فیلڈ مارشل عاصم منیر دیاں سعودی تے ترک رہنماواں نال ملاقاتاں.
سعودی وزیرِ دفاع، ترک وزیرِ خارجہ تے ہور رہنماواں نال ملاقاتاں، دفاعی تعاون اُتے گل بات، خواجہ آصف نال ترک وزیرِ دفاع دی ملاقات، خطے وچ دفاعی تعاون ودھاؤن اُتے اتفاق
راولپنڈی (خصوصی نیوز رپورٹر، اے پی پی، مانیٹرنگ ڈیسک) — فیلڈ مارشل سید عاصم منیر نے دورۂ ترکیہ دوران استنبول وچ اعلیٰ سطح دیاں اہم ملاقاتاں کیتیاں۔
آئی ایس پی آر دے مطابق فیلڈ مارشل عاصم منیر دی سعودی وزیرِ دفاع شہزادہ خالد بن سلمان بن عبدالعزیز آل سعود، ترک وزیرِ خارجہ حاقان فیدان، وزیرِ قومی دفاع یاشار گولر تے ترک جنرل سٹاف دے سربراہ جنرل سلچوک بائراکتار اوغلو نال وکھ وکھ ملاقاتاں ہوئیاں۔
ملاقاتاں دوران باہمی دلچسپی دے امور، دوطرفہ دفاعی تعاون تے خطے دی سکیورٹی صورتحال اُتے تبادلۂ خیال کیتا گیا۔
ملاقاتاں وچ پاکستان، سعودی عرب تے ترکیہ دے درمیان برادرانہ تعلقات تے ودھدے ہوئے سٹریٹجک تے دفاعی تعاون نوں ہور مضبوط کرن دے عزم دا اعادہ کیتا گیا۔
دوجے پاسے وزیرِ دفاع خواجہ محمد آصف نال ترک وزیرِ دفاع یاشار گولر نے ملاقات کیتی، جس وچ خطے وچ مشترکہ دفاعی تعاون نوں ہور ودھاؤن اُتے اتفاق کیتا گیا۔
ملاقات وچ ترک چیف آف جنرل سٹاف جنرل سلچوک بائراکتار اوغلو وی شریک سن۔ وزیرِ دفاع خواجہ محمد آصف تے ترک قیادت نے خطے وچ مشترکہ دفاعی تعاون ودھاؤن اُتے اتفاق کیتا۔
