صوبیاں اُتے پیپلز پارٹی نے تنگ کیتا تاں پی ٹی آئی دوجا آپشن: نجم سیٹھی
عمران دی رہائی نہیں ہووے گی، ہسپتال جان گے، بچیاں نال گل بات تے فیملی نال ملاقات ہووے گی، بنی گالہ منتقلی دا ریلیف نہیں ملے گا: پروگرام ’’اج دی گل سیٹھی دے نال‘‘ وچ گفتگو
لاہور سینئر تجزیہ کار نجم سیٹھی نے آکھیا اے کہ جدوں تک تحریکِ انصاف چھوٹے چھوٹے جلسے کرے گی تے ہزار، پندرہ سو لوک آون گے، اوہدوں تک کوئی تھریٹ نہیں اے۔ جدوں تحریکِ انصاف ایہہ آکھدی اے کہ کراچی ورگے وڈے شہر وچ جلسہ کرنا اے تاں ایہہ پیپلز پارٹی نوں قبول نہیں۔
پروگرام ’’اج دی گل سیٹھی دے نال‘‘ وچ گفتگو کردیاں اوہناں آکھیا کہ رکاوٹاں اُتے سہیل آفریدی نے بلاول بھٹو نوں مخاطب کرکے پچھیا کہ دسو کون رکاوٹاں کھڑیاں کر رہیا اے، تاں بلاول جواب نہیں دین گے۔ بلاول ایہہ وی نہیں آکھ سکدے کہ ایہہ کم اسی کر رہے آں تے نہ ایہہ آکھ سکدے نیں کہ کوئی ہور کر رہیا اے۔ کسے ہور دا ناں لیا تاں پٹائی ہو جائے گی۔
اوہناں آکھیا کہ اہم گل ایہہ اے کہ جتھے جتھے تحریکِ انصاف گئی اے، اتھے جڑے ہزار، پندرہ سو لوک نکلے نیں، اوہ زیادہ تر نوجوان طبقہ سی۔ ایہہ کہنا کہ عمران خان صرف پنجاب تے کے پی وچ مقبول نیں، غلط ہووے گا۔ فیئر تے فری الیکشن ہووے تاں پتا لگ جائے گا کہ عمران خان دی کنی مقبولیت اے۔ 2018 دے الیکشن وچ پی ٹی آئی نے کراچی توں ودھ سیٹاں حاصل کیتیاں سن۔
اک سوال دے جواب وچ نجم سیٹھی نے آکھیا کہ تحریکِ انصاف امید کر رہی اے کہ عمران خان نوں بنی گالہ منتقل کرن دا ریلیف مل جائے گا، پر میرا خیال اے کہ ایہہ ریلیف نہیں ملے گا۔ البتہ عمران خان نوں ہسپتال لے کے جان گے، اتھے پورے ٹیسٹ ہوون گے۔ ایس توں بعد عمران خان دی اپنے بچیاں نال گل وی کرائی جائے گی، بہناں تے وکلا نال ملاقات وی کرائی جائے گی۔ فیر ہسپتال توں واپس اڈیالہ جیل منتقل کر دِتا جائے گا۔ ایہہ پہلا مرحلہ ہووے گا۔
نئے صوبیاں دے معاملے اُتے پی ٹی آئی عمران خان دی رہائی یا کوئی کمٹمنٹ ملن تک نہیں منے گی۔ عمران خان دی رہائی تاں نہیں ہو رہی۔ جے پیپلز پارٹی تنگ کردی اے تاں دوجا آپشن پی ٹی آئی اے، ایس وجہ نال پی ٹی آئی نال تھوڑا بہت رابطہ اے۔ ایہی وجہ اے کہ محسن نقوی نوں آکھیا گیا کہ تسی اپنا کردار ادا کرو۔
