مریم نواز دی چینی کمپنی علی بابا دے وفد نال ملاقات، اے آئی سٹریٹجک پارٹنرشپ اُتے غور
پنجاب وچ گورننس نوں آرٹیفیشل انٹیلی جنس نال مربوط کیتا جا رہیا اے، اج ای ٹیکنالوجی استعمال کرن دی پالیسی اُتے عمل پیرا: گفتگو، اے آئی پاورڈ ملٹی ڈیزیز سکینر متعارف کراؤن دا فیصلہ، پائلٹ پراجیکٹ دی تیاری دا حکم، وزیراعلیٰ وطن واپس پہنچ گئے
لاہور (نیوز ایجنسیاں) وزیراعلیٰ پنجاب مریم نواز شریف نے دورہ چین دوران چین دی معروف کمپنی علی بابا کلاؤڈ دے اعلیٰ سطحی وفد نال ملاقات کیتی۔ علی بابا کلاؤڈ گروپ نے پنجاب دے آئی ٹی سیکٹر وچ دلچسپی دا اظہار کیتا۔ علی بابا کلاؤڈ گروپ دے حکام نے پنجاب وچ آرٹیفیشل انٹیلی جنس بیسڈ گورننس نوں سراہیا۔
ملاقات وچ زراعت، ہیلتھ کیئر، سوشو اکنامک پروگرام تے کلائمیٹ فورکاسٹ وچ آرٹیفیشل انٹیلی جنس دے استعمال اُتے گل بات ہوئی۔ پبلک سروسز لئی آرٹیفیشل انٹیلی جنس سٹریٹجک پارٹنرشپ اُتے وی غور کیتا گیا۔
وزیراعلیٰ مریم نواز نے ایس موقع اُتے آکھیا کہ پنجاب وچ گورننس دے نظام نوں آرٹیفیشل انٹیلی جنس نال مربوط کیتا جا رہیا اے۔ کل دی بجائے اج ای آرٹیفیشل انٹیلی جنس تے ہور ٹیکنالوجی دے استعمال دی پالیسی اُتے عمل کیتا جا رہیا اے۔
انہاں آکھیا کہ پنجاب وچ دنیا دا سب توں وڈا پبلک سیکٹر کینسر ہسپتال بنایا جا رہیا اے۔ پنجاب آرٹیفیشل انٹیلی جنس قائم کرن والا پہلا صوبہ بن چکیا اے۔ سرکاری سکولاں دے بچیاں نوں آرٹیفیشل انٹیلی جنس پڑھاؤن دا خیال بیجنگ دے طلبہ نوں ویکھ کے آیا۔
مریم نواز نے آکھیا کہ آرٹیفیشل انٹیلی جنس سمیت آئی ٹی ٹیکنالوجی لئی چینی تعاون دا خیرمقدم کراں گے۔ پنجاب نوجواناں تے سکلڈ ورک فورس دے لحاظ نال چوتھا وڈا صوبہ اے۔
پنجاب ڈیجیٹل اکانومی دے معاملے وچ لیڈر دی حیثیت رکھدا اے۔ پنجاب وچ نہ صرف سرکاری افسران تے اہلکاراں بلکہ کابینہ دے ارکان نوں وی اے آئی ٹریننگ دِتی گئی اے۔
علی بابا کلاؤڈ گروپ دے سینئر وائس پریذیڈنٹ لی جیا پنگ نے کمپنی دے امور بارے آگاہ کیتا تے آکھیا کہ آرٹیفیشل انٹیلی جنس نوں میڈیا کمپین تے میڈیکل ٹریننگ لئی استعمال کیتا جا رہیا اے۔ صوبائی معاون برائے آرٹیفیشل انٹیلی جنس علی مصطفیٰ ڈار نے پنجاب وچ آرٹیفیشل انٹیلی جنس دے اقدامات بارے وی آگاہ کیتا۔
دریں اثنا وزیراعلیٰ نے پنجاب وچ مریضاں لئی ’’اے آئی پاورڈ ملٹی ڈیزیز سکینر‘‘ متعارف کراؤن دا فیصلہ کیتا اے۔ وزیراعلیٰ نوں چینی کمپنی علی بابا دے ایگزیکٹوز دی میٹنگ وچ بریفنگ دِتی گئی۔
اے آئی پاورڈ ملٹی ڈیزیز سکینر دے ذریعے دو منٹاں وچ دس بیماریوں دی تشخیص ممکن ہو سکے گی۔ ہر بیماری دی تشخیص، علاج تے مینجمنٹ کیتی جا سکے گی۔ پنج مہلک کینسرز دی بروقت نشاندہی وی ممکن ہووے گی، جنہاں وچ پینکریاز تے لیور کینسر دی تشخیص شامل اے۔
معدے، لبلبے، غذائی نالی، وڈی آنت، جگر تے شہ رگ دے کینسر دی سکریننگ کیتی جا سکے گی۔ دل تے خون دیاں شریانواں نال متعلق بیماریواں دے خطرات، پٹھیاں تے چربی دی صحت دا وی جائزہ لیا جا سکے گا۔
ہڈیاں دی کمزوری دی تشخیص، علاج تے مینجمنٹ وچ وی ایہہ سکینر معاون ثابت ہووے گا۔ اے آئی پاورڈ ملٹی ڈیزیز سکینر دا نظام روایتی تشخیصی طریقیاں دے نال اک معاون ٹیکنالوجی دے طور اُتے کم کرے گا۔
وزیراعلیٰ نے ہیلتھ حکام نوں ’’اے آئی پاورڈ ملٹی ڈیزیز سکینر‘‘ دے پائلٹ پراجیکٹ دی تیاری دا حکم وی دے دِتا اے۔
علاوہ ازیں وزیراعلیٰ مریم نواز چین دا چار روزہ دورہ مکمل کرن توں بعد وطن واپس پہنچ گئے نیں۔
