پٹرولیم لیوی ختم نہ کیتی تاں کل لانگ مارچ دا اعلان کراں گے: حافظ نعیم

حکمران نوشتۂ دیوار پڑھ لین، لیوی بھتہ ٹیکس ختم کرکے عوام نوں ریلیف دین: امیر جماعت اسلامی، کراچی وچ خطاب۔ لاہور تے ہور شہراں وچ وی دھرنے جاری، حکمراناں دا رویہ عوام دشمنی وچ بدلدا جا رہیا اے: لیاقت بلوچ، جاوید قصوری۔

کراچی، لاہور امیر جماعت اسلامی پاکستان حافظ نعیم الرحمن نے آکھیا اے کہ پٹرولیم لیوی بھتہ ٹیکس اے، حکومت نوں کل 10 ستمبر تک دی مہلت دِتی اے، لیوی ختم نہ کیتی گئی تاں اسلام آباد ول لانگ مارچ دی تاریخ دا اعلان کراں گے۔ حکومت نے اک روز پہلاں ڈھٹائی دا مظاہرہ کردے ہوئے پٹرول دی قیمت وچ 13 روپے فی لٹر اضافہ کیتا، جِس دی شدید مذمت کردے آں۔ عالمی مارکیٹ وچ اتار چڑھاؤ اپنی جگہ، پر پٹرولیم لیوی دا کوئی جواز نہیں۔

اوہ گزشتہ روز پٹرولیم لیوی تے ظالمانہ مہنگائی دے خلاف احتجاجی تحریک دے تحت کراچی وچ گورنر ہاؤس دے باہر جاری دھرنے دے 24ویں روز جلسہ عام نوں خطاب کر رہے سن۔ ایس موقع اُتے جماعت اسلامی دے ہور رہنماؤں نے وی خطاب کیتا۔ حافظ نعیم الرحمن نے آکھیا کہ اج ساڈے وچ صومالیہ وچ قزاقاں دے ہتھاں 5 مہینیاں توں مغوی پاکستانیوں دے اہلخانہ وی موجود نیں۔ وزارت خارجہ، وزارت داخلہ تے متعلقہ اداریاں نال انہاں دی بازیابی لئی گل کیتی اے، حکومت انہاں نوں فوری بازیاب کرائے۔ سندھ حکومت ولوں متاثرہ خاندان اُتے تشدد قابلِ مذمت اے، وزیراعلیٰ مراد علی شاہ ایس دا ازالہ کرن۔

انہاں آکھیا کہ پی ٹی آئی دے چیئرمین نال گل ہوئی اے، انہاں دھرنے دی حمایت تے شرکت دی یقین دہانی کرائی اے۔ جماعت اسلامی پورے پاکستان وچ ظلم تے ناانصافی دے خلاف عوام نوں منظم کر رہی اے۔

حکمران سمجھدے نیں کہ دھرنیاں نال جماعت اسلامی تھک جائے گی، پر ایسا نہیں ہووے گا، جدوجہد ہور تیز ہووے گی۔ مسلم لیگ (ن)، پیپلزپارٹی تے ایم کیو ایم نے عمران حکومت گرائی سی تے موجودہ حکومت وچ وی تینوں شامل نیں، پر کسے نے پارلیمنٹ وچ پٹرولیم لیوی دے خلاف آواز نہیں چکی۔ جماعت اسلامی نے عوامی پارلیمنٹ لا دِتی اے، جِس نال حکمران طبقے نوں تکلیف ہونا شروع ہو گئی اے۔

امیر جماعت اسلامی نے آکھیا کہ ہر حکومت اقتدار وچ آؤن توں پہلاں آئی ایم ایف دا کشکول توڑن دے دعوے کردی اے، پر اقتدار وچ آؤندیاں ہی ایس نال رابطے شروع کر دیندی اے۔ آئی ایم ایف دسد ائے کہ کِس توں ٹیکس لینا اے تے کِس توں نہیں۔ حکمران نوشتۂ دیوار پڑھ لین، لیوی بھتہ ٹیکس ختم کرن تے عوام نوں حقیقی ریلیف دین۔

ادھر لاہور وچ مال روڈ اُتے دھرنے دے شرکاء نوں خطاب کردیاں نائب امیر جماعت اسلامی پاکستان لیاقت بلوچ نے آکھیا کہ حکمراناں دا رویہ عوام دشمنی وچ بدلدا جا رہیا اے۔ اسلام آباد وچ حکومتی ٹیم نال تین گھنٹے مذاکرات ہوئے، حکومت نے دھرنے ملتوی کرن دا آکھیا، پر اسیں واضح کیتا کہ مذاکرات وی ہون گے، احتجاج تے دھرنا وی جاری رہوے گا۔

امیر جماعت اسلامی پنجاب محمد جاوید قصوری نے آکھیا کہ حکومت ریلیف دین دی بجائے نت نویں ٹیکس تے پٹرول دیاں قیمتیں وچ مسلسل اضافہ کرکے عوام دیاں مشکلات ودھا رہی اے۔