ای بائیک سکیم فیز ٹو دا آغاز، 6 ہفتیاں وچ فراہمی لئی اقدامات کرو: مریم نواز
2 دن وچ 4 لاکھ 32 ہزار طلبہ دی رجسٹریشن، 1 لاکھ 8 ہزار درخواستاں پراسیس مکمل ہون توں بعد جمع، 4 اکتوبر آخری تاریخ، ڈاؤن پیمنٹ معاف، صرف 3028 روپے ماہانہ قسط، ہیلمٹ تے سیفٹی راڈ مفت
لاہور وزیراعلیٰ پنجاب مریم نواز شریف دی ہدایت اُتے سی ایم ای بائیک سکیم فیز ٹو دا آغاز کر دِتا گیا اے۔ پنجاب دے طلبہ لئی ہونہار سکالرشپ تے لیپ ٹاپ دے بعد ہُن ای بائیکس وی شروع ہو چکیاں نیں۔ صرف 2 دناں وچ پنجاب توں 4 لاکھ 32 ہزار طلبہ نے سی ایم ای بائیک سکیم وچ رجسٹریشن کرائی اے، جدویں کہ سی ایم ای بائیک سکیم وچ 2 لاکھ 65 ہزار طلبہ دیاں درخواستاں جمع ہون دا عمل جاری اے۔ سی ایم ای بائیک سکیم لئی 1 لاکھ 8 ہزار توں ودھ طلبہ دیاں درخواستاں پراسیس مکمل ہون توں بعد جمع ہو چکیاں نیں۔
وزیراعلیٰ مریم نواز شریف نے پراسیس مکمل ہون توں بعد 6 ہفتیاں وچ ای بائیکاں دی فراہمی لئی اقدامات کرن دا حکم دِتا اے۔ سیکرٹری ٹرانسپورٹ عمران سکندر بلوچ نے دَسیا کہ طلبہ سی ایم الیکٹرک بائیک سکیم لئی bikes.punjab.gov.pk اُتے 4 اکتوبر تک اپلائی کر سکدے نیں۔
سی ایم ای بائیک سکیم (فیز 2) لئی پنجاب دا ڈومیسائل یا شناختی کارڈ بنیادی ضرورت اے۔ ہائر ایجوکیشن کمیشن (HEC) توں منظور شدہ سرکاری یا نجی ڈگری کالج یا یونیورسٹی دا ریگولر طالب علم ہونا ضروری اے۔ سی ایم الیکٹرک بائیک سکیم لئی طالب علم دی عمر گھٹ توں گھٹ 18 سال ہونی چاہیدی اے۔
سی ایم الیکٹرک بائیک سکیم وچ اپلائی کرن لئی لرنر ڈرائیونگ لائسنس یا موٹرسائیکل ڈرائیونگ لائسنس ہونا ضروری اے۔ سکیم تحت اک خاندان وچوں صرف اک طالب علم نوں ای بائیک ملے گی۔
عمران سکندر بلوچ نے دَسیا کہ وزیراعلیٰ مریم نواز شریف دی ہدایت اُتے سی ایم الیکٹرک بائیک سکیم وچ طلبہ لئی ڈاؤن پیمنٹ معاف کر دِتی گئی اے۔ حکومت پنجاب سی ایم الیکٹرک بائیک سکیم اُتے انٹرسٹ تے انشورنس وی ادا کرے گی، جدویں کہ سی ایم الیکٹرک بائیک حاصل کرن والے طلبہ صرف 3028 روپے ماہانہ ادا کرن گے۔
سی ایم الیکٹرک بائیک سکیم وچ بائیک دے نال ہیلمٹ تے سیفٹی راڈ مفت دِتا جائے گا۔ سکیم وچ طلبہ نوں ای بائیک چلاؤن لئی 2 روزہ ٹریننگ وی دِتی جائے گی۔
