پُرامن، مضبوط پاکستان لئی مل کے کردار ادا کرنا ہووے گا: یوسف گیلانی
قومی سلامتی تے یکجہتی لئی علماء تے مشائخ، پارلیمان، میڈیا تے نوجواناں دا کردار انتہائی اہم اے۔ آؤ اسیں پاکستان نوں نفرت نہیں، محبت نال تعمیر کرن دا عزم کریے: امن کانفرنس توں خطاب۔
اسلام آباد قائم مقام صدر سید یوسف رضا گیلانی نے ملک وچ برداشت، انسانی احترام، امن تے بین المذاہب ہم آہنگی دے فروغ نوں ہور مستحکم کرن اُتے زور دیندیاں آکھیا اے کہ اک پُرامن، متحد تے مضبوط پاکستان لئی معاشرے دے سارے طبقات نوں رَل کے اپنا کردار ادا کرنا ہووے گا۔
اوہ منگل نوں ’’عالمی امن دے فروغ، بین المذاہب ہم آہنگی، انسانی احترام تے پیغامِ پاکستان بیانیے دے فروغ وچ پاکستان دا کردار‘‘ دے عنوان نال بین الاقوامی بین المذاہب امن کانفرنس نوں خطاب کر رہے سن۔ کانفرنس دا انعقاد انٹر فیتھ کونسل فار پیس اینڈ ہارمنی تے مجلس علماء پاکستان نے کیتا۔
سید یوسف رضا گیلانی نے آکھیا کہ قومی سلامتی تے قومی یکجہتی نوں اک دوجے توں الگ نہیں کیتا جا سکدا۔ ایس مقصد دے حصول وچ علماء تے مشائخ، پارلیمان، میڈیا، سول سوسائٹی تے خاص طور اُتے نوجواناں دا کردار انتہائی اہم اے۔
قائم مقام صدر نے آکھیا، ’’آؤ اج اسیں سارے ایس عزم دی تجدید کریے کہ اسیں پاکستان نوں نفرت نال نہیں بلکہ محبت نال تعمیر کراں گے۔‘‘
