سردار یوسف دی بابا حیدر زمان دے گھر آمد، گوہر رحمان نال ملاقات
وفاقی وزیر دا صوبہ ہزارہ لئی سانجھی جدوجہد دا اعلان، بابا حیدر زمان نوں خراجِ تحسین
ایبٹ آباد (شوکت سالار) وفاقی وزیر مذہبی امور تے چیئرمین صوبہ ہزارہ تحریک سردار محمد یوسف نے بابا حیدر زمان مرحوم دے آبائی گھر حویلیاں دا دورہ کیتا، جتھے اوہناں نے تحریک صوبہ ہزارہ دے چیئرمین سردار گوہر رحمان (بابا حیدر زمان دے برادر) نال اہم ملاقات کیتی۔ ایس موقع اُتے مرتضیٰ جاوید عباسی تے سردار اورنگزیب نلوٹھہ وی اوہناں دے نال سن۔
ایس موقع اُتے میڈیا نال گل بات کردیاں سردار یوسف نے صوبہ ہزارہ دے قیام لئی سانجھی جدوجہد دا باقاعدہ اعلان کیتا۔ سردار محمد یوسف نے آکھیا کہ صوبہ ہزارہ دے قیام لئی بابا حیدر زمان دی جدوجہد قابلِ تحسین اے۔ صوبہ ہزارہ دی تحریک نوں اک انتظامی یونٹ دے تحت بابا جی نے لیڈ کیتا سی۔
اوہناں مزید آکھیا کہ دونے تحریکاں ہُن اک پلیٹ فارم توں صوبہ ہزارہ دے قیام لئی اپنا بھرپور کردار ادا کرن گیاں۔
