کیپٹل مارکیٹ مضبوط، عوامی سرمایہ کاری نوں ودھایا جاوے: یوسف رضا
کاروباری اداریاں نوں سٹاک ایکسچینج وچ لسٹنگ دی ترغیب دِتی جاوے: قائم مقام صدر
اسلام آباد قائم مقام صدر سید یوسف رضا گیلانی نے پاکستان دیاں کیپٹل مارکیٹاں نوں ہور مضبوط بناؤن، سرمایہ کاری وچ عوام دی شمولیت ودھاؤن تے کاروباری شعبے وچ ایکویٹی فنانسنگ دے ودھ توں ودھ استعمال اُتے زور دِتا اے۔
اسلام آباد سٹاک ایکسچینج ٹاورز وچ ‘‘فاؤنڈرز وال’’ دی افتتاحی تقریب نوں خطاب کردیاں اوہناں آکھیا کہ عوام وچ مالی امور تے سرمایہ کاری بارے آگاہی ودھاؤن لئی مالیاتی خواندگی دے پروگرام ضروری نیں۔
خاندانی ملکیت والے کاروباراں تے درمیانے درجے دے اداریاں نوں سٹاک ایکسچینج وچ لسٹنگ دی ترغیب دِتی جاوے تاں جو اوہ کیپٹل مارکیٹ توں سرمایہ حاصل کر سکن۔
اوہناں مستحکم پالیسیواں، مضبوط معاشی بنیاداں، میکرو اکنامک استحکام تے طویل المدتی اصلاحات دی ضرورت اُتے وی زور دِتا۔
سید یوسف رضا گیلانی نے اسلام آباد سٹاک ایکسچینج دے بانیواں تے پہلے بورڈ آف ڈائریکٹرز نوں خراجِ تحسین پیش کیتا۔ اوہناں مرحوم احسان الحق پراچہ دیاں خدمات دا وی ذکر کیتا، جنہاں نے 1989ء وچ اسلام آباد سٹاک ایکسچینج دے قیام وچ اہم کردار ادا کیتا۔
