے دفاعی اقدامات تے خطراں دا مقابلہ کرن دیاں کوششاں جاری رکھے گا۔ جے امریکا سفارت کاری دی راہ اُتے واپس آؤن وچ دلچسپی رکھدا اے تاں اوہنوں اپنے ماضی دے اقدامات دی ذمہ داری قبول کرنی ہووے گی۔

کاظم غریب آبادی نے واضح کیتا کہ آبنائے ہرمز بدستور بند اے۔ جے کوئی بحری جہاز ایس راستے توں لنگھے گا تاں اوہ ایران نال رابطے تے اجازت توں بعد ای لنگھ سکے گا۔

ایران دے وزیر دفاع بریگیڈیئر جنرل سید مجید ابن الرضا نے آکھیا اے کہ ایران اپنی دفاعی صلاحیتاں نوں ہور مضبوط بناؤن دا عمل جاری رکھے گا تے ایس وچ کوئی تعطل نہیں آوے گا۔ مسلح افواج اک مضبوط ایران دی تشکیل لئی اپنی ساری صلاحیتاں بروئے کار لیاؤن گیاں۔

ایرانی فوج دے کمانڈر انچیف میجر جنرل امیر حاتمی نے آکھیا اے کہ غیر ملکی دشمن ایران خلاف اپنا کوئی وی سٹریٹجک مقصد حاصل نہیں کر سکے۔ شہدا دی یاد وچ اک تقریب نوں خطاب کردیاں امیر حاتمی نے آکھیا کہ اسیں دشمنان دے خلاف بھرپور طاقت نال کھڑے آں۔ جنگ وچ کامیابی دا معیار ایہہ اے کہ دشمن نوں اپنے مقاصد حاصل کرن توں روکیا جاوے۔

انہاں آکھیا کہ ایران دے دفاعی ڈھانچے نوں تباہ کرن دیاں کوششاں دے باوجود ایرانی مسلح افواج نے جنگ دے آخری لمحات تک پوری طاقت نال میزائل تے ڈرون استعمال کیتے۔

امیر حاتمی نے ایرانی دفاعی قوت نوں کمزور کیتے جان بارے بیرونی دعویاں نوں بے بنیاد قرار دیندیاں آکھیا کہ دشمن خود جاندا اے کہ ایرانی مسلح افواج ہن وی طاقت، عزم، جدت تے بہادری نال ڈٹیاں ہوئیاں نیں۔

ایران دی بحری فوج دے کمانڈر ریئر ایڈمرل شہرام ایرانی دا کہنا اے کہ دشمن نے ایرانی عوام تے مسلح افواج دے عزم و ارادے دا انتہائی غلط اندازہ لایا۔ ایرانی بحریہ اپنے شہیداں دے خون توں ہور طاقت حاصل کرے گی تے ہور عزم، حوصلے تے پکے ارادے نال اگے ودھدی رہے گی۔

عراقی وزیراعظم دے سکیورٹی مشیر قاسم الاعرجی نے آکھیا اے کہ عراق ایران تے امریکا دے درمیان رابطے دا ذریعہ بنن تے دوناں ملکاں وچ کسے ایسے معاہدے دی راہ ہموار کرن دی کوشش کر رہیا اے، جیہڑا پورے خطے دے حقاں تے مفاداں نوں یقینی بنائے۔

قاسم الاعرجی نے آکھیا کہ عراق دے ایران تے امریکا دوناں نال چنگے تعلقات نیں تے اوہ انہاں تعلقات نوں استعمال کردیاں دوناں ملکاں وچ پل دا کردار ادا کرنا چاہندا اے۔

امریکی فوج دے اعلیٰ حکام نے سیکرٹری دفاع پیٹ ہیگسیتھ نوں خبردار کیتا اے کہ ایران خلاف وڈے پیمانے اُتے جاری فوجی آپریشنز نوں ہور طول دینا خطرناک ہو سکدا اے۔

امریکی اخبار واشنگٹن پوسٹ دے مطابق ایس اقدام نال امریکی سرزمین سمیت دنیا دے ہور خطیاں وچ موجود خطراں نال نمٹن دی امریکی عسکری صلاحیت کمزور ہون دا شدید خطرہ اے۔

امریکی اخبار دے مطابق سیکرٹری دفاع لئی تیار کیتی گئی اک حالیہ خفیہ رپورٹ توں واقف ذرائع دا کہنا اے کہ ایہہ انتباہ آرمی، نیوی تے ایئر فورس دے سربراہاں دے نال یورپ، ایشیا تے لاطینی امریکا وچ امریکی آپریشنز دی نگرانی کرن والے فور سٹار کمانڈراں ولوں دِتا گیا اے۔ ایہہ انتباہ 14 اگست نوں جاری ہون والی خفیہ سیکرٹری آف ڈیفنس آرڈرز بک دے ایڈیشن وچ وی ظاہر کیتا گیا اے۔