امریکا دے وڈے حملے، ایران دا جوابی وار: امریکیواں نوں پچھتانا پئے گا: پاسدارانِ انقلاب، ہور سخت کارروائی کراں گے: ٹرمپ، تیل دیاں قیمتاں وچ اضافہ، اساں نئیں تے کوئی وی تیل برآمد نئیں کر سکدا: ایرانی سپیکر

امریکا دی بندر عباس، قشم جزیرے تے سیرک اُتے بمباری، صوبہ ہرمزگان وچ شادی دی تقریب اُتے حملے وچ 4 افراد شہید، 50 توں ودھ زخمی، نویں اہداف نوں نشانہ بنایا: سینٹکام

آبنائے ہرمز وچ 2 ٹینکراں اُتے حملے، چابہار تے کنارک وچ 4 پروجیکٹائل ڈگّن دی تصدیق، ایرانی صدر دی پیوٹن نال ملاقات، جنگ وچ حمایت اُتے روس دا شکریہ ادا کیتا

واشنگٹن، تہران، بشکیک (نیوز ایجنسیاں) امریکا ولوں ایران اُتے وڈے حملیاں دے بعد تہران نے جوابی کارروائی شروع کر دِتی۔ ایرانی میڈیا دے مطابق مسلح افواج نے خطے وچ امریکی فوجی اڈیاں تے مفادات نوں میزائل تے ڈرونز نال نشانہ بنانا شروع کر دِتا اے۔ حملیاں وچ ہوئے جانی تے مالی نقصان دیاں فوری تفصیلات سامنے نئیں آئیاں۔

امریکی فوج دے مطابق ایران وچ پاسدارانِ انقلاب دے ٹھکانیاں اُتے فضائی حملے کیتے گئے نیں تے ہور اہداف نوں وی نشانہ بنایا جا رہیا اے۔ امریکی سینٹکام نے آکھیا کہ کارروائی آبنائے ہرمز وچ تجارتی جہاز رانی تے خطے وچ تعینات امریکی فوجیاں خلاف پاسدارانِ انقلاب دیاں حالیہ کارروائیاں دے جواب وچ کیتی گئی اے۔ حملے منگل نوں دوپہر 12 وجے شروع ہوئے تے نویں اہداف نوں نشانہ بنایا گیا۔

ایرانی سرکاری ٹی وی دے مطابق آبنائے ہرمز دے نیڑے متعدد دھماکیاں دیاں آوازاں سنائیاں دِتیاں گئیاں۔ قشم جزیرے دے ماسان گاؤں دے نیڑے 5 توں ودھ دھماکے ہوئے، جدوں کہ بندر عباس دے مشرق ول وی دھماکے ہوئے۔ ایرانی میڈیا نے دعویٰ کیتا کہ امریکی فورسز نے جنوب مشرقی ایران وچ جیرفت ایئرپورٹ نوں وی نشانہ بنایا۔

ایرانی ہلالِ احمر دے مطابق جنوبی صوبہ ہرمزگان دے شہر کوہستک وچ شادی دی تقریب دوران امریکی میزائل دے ملبے تے چھریاں دی زد وچ آ کے اک بچے سمیت 4 افراد شہید تے 50 توں ودھ زخمی ہوگئے۔ حملے وچ شادی دی تقریب والا رہائشی مکان وی متاثر ہویا۔

ایرانی سرکاری میڈیا دے مطابق صوبہ سیستان بلوچستان دے چابہار تے کنارک دے علاقے وچ 4 پروجیکٹائل ڈگے، تاہم فوری طور اُتے کسے جانی یا مالی نقصان دی اطلاع نئیں ملی۔

دوجے پاسے آبنائے ہرمز وچ دو خام تیل بردار ٹینکراں نوں نامعلوم میزائلاں نال نشانہ بنایا گیا۔ برطانوی میری ٹائم ٹریڈ آپریشنز دے مطابق کسے جانی نقصان یا ماحولیاتی اثرات دی اطلاع نئیں ملی۔

پاسدارانِ انقلاب دے ترجمان حسین محبی نے آکھیا کہ تازہ امریکی حملیاں اُتے امریکا نوں پچھتانا پئے گا تے جارحیت کرن والیاں نوں کڑی سزا دِتی جائے گی۔

امریکی صدر ٹرمپ نے دھمکی دِتی کہ جے ایران نے تازہ حملیاں دا جواب دِتا تے ہور سخت وار کیتے جان گے۔ انہاں آکھیا کہ ایہہ ساڈا سب توں وڈا حملہ نئیں، اوہ ہن وی باقی اے تے اوہدے بعد ایران دا بہت تھوڑا حصہ باقی رہ جائے گا۔

ٹرمپ نے ایران خلاف جوہری ہتھیار استعمال کرن دے امکان بارے آکھیا کہ اوہ اس آپشن نوں مکمل طور اُتے خارج نئیں کرن گے، تاہم فی الحال ایس دی کوئی وجہ نئیں۔ انہاں دا کہنا سی کہ ایران فوجی اعتبار نال شکست خوردہ اے تے اوہدی فوجی صلاحیتاں نوں وڈا نقصان پہنچیا اے۔

ایرانی پارلیمان دے سپیکر محمد باقر قالیباف نے خبردار کیتا کہ جے دشمن خلیجِ فارس توں ایران دیاں تیل برآمدات روکنا چاہندا اے تے فیر اتھوں کوئی وی تیل برآمد نئیں کر سکدا۔ انہاں آکھیا کہ محاصرہ ہور سخت کیتا گیا تے ایران عسکری جواب دے گا تے سب نوں نقصان اٹھانا پئے گا۔

تازہ حملیاں دے بعد عالمی منڈی وچ تیل دیاں قیمتاں وی ودھ گئیاں۔ برینٹ خام تیل دی قیمت 3.51 ڈالر ودھ کے 94 ڈالر، جدوں کہ ڈبلیو ٹی آئی خام تیل 3.84 ڈالر ودھ کے 90 ڈالر فی بیرل تک پہنچ گیا۔

ایرانی صدر مسعود پزشکیان نے شنگھائی تعاون تنظیم دے سربراہ اجلاس دے موقع اُتے روسی صدر پیوٹن نال ملاقات کیتی تے جنگ دوران روسی حمایت اُتے انہاں دا شکریہ ادا کیتا۔ پزشکیان نے آکھیا کہ امریکی پابندیاں تے عالمی فورماں اُتے روس دے مؤقف نے دوناں ملکاں دے تعلقات نوں ہور وی اسٹریٹجک بنا دِتا اے۔

ایرانی صدر نے خبردار کیتا کہ امریکا ولوں دباؤ تے دھمکیاں دی پالیسی دوبارہ اپنان نال جنگ دے خاتمے لئی جاری سفارتی کوششاں متاثر ہوسکدیاں نیں۔ انہاں آکھیا کہ جے امریکا جون وچ طے پائے جنگ بندی معاہدے دی بحالی ول قدم چکدا اے تے ایران وی فوری طور اُتے جوابی قدم چکے گا۔

دریں اثنا ایران نے اپنے فضائی دفاعی نظام وچ مصنوعی ذہانت دی ٹیکنالوجی شامل کرنا شروع کر دِتی اے، تاں جو کمانڈ تے کنٹرول دا عمل تیز کیتا جا سکے تے اہداف نوں نشانہ بنان دی درستگی بہتر بنائی جا سکے۔

ایرانی سپریم لیڈر مجتبیٰ خامنہ ای نے 2577 قیدیواں دیاں سزاں معاف یا گھٹ کرن دی منظوری وی دے دِتی اے۔

ایرانی وزارتِ خارجہ دے ترجمان اسماعیل بقائی نے یورپی یونین نوں تنقید دا نشانہ بناندیاں آکھیا کہ یورپی یونین اپنی خودمختاری، قوانین تے قدراں امریکا کول گروی رکھ چکی اے تے ایران خلاف یکطرفہ پابندیاں دی حمایت کر رہی اے۔