دھرنے جاری، حکومت نال مذاکرات دے دروازے بند نہیں کیتے: حافظ نعیم
3 ستمبر نوں بھرپور ملک گیر ہڑتال ہووے گی، نظام گل سڑ گیا، حکمران عیاشیاں ختم کرن: لاہور وچ پریس کانفرنس، حکومت پٹرولیم لیوی ختم کرے، ورنہ عوام نوں اسلام آباد آؤن توں کوئی نہیں روک سکے گا: لیاقت باغ وچ خطاب
لاہور، راولپنڈی (سٹاف رپورٹر، خبر نگار) امیر جماعت اسلامی پاکستان حافظ نعیم الرحمن نے آکھیا اے کہ حکومت روزانہ دی بنیاد اُتے عوام اُتے مظالم ڈھا رہی اے، حکمران اپنی عیاشیاں ختم کرن دی بجائے عوام اُتے ٹیکسں دا بوجھ پا رہے نیں۔ جماعت اسلامی دے عوامی حقاں لئی لاہور، کراچی، پشاور سمیت مختلف شہراں وچ دھرنے جاری نیں۔ مطالبات دی منظوری تک دھرنا ختم نہیں کراں گے۔ حکومت نوں مذاکرات لئی طریقہ کار دَس دِتا گیا اے، گل بات دے دروازے کدے بند نہیں کیتے، حکومت نوں سمجھ آ گئی اے کہ جماعت اسلامی ایں ایں نہیں جان والی۔
ایہہ گل انہاں نے چیئرنگ کراس چوک وچ جماعت اسلامی دے دھرنے دے پندرہویں روز پریس کانفرنس نوں خطاب کردیاں کہی۔ امیر جماعت اسلامی لاہور ضیاء الدین انصاری تے ہور رہنما وی ایس موقع اُتے موجود سن۔
امیر جماعت اسلامی پاکستان نے آکھیا کہ خیبر پختونخوا وچ دہشت گردی تے بلوچستان وچ بدامنی اُتے تشویش اے۔ پاکستان وچ اج وی انگریزاں دا بنایا ہویا نظام قائم اے تے انتخابی نظام وچ وی وڈیاں خرابیاں نیں۔ موجودہ انتخابی نظام وچ زیادہ تر جاگیردار ای اگے آندے نیں، جس کرکے نوجوان مایوس نیں تے ملک چھڈن دی خواہش رکھدے نیں۔ ایہہ ملک لئی بہت وڈا المیہ اے۔
حافظ نعیم الرحمن نے آکھیا کہ جماعت اسلامی نے بچیاں نال زیادتی کرن والے مجرماں نوں سخت ترین سزا دین دی تجویز دِتی سی، تاں جو آئندہ کسے بچی نال زیادتی دا واقعہ پیش نہ آوے۔ مجرماں خلاف مؤثر کارروائی تے پولیس اصلاحات ناگزیر نیں۔ پختونخوا دے وزیراعلیٰ سہیل آفریدی دسن کہ پولیس اصلاحات ہن تک کیوں نہیں ہوئیاں۔ حکومت نوں مجرماں اُتے ہاتھ پاؤنا ہووے گا تاں جو مستقبل وچ ایسے واقعات دی روک تھام ہو سکے۔
امیر جماعت اسلامی پاکستان نے آکھیا کہ ملک وچ اک مخصوص طبقے نوں مراعات حاصل نیں، عام آدمی لئی کاروبار کرنا وی مشکل بنا دِتا گیا اے۔ طلبہ، مزدور تے چھوٹے کسان ٹیکسں تے مہنگائی دا بوجھ چک رہے نیں۔ عام آدمی نوں ملک وچ بہتر سفری سہولتاں تک دستیاب نہیں، افسر تے وزیر وڈیاں تے مہنگیاں گاڑیاں وچ گھمدے نیں۔ حکمران عوام توں بھتہ وصول کرن دی بجائے اپنی عیاشیاں ختم کرن۔ افسرشاہی نوں مفت پٹرول دی سہولت، گیس دیاں مراعات تے بجلی اُتے دِتی جان والی سبسڈی ختم کیتی جاوے۔
حافظ نعیم الرحمن نے آکھیا کہ حکمراناں نے میٹرو بس تے اورنج ٹرین بنا کے سمجھیا کہ انہاں نے وڈا کارنامہ انجام دے دِتا، جدوں کہ دنیا دے کئی ملکاں وچ زیرِزمین ٹریناں دا جدید نظام موجود اے۔ لاہور وچ وی سب وے دا نظام ہونا چاہیدا سی۔ جے پابندیاں دے باوجود ایران زیرِزمین ٹرین دا منصوبہ بنا سکدا اے تاں پاکستان ایہہ کیوں نہیں کر سکدا۔
دریں اثنا لیاقت باغ راولپنڈی وچ جلسہ عام نوں خطاب کردیاں حافظ نعیم الرحمن نے حکومت نوں خبردار کیتا کہ عوام دا غصہ بھانپدیاں بہتر ہووے گا کہ پٹرولیم لیوی ختم کر دِتی جاوے، ورنہ چاروں پاسیاں توں اسلام آباد آؤن والے لوکاں دا راستہ کوئی نہیں روک سکے گا۔
انہاں آکھیا کہ 3 ستمبر نوں ملک گیر بھرپور ہڑتال ہووے گی تے احتجاجی تحریک دا دائرہ ہور وسیع کیتا جاوے گا۔ عوامی حقاں لئی لاہور، کراچی، پشاور سمیت مختلف شہراں وچ دھرنے جاری نیں تے مطالبات دی منظوری تک دھرنے ختم نہیں کیتے جان گے۔
انتظامیہ نے لیاقت باغ نوں تالے لا کے جلسے دی اجازت دین توں انکار کر دِتا، تاہم کارکن تالے توڑ کے اندر جان لئی تیار سن، پر قیادت نے انہاں نوں روک دِتا۔ انہاں آکھیا کہ حکومت نے اجازت نہ دِتی تاں راولپنڈی تے اسلام آباد وچ احتجاج ہووے گا تے ساریاں سڑکاں بند کر دِتیاں جان گیاں۔
انہاں تاجراں نوں 3 ستمبر دی شٹر ڈاؤن ہڑتال کامیاب بناؤن دی اپیل کردیاں آکھیا کہ آزاد کشمیر وچ وی بھرپور ہڑتال ہووے گی۔
حافظ نعیم الرحمن نے آکھیا کہ حکمران عوام اُتے ٹیکسں دا بوجھ پاؤن دی بجائے اپنی عیاشیاں ختم کرن، جدوں کہ افسرشاہی نوں مفت پٹرول، گیس دیاں مراعات تے بجلی اُتے سبسڈی دِتی جا رہی اے۔ موجودہ نظام گل سڑ چکیا اے تے کسے وی شعبے وچ عوام نوں ریلیف نہیں مل رہیا۔
شہباز شریف دی ’’سپیڈ‘‘ صرف مہنگائی ودھاؤن لئی استعمال ہو رہی اے۔
آزاد کشمیر دی صورتحال اُتے حافظ نعیم نے آکھیا کہ حکمران بندوق دی نوک اُتے کدوں تک عوام نوں ڈراؤندے رہن گے؟ طاقت ہر مسئلے دا حل نہیں۔ حکومت تے عوام وچ ودھدا پیا فاصلہ کسے دے حق وچ نہیں۔ آزاد کشمیر دا مسئلہ مذاکرات دے ذریعے حل کیتا جاوے تے راولاکوٹ دے دھرنے دے شرکاء نال وی گل بات کیتی جاوے۔ انہاں دھرنا دین والے لوکاں نوں وی مذاکرات ول آؤن دی اپیل کیتی۔
