ن لیگ نوں توڑن والے کئی آئے تے کئی چلے گئے: مریم
پارٹی وچ کوئی تقسیم نہیں، اسیں سارے رَل کے کم کر رہے آں، سارے رہنما اک پیج اُتے نیں: لندن وچ گفتگو، وزیراعلیٰ پنجاب دی زیرِ صدارت ویڈیو لنک اجلاس، ہر ضلع وچ خصوصی روڈ مرمت سکواڈ بناؤن دا فیصلہ۔
لاہور وزیراعلیٰ پنجاب مریم نواز نے آکھیا اے کہ مسلم لیگ (ن) نوں توڑن والے کئی آئے تے کئی چلے گئے، پر پارٹی اج وی مکمل طور اُتے متحد اے تے اوہویں دی اوہویں کھڑی اے۔ مسلم لیگ (ن) وچ کسے قسم دی کوئی تقسیم نہیں، اسیں سارے رَل کے کم کر رہے آں۔
انہاں خیالات دا اظہار انہاں لندن وچ میڈیا نال گل بات کردیاں کیتا۔ مریم نواز نے مزید آکھیا کہ مسلم لیگ (ن) وچ اندرونی طور اُتے کسے قسم دا کوئی اختلاف نہیں تے سارے رہنما اک ہی پیج اُتے نیں، ساڈی جماعت متحد اے۔ پارٹی نوں توڑن یا تقسیم دیاں گلاں وچ کوئی حقیقت نہیں۔
وزیراعلیٰ مریم نواز نے آکھیا کہ اوہ بیٹی دی گریجویشن اُتے بہت خوش نیں، بیٹی دی گریجویشن انہاں تے انہاں دے خاندان لئی خوشی دا موقع اے، اج واپس پاکستان روانہ ہو رہی آں۔
انہاں آکھیا کہ پنجاب وانگوں دوجے صوبیاں وچ وی کم ہونا چاہیدا اے۔ عوام دی خدمت لئی محنت کرنی پوے گی، محنت کراں گے تے کم نظر آوے گا۔ پنجاب وچ ترقی تے عوامی فلاح لئی دن رات کم کر رہے آں۔
دوجے پاسے وزیراعلیٰ مریم نواز دی زیرِ صدارت خصوصی ویڈیو لنک اجلاس دوران پنجاب دے ہر ضلع وچ ’’سپیشل روڈ مینٹیننس سکواڈ‘‘ قائم کرن دا فیصلہ کر لیا گیا تے وزیراعلیٰ مریم نواز نے سکواڈ دی منظوری دے دِتی۔
ویڈیو لنک اجلاس وچ کمشنراں تے ڈپٹی کمشنراں نوں ضلعیاں وچ جاری ترقیاتی کمّاں دی نگرانی دی ہدایت دِتی گئی۔ سڑکاں دی روزانہ جانچ پڑتال، مینٹیننس، صفائی تے سڑک دی ٹوٹ پھوٹ درست کرنا روڈ مینٹیننس سکواڈ دے سپرد ہووے گا۔
وزیراعلیٰ مریم نواز شریف نے مخصوص اربن روڈز اُتے کیٹ آئی دی تنصیب لازمی قرار دیندیاں پائیداری تے خوبصورتی لئی تھرموپلاسٹک روڈ مارکنگز استعمال کرن دا حکم دِتا اے تے شہر تے تحصیل دے داخلی راستیاں اُتے کنکریٹ دے داخلی دروازے تعمیر نہ کرن دی ہدایت کیتی اے۔
مریم نواز نے آکھیا کہ ہر ضلع وچ جاری پراجیکٹ دے دائرہ کار، وقت دی پابندی، معیار، اخراجات تے عملی پیش رفت نوں کور کرن لئی نگرانی دا نظام ہونا چاہیدا اے۔ مناسب مارکنگ، لین مارکنگ، ٹریفک سائن تے ہدایتی نشانات نصب تے برقرار رکھے جان۔ سارے روڈ سیفٹی اقدامات منظور شدہ تکنیکی معیار دے مطابق ہون۔ جاری پراجیکٹ دی شفافیت تے معیار اُتے کوئی سمجھوتہ نہیں ہووے گا۔
دوجے پاسے وزیراعلیٰ پنجاب دے ویژن تحت جانوراں، پرندیاں تے درندیاں دے علاج تے تحفظ لئی پاکستان دے پہلے وائلڈ لائف ہسپتال دی تعمیر مکمل کر لئی گئی اے۔
محکمہ جنگلات تے وائلڈ لائف کمانڈ اینڈ کنٹرول سینٹر دے دورے دے موقع اُتے پنجاب دی سینئر صوبائی وزیر مریم اورنگزیب نوں اجلاس وچ وائلڈ لائف ہسپتال سمیت مختلف منصوبیاں اُتے بریفنگ دِتی گئی۔
اجلاس نوں دسیا گیا کہ جدید سہولتاں نال آراستہ پاکستان دے پہلے وائلڈ لائف ہسپتال وچ 12 آپریشن تھیٹرز تے 2 معائنہ روم قائم کیتے گئے نیں۔
صوبائی وزیر مریم اورنگزیب نے آکھیا کہ وزیراعلیٰ مریم نواز شریف دے ویژن تحت وائلڈ لائف ہسپتال دا قیام جنگلی حیات دے علاج تے تحفظ دے حوالے نال اہم سنگِ میل اے۔
اجلاس وچ جنگلاں وچ آتشزدگی دی بروقت نشاندہی لئی جدید ٹیکنالوجی نال لیس نظام نصب کرن دا فیصلہ وی کیتا گیا۔
