جنرل باجوہ نے ایکسٹینشن، انہاں لئی این آر او منگیا: گنڈا پور

پرویز خٹک نے پیغام دتا تے آکھیا عمران خان نوں منا لو تاں سب کجھ ٹھیک ہو جاوے گا، مولانا نال سیز فائر اے، اوہ تحریک وچ آندے نیں تاں کوئی اعتراض نئیں: انٹرویو

اسلام آباد (مانیٹرنگ ڈیسک) سابق وزیراعلیٰ خیبرپختونخوا علی امین گنڈاپور نے آکھیا اے کہ پی ٹی آئی حکومت ختم ہون توں ۱۰ دناں پہلاں پرویز خٹک نے مینوں کال کیتی تے ملن لئی بلایا۔

سپیکر دے گھر دے سامنے چھوٹے پارک وچ پرویز خٹک نال ملاقات ہوئی تاں انہاں آکھیا کہ عمران خان نئیں من رہے، تسی انہاں نوں مناؤ۔ خٹک نے دسیا کہ باجوہ صاحب آکھ رہے نیں کہ مینوں ایکسٹینشن، انہاں نوں این آر او دو، فیر سب کجھ ٹھیک اے۔

اک انٹرویو وچ سابق وزیراعلیٰ نے آکھیا کہ مولانا صاحب دا جدوں دھرنا ختم ہویا تاں اوس شام مولانا صاحب تے باجوہ صاحب دی میٹنگ ہوئی سی۔ نومبر ۲۰۲۰ وچ مائنس بانی پی ٹی آئی اُتے کم شروع ہو گیا سی تے ایہہ گل کجھ لوک جان دے سن۔

اک سوال دے جواب وچ انہاں آکھیا کہ عمران خان دا ٹوئٹر اکاؤنٹ بیرونِ ملک توں چل رہیا اے، اینوں چلاؤن والے جیہڑا چاہندے نیں، اپنی مرضی نال کر دیندے نیں۔

اک ہور سوال اُتے آکھیا کہ مولانا صاحب نوں ایہہ ہی آکھیا سی کہ حق اُتے آ جاؤ تے مخصوص نشستاں چھڈ دیو۔ انہاں نال میرا سیز فائر پہلاں توں ہی اے۔ جے مولانا ایس تحریک وچ ساڈے نال آؤن لئی تیار نیں تاں مینوں کوئی اعتراض نئیں اے۔