صوبیاں دی قرارداد کِتے ہور تیار ہو رہی اے تاں مینوں علم نئیں: ثناء اللہ
وزیراعلیٰ سندھ نے قومی اسمبلی نوں ایویں خبردار کیتا جیویں قرارداد پیش ہو چکی ہووے
لاہور (مانیٹرنگ ڈیسک) وزیراعظم دے مشیر رانا ثناء اللہ نے آکھیا اے کہ سندھ اسمبلی وچ جیہڑیاں تقریراں ہوئیاں نیں، انہاں نوں قبل از وقت آکھیا جا سکدا اے۔ وزیراعلیٰ نوں پتہ اے کہ جدوں وی ایہہ کم ہونا اے تاں قرارداد قومی اسمبلی وچ آن دی اے۔
ہن تک صوبیاں دے حوالے نال کوئی قرارداد پارلیمنٹ وچ پیش نئیں کیتی گئی۔ اک انٹرویو وچ انہاں آکھیا کہ کی وفاق سندھ حکومت نال مشاورت توں بغیر صوبیاں دی قرارداد لے آوے گا؟ صوبیاں دے حوالے نال کوئی بل پارلیمنٹ وچ پیش ہون جا رہیا اے، ایہہ کس نے آکھیا؟
صوبیاں دی قرارداد حکومت ولوں آن دی اے، ہن تک ایسی کوئی تیاری نئیں۔ صوبیاں لئی کوئی بل تے ترمیم پارلیمنٹ وچ پیش نئیں ہو رہی۔
انہاں آکھیا کہ وزیراعلیٰ سندھ نے قومی اسمبلی نوں ایویں خبردار کیتا جیویں اسمبلی وچ قرارداد موجود ہووے۔
رانا ثناء اللہ نے آکھیا کہ کوئی بل، ترمیم یا قرارداد وزیراعظم دے نوٹس وچ لیاندے بغیر منظور نئیں ہو سکدی۔ ساڈی طرفوں صوبیاں دی قرارداد یا بل دی کوئی تیاری نئیں ہو رہی۔ جے کِتے ہور تیاری ہو رہی اے تاں سانوں علم نئیں۔ کِتے ہور تیاری ہو رہی اے تاں اوہ حکومت تے پارلیمنٹ کول ہی آن دی اے۔
رانا ثناء اللہ نے آکھیا کہ آصف زرداری ناراض ہو کے بیرونِ ملک نئیں گئے تے محسن نقوی انہاں نوں مناؤن لئی نئیں گئے۔
