خیبر پختونخوا: ڈرون حملیاں توں بچاؤ، پولیس نے جال لا لئی
دہشتگرداں خلاف یوکرین دی حکمتِ عملی دا استعمال، اہلکاراں نوں جیمرز دی وی تربیت دِتی جا رہی اے
ڈرونز بازاراں وچ آسانی نال دستیاب نیں، تھوڑی تبدیلی نال گولہ بارود ڈگّن دا نظام نصب کیتا جا سکدا اے: پولیس افسر
جالاں تے حفاظتی دیواراں نے ڈرون حملیاں دے خطرے نوں ’’نمایاں حد تک‘‘ گھٹ کر دِتا۔
پشاور (اے ایف پی) پاکستان دے شمالی سرحدی علاقے وچ پولیس نے ڈرون حملیاں دے خطرے نال نمٹن لئی نویاں دفاعی تدبیراں اختیار کر لئیاں نیں۔ مختلف پولیس مراکز تے چوکیوں دے سامنے کئی میٹر اُچّے حفاظتی جال نصب کیتے گئے نیں، جبکہ اہلکاراں نوں ڈرونز خلاف ورتے جان والے جیمرز سمیت جدید آلات دی تربیت وی دِتی جا رہی اے۔
ایہ حکمتِ عملی یوکرین دے میدانِ جنگ وچ اختیار کیتیاں جان والیاں تدبیراں توں متاثر اے۔ مچھیاں پھڑن والے جالاں ورگے مضبوط دھاگے نال تیار کیتے ایہ جال پولیس عمارتاں دے سامنے کنکریٹ دیاں دیواراں تے ہور حفاظتی رکاوٹاں دے وچکار ایس طرح نصب کیتے گئے نیں کہ اوہ حفاظتی چھت دی شکل اختیار کر لیندے نیں۔
پولیس دے مطابق انہاں دا مقصد حملہ آور ڈرونز نوں اُلجھانا یا انہاں ولوں سٹّے جان والے مارٹر تے دستی بم عمارت تک پہنچن توں پہلاں روکنا اے، جس نال ممکنہ نقصان گھٹ کیتا جا سکدا اے۔
خیبر ضلع دے پولیس افسر وقار نے اے ایف پی نوں دسیا کہ ڈرونز بازاراں وچ آسانی نال دستیاب نیں تے معمولی تبدیلی دے ذریعے انہاں وچ گولہ بارود یا دھماکہ خیز مواد ڈگّن دا نظام نصب کیتا جا سکدا اے۔ پولیس نے اہلکاراں نوں فضائی حملیاں توں محفوظ رکھن تے ڈرون حملیاں دے خطرے نوں گھٹ کرن لئی جال لاؤن شروع کیتے نیں۔
یوکرین دے کجھ فرنٹ لائن شہراں وچ وی سڑکاں دے لمبے حصیاں اُتے ایسے جال نصب کیتے گئے نیں، جیہڑے ڈرون حملیاں خلاف حفاظتی راستے بناندے نیں۔ خیبر پختونخوا وچ افغانستان نال ملدے علاقے دے کئی پولیس مراکز اُتے ایہ جال کنکریٹ بلاکاں تے ہور رکاوٹاں دے نال دفاع دی نویں تہہ بن چکے نیں۔
خیبر پختونخوا وچ کالعدم تحریک طالبان پاکستان دی شورش ودھن نال پولیس نوں مسلسل حملیاں دا سامنا اے۔ پولیس حکام دے مطابق کالعدم ٹی ٹی پی 2024 توں حملیاں وچ ڈرونز دا وڈے پیمانے اُتے استعمال کر رہی اے، جنہاں نوں نگرانی لئی وی ورتیا جاندا اے۔
پشاور دے سینئر پولیس افسر نے دسیا کہ صوبے دے تقریباً 30 فیصد پولیس سٹیشن ہن وی اپنے ڈرونز توں محروم نیں، جدوں کہ مارکیٹ وچ ڈرونز آسانی نال دستیاب نیں۔
اک ہور سینئر پولیس افسر دے مطابق عسکریت پسند ڈرونز دے ذریعے پولیس کارروائیاں دی ’’ہر نقل و حرکت‘‘ اُتے نظر رکھدے نیں، جس نال انہاں خلاف کارروائی انتہائی مشکل ہو جاندی اے۔
کالعدم ٹی ٹی پی دا دعویٰ اے کہ اوہنے خودکش حملہ آوراں دے متبادل دے طور اُتے وی ڈرونز دا استعمال شروع کر دِتا اے تے اوہناں کول ایسے ’’ہزاراں‘‘ ڈرونز موجود نیں۔
پولیس نے وی ڈرون ٹیکنالوجی دے استعمال تے اس نال نمٹن لئی اپنی صلاحیت ودھانی شروع کر دِتی اے۔ اہلکاراں لئی تربیتی کورس کرائے جا رہے نیں، جبکہ ڈرونز تے انہاں خلاف ورتے جان والے آلات، جنہاں وچ ہتھ نال چلاؤن والے جیمرز وی شامل نیں، فراہم کیتے جا رہے نیں۔
گزشتہ مہینے خیبر پختونخوا پولیس دے یو اے وی (بغیر پائلٹ طیارہ) ڈویژن نے فورس دی تاریخ وچ پہلی واری ڈرون آپریشن بارے 52 اہلکاراں نوں تربیتی کورس کرایا۔
اک چیک پوسٹ اُتے تعینات پولیس اہلکار عامر نے اے ایف پی نوں دسیا کہ جالاں تے حفاظتی دیواراں نے ڈرون حملیاں تے عمارت اُتے دستی بم سٹّن دے خطرے نوں ’’نمایاں حد تک‘‘ گھٹ کر دِتا اے۔
ماضی وچ ایسے واقعات دوران پولیس تے ہور سکیورٹی اہلکاراں دے جانی نقصان دے نال عمارتاں نوں وی شدید نقصان پہنچیا، تاہم ہن صورتحال وچ بہتری آئی اے۔
مقامی شہریاں دا کہنا اے کہ حملیاں دا سلسلہ جاری رہن نال پولیس نوں عوام دی حفاظت لئی ہور اقدامات کرن پین گے۔ مکئی فروش گل حلیم نے آکھیا کہ علاقے وچ امن تے سکیورٹی لئی یا تاں پولیس چوکی بنائی جاوے یا حکام اتھوں طالبان دے خطرے دا خاتمہ کرن۔
