یومِ فضائیہ اُتے ملک بھر دیاں ایئربیسز اُتے تقریباں، شہیداں نوں خراجِ عقیدت پیش
فضائیہ دے شاہین ملکی دفاع لئی ہر ویلے مستعد: صدر زرداری، شہباز شریف
اسلام آباد، راولپنڈی ملک بھر وچ یومِ فضائیہ قومی جوش تے جذبے نال منایا گیا۔ 1965 دی پاک بھارت جنگ وچ پاک فضائیہ دے شاہیناں نے شجاعت، مہارت تے جانبازی دیاں لازوال مثالاں قائم کیتیاں۔ پاکستان ایئر فورس نے ملک بھر دیاں ساریاں پی اے ایف بیسز اُتے 7 ستمبر نوں یومِ شہدا دے طور اُتے مناندیاں ہوئیاں اپنے شہیداں دیاں عظیم قربانیاں نوں خراجِ عقیدت پیش کیتا۔
پاک فوج دے شعبہ تعلقاتِ عامہ (آئی ایس پی آر) دے مطابق یومِ شہدا دا آغاز 1965 تے 1971 دیاں جنگاں دے شہیداں، معرکۂ حق دے بہادر شہیداں تے پاکستان دے قیام توں لے کے ہن تک فرض دی ادائیگی دوران اپنی جاناں دا نذرانہ پیش کرن والے پاک فضائیہ دے سارے اہلکاراں لئی خصوصی دعا تے قرآن خوانی نال ہویا۔
پاک فضائیہ دے سربراہ ایئر چیف مارشل ظہیر احمد بابر سدھو اسلام آباد وچ ایئر ہیڈکوارٹرز اُتے منعقدہ یومِ شہدا دی تقریب دے مہمانِ خصوصی سن۔ ایئر چیف مارشل نے آکھیا کہ ساڈے اسلاف دے بہادرانہ کارنامے محض تاریخ دے باب نیں، بلکہ اک زندہ ورثہ نیں، جیہڑا موجودہ نسل اُتے اک ڈونگی ذمہ داری عائد کردا اے۔
ایئر چیف مارشل نے یادگارِ شہدا اُتے پھلاں دی چادر چڑھائی تے پاک فضائیہ دے بہادر شہیداں لئی فاتحہ خوانی وی کیتی۔
صدرِ مملکت آصف علی زرداری نے اپنے پیغام وچ آکھیا کہ پاک فضائیہ دے شاہیناں نے بے مثال بہادری دا مظاہرہ کیتا، پاک فضائیہ پاکستان دی خودمختاری تے فضائی حدّاں دے دفاع لئی ہر ویلے مستعد اے۔
وزیراعظم شہباز شریف نے آکھیا کہ پاک فضائیہ نے ہمیشہ قوم دی پکار اُتے بے مثال جرأت تے بہادری نال لبیک آکھیا۔
وفاقی وزیرِ داخلہ محسن نقوی نے آکھیا کہ پاک فضائیہ دی اعلیٰ پیشہ ورانہ مہارت تے صلاحیتاں اُتے پوری قوم نوں فخر اے۔
وزیراعلیٰ مریم نواز نے آکھیا کہ یومِ فضائیہ قومی اتحاد، غیر متزلزل عزم تے حب الوطنی دے جذبے دی علامت اے۔
