جناب بزدار صاحب! پنجاب یاد رکھدا اے

لکھت:آصف عنایت

انج تے وطن عزیز دے لوک یاد رکھدے نیں کدی نہیں بھلدے جیہڑا جویں ہوئے اونج ای ذکر کردے نیں کیوں جے اج میرا مخاطب پنجاب دے وزیراعلیٰ نیں تے موجودہ حکومت وفاقی ہوئے یا صوبائی ہر ناکامی دا ملبہ سابقہ حکومتاں اُتے پا دیندے نیں۔ ہن اک نواں بہانہ مل گیا، ہر اک نوں مافیا دا ناں دے کے راہ فرار لیندے نیں۔ نویں نسل سمجھدی اے کہ ایس ملک وچ سب کجھ پہلی وار ہو رہیا اے۔ ساڈے لڑکپن دا زمانہ سی، ملک غلام مصطفی کھر گورنر پنجاب سن۔ پنجاب پلس ہڑتال اُتے چلی گئی اے۔ گورنر پنجاب نے ریڈیو اُتے کجھ منٹ تقریر کیتی جس وچ گورنر نے کہیا ’’کل 4 وجے تیکر یا کوئی وی ویلا دتا جے پلس والے اپنی ڈیوٹیاں اُتے واپس نہ آئے تے نویں بھرتی شروع کر دتی جائے گی‘‘۔ گورنر دی تقریر ختم ہون دے اک گھنٹے بعد ای پلس اپنی ڈیوٹیاں اُتے سی۔ اک نہیں کئی واقعے نیں کہ حکومت نے بیورو کریسی نوں دسیا کہ اہل عوامی قیادت کیہ ہوندی اے۔
ایس وچ کوئی شک نہیں کہ میاں نواز شریف ضیاء الحق دے دور وچ اقتدار وچ آئے۔ ایہناں دے پچھے اسٹیبلشمنٹ، سارے ادارے اشرافیہ، عدلیہ تے پوری ریاست سی پر لوکاں نال رابطے اوہناں نے آپ ودھائے۔ اج ہر کم وچ حکومت دے نال اک پیج نہیں وری ریاستی مشینری حکومت نوں حصار وچ لئے ہوئے اے فیر وی کارکردگی سوالیہ نشان اے۔ نواز شریف وزیراعلیٰ سن۔ 12 ربیع الاول دا جلوس سی۔ اک جلوس دی قیادت لہور وچ میاں شہباز شریف کر رہے سن۔ اندرون لہور توں جلوس جا رہیا سی۔ شہباز شریف کسے ورکر دے موہڈیاں اُتے سوار سن۔ اک اندرون شہر دے رہائشی نے جلوس وچ نسدے نسدے آ کے میاں شہباز شریف دے برابر آ کے کہیا ( میاں صیب) میاں صاحب (12 دیگاں پکیاں نیں) میں 12 دیگاں پکائیاں نیں۔ شہباز شریف نے ایس دی گال اُتے تن چار وار تھپکی دتی تے ہر تھپکی اُتے کہیا چھ چھ چھ اصل وچ ایس نے 6 دیگاں پکوائیاں سن ایہہ گل سی گویا اوہ باخبر لوک سن۔
1999ء وچ میرے گھر ڈکیتی ہو گئی اللہ زندگی سلامتی عافیت وچ رکھے۔ میرے وڈے بھرا (گلزار احمد بٹ ) نے اگلے دن وزیراعلیٰ پنجاب میاں شہباز شریف توں ویلا لیا۔ سویرے 8 وجے دا ویلا سی۔ حمزہ شہباز آئے جناب چوہدری مختار حسین نال کاروباری معاملے دی گل کیتی تے چوہدری صاحب نے ہدایت دین دے انداز وچ دسیا کہ گلزار بٹ صاحب تہاڈے انکل نیں حمزہ شہباز نے دونواں ہتھاں نال انتہائی مودبانہ سلام کیتا۔ بہرحال اسیں بیٹھے ساں کہ میاں شہباز شریف دے دفتر دے اندروں ایہناں دا سیکرٹری آیا کہ تسیں صاحب توں ویلا لیا اے۔ جے مینوں بریف کر دیو کم دی نوعیت تے آسانی ہو جائے گی۔ اسیں کہیا کہ ڈکیتی ہوئی اے سیکرٹری کہن لگیا کہ دو منٹ انتظار کر لوئو فائل باہر آئے گی اوہ چیک کر لو۔ اوہ گل کر ای رہیا سی کہ اک رجسٹرد باہر آیا ایس نے کھولیا تے اخباراں دی کٹنگز تے خبراں لگیاں ہوئیاں سن میری ڈکیتی دی خبر نوں لال رنگ دے مارکر نال سرکل کیتا ہویا سی ہرے رنگ دے مارکر نال وزیراعلیٰ نے ایس پی ماڈل ٹائون تے ٹائون شپ ، 2 ایس پی دی ڈیوٹی تے دو ہفتیاں وچ رپورٹ منگی ہوئی سی۔ اسیں کہیا کہ ایہہ ساڈی خبر اے۔ اوہناں نے کہیا ہن تہاڈے احکامات تے جیہڑے ہونے سن ہو گئے ہن جے اونج ملنا اے تے مل لوئو۔ اسیں کہیا نہیں ہن لوڑ نہیں، جناب وزیراعلیٰ بزدار صاحب! 7 ویں دن تیکر انصاف مکمل ہو چکیا سی۔ تسیں تے آپ ن لیگ وچ رہے او، تہاڈا داوڑ پنڈ وچ استقبال ویکھ کے اک بڑھیا نے پچھیا کیہ ہو گیا ایس دے نال اینے لوک کیوں نیں تے ایس خاتون نوں تہاڈے بندے نے سمجھان لئی کہیا کہ (اے لہور وچ شہباز شریف لگ گیا اے)، گویا شہباز شریف دی کارکردگی دی وجہ نال اوہ بڈھی عورت وی واقف سی۔ نواں کجھ نہیں بن پائے تے بنے ہوئے ای قائم رہ جائو۔ شہباز شریف تے چلو بوہت عرصہ رہے ایہناں دی کارکردگی وی بیھیڑی نہیں سی واقعے تے بوہت نیں پر کجھ اک دا حوالہ دتا اے کہ اپنی گل کہہ سکاں۔ پچھلے دناں گوجرانوالہ جانا ہویا۔ ہمدم دیرنہ جناب محمد فاضل چیمہ نوں فون کیتا تے پتہ چلیا کہ یک نہ شد دو شد فیصل آباد توں حاجی آصف تارڑ صاحب وی آئے ہوئے نیں میں سوچیا کہ چلو اج یاداں تازہ کرنے آں۔ فون اُتے ویلا طے کر کے پسرور روڈ اُتے واقع موضع پیرو چک لئی نکلیا۔ 12,10 کلومیٹر دا راہ انج ای سی جویں کھنڈرات دا اک دشت اے تے لنگھ کے جانا اے۔ سڑک دی ایہہ حالت سی کہ گڈی وچ ای ہڈی پسلی اک ہو گئی۔ میں کہیا چیمہ صاحب تہاڈی محبت لے آئی نہیں تے سڑک دی حالت نے تاں توبہ کرا دتی ایتھے کوئی وباء تے اپڑ سکدی اے سواری نہیں۔ کہن نوں پسرور روڈ اے پر ایہہ گوجرانوالہ توں شکر گڑھ تیکر دی سڑک اے تقریباً 125کلومیٹر اے جیہڑا پہلے توں موجود اے۔ ایہہ 5 تحصیل ہیڈ کوارٹرز دی نمائندہ سڑک جس وچ تحصیل گوجرانوالہ، ڈسکہ، ناروال، شکر گڑھ تے تحصیل پسرور شامل نیں، انساناں دی آبادی لکھاں توں ودھ اے۔ سینکڑاں تعلیمی ادارے، کاروباری مراکز، صنعتاں، منڈیاں، دوا خانیاں تیکر ایسے روڈ دے ذریعے لوک اپڑ سکدے نیں۔ زرعی اجناس دی ترسیل دا وی ایہو ذریعہ اے۔ شہباز شریف دے دور وچ ایس اُتے ورکنگ ہوئی فیر ایہہ سڑک پرانے پاکستان وچ آ گئی کوئی اک دن نہیں لنگھا سکدا پر ایتھے دے رہن والے لکھاں توں ودھ دی آبادی دُکھ برداشت کر رہی اے۔ مواصلات دا نظام کہنا زیادتی اے نظام ہے ای کوئی نہیں۔ گوجرانوالہ توں پسرور تیکر تے بوہت ای تباہ کن صورت حال اے۔ ایس علاقے دے لوک شہباز شریف نوں یادکردے نیں۔ ایہہ کوئی نویں سڑک نہیں پرانی سڑک اے جس دی مرمت ہونی اے۔ ایتھوں دے لوک ایسے دے ذریعے موٹروے دی شکل ویکھ سکدے نیں۔ عمران خان نے اک تقریر وچ مذاق اڑاندے ہوئے کہیا سی ’’اوئے سڑکاں نہیں، قوم بناندے نیں ‘‘ پر وزیراعظم نے قوم وچ نفرت دی جیہڑی فصل بوئی ایس نوں تے آن والیاں نسل کٹدی رہے گی گھٹو گھٹ ’’سابقہ کرپٹ حکومتاں‘‘ دی بنائی ہوئیاں سڑکاں دی مرمت ای کر دین ہو سکدا اے پرانے پاکستان دی پرانی سڑکاں وچوں نواں پاکستان برآمد ہو سکے۔
میں سوچ وچ پئے گیا کہ کون کر سکدا اے کیوں کہ حکومت دے خدوخال تے واضح نہیں تاں جناب وزیراعلیٰ بزدار، جناب گورنر پنجاب، جناب سینئر وزیر علیم خان، سپیکر پنجاب اسمبلی چوہدری پرویز الٰہی صاحب تے چیف سیکرٹری پنجاب سیکرٹری سی اینڈ ڈبلیویا کمشنر دا اختیار اے۔ گوجرانوالہ دا دورہ ای کر لوئو تاکے 5 تحصیلاں تے کجھ ضلعیاں دے لوکاں لئی سڑکاں دی مرمت کروا کے شہباز شریف دے بنائے ہوئے منصوبیاں دے نال جوڑ دین۔ ایس علاقے دے محروم تے مجبور لوک پنجاب نال مل جان گے۔ علاقے دے عوام نوں وی ادراک نہیں تے مینوں وی علم نہیں کہ حکومت وچ کیہڑا کم کس نے کرنا اے ایس لئی کیہڑی شخصیت تے عہدیدار اے، نہیں تے کسے اک نوں ای مخاطب کر لیندے، بزدار صاحب ! پنجاب یاد رکھدا اے۔