لوڈشیڈنگ اُتے وزیرِاعظم دا اظہارِ برہمی، 2 گھنٹے توں ودھ بجلی بند نہ رکھن دی ہدایت
شکایتاں دے ازالے لئی کمیتیاں بناؤ، جِنہاں وچ عوامی نمائندگی وی ہووے، آر ایل این جی دی ترسیل وچ رکاوٹاں دور کرن لئی فوری اقدمات کرو: شہباز شریف
زراعت وچ جدت، پیداوار ودھاؤن تے برآمدات دے فروغ لئی وفاق تے صوبیاں وچ شراکت داری ضروری، عالمی منڈیاں تک رسائی ودھاؤ: اجلاس نوں خطاب
اسلام آباد وزیرِاعظم محمد شہباز شریف نے ملک دے مختلف علاقیاں وچ بجلی دی لوڈشیڈنگ دا نوٹس لیندے ہوئے وکھ وکھ شہراں وچ ودھدی لوڈشیڈنگ اُتے اظہارِ برہمی کیتا تے آکھیا کہ کسے وی علاقے وچ دو گھنٹے توں ودھ لوڈشیڈنگ نہ کیتی جاوے۔
اوہناں ملک وچ بجلی دی لوڈ مینجمنٹ بارے اہم جائزہ اجلاس دی صدارت کیتی۔ اجلاس نوں دَسیا گیا کہ خطے دی حالیہ صورتحال، آبنائے ہرمز وچ کشیدگی تے ترسیلی مشکلات دے باعث آر ایل این جی دی فراہمی متاثر ہون کرکے بجلی دی پیداوار وچ کمی آئی اے، جس دے نتیجے وچ طلب تے رسد وچ توازن برقرار رکھن لئی مجبوری وچ لوڈ مینجمنٹ کرنی پئی رہی اے۔
وزیرِاعظم نے ہدایت کیتی کہ خطے دی صورتحال تے مستقبل دیاں ضروریات نوں مدِنظر رکھدے ہوئے آر ایل این جی دی ترسیل وچ تعطل نال نمٹن لئی فوری اقدامات کیتے جان۔ سارے موجود وسائل دا مؤثر استعمال کیتا جاوے تاں جو کسے وی علاقے وچ دو گھنٹے توں ودھ بجلی دی لوڈشیڈنگ نہ ہووے۔
وزیرِاعظم نے ملک بھر وچ بجلی دی ترسیل تے ہور سارے مسئلیاں نال متعلق عوامی شکایتاں دے ازالے لئی ڈسکوز دی سطح اُتے کنزیومر گریوینس ریڈریسل کمیتیاں قائم کرن دے احکامات دتے۔ وزیرِاعظم نے ہدایت کیتی کہ ریڈریسل کمیٹی وچ عوامی نمائندگی وی ہونی چاہیدی اے۔ اک ہفتے دے اندر گریوینس کمیتیاں نوں فعال کیتا جاوے۔
اجلاس نوں دَسیا گیا کہ ہیلپ لائن نمبر 118 دے ذریعے بجلی دے صارفین اپنی شکایتاں درج کروا سکدے نیں۔ شکایت درج کرواؤن اُتے صارف نوں ٹوکن نمبر تے شکایت دے ازالے دا وقت وی دَسیا جاندا اے۔
اجلاس نوں آگاہ کیتا گیا کہ اس ویلے ضلع راجن پور دے 6 بجلی صارفین توں علاوہ ملک بھر وچ کسے وی صارف دی بجلی مون سون دیاں بارشاں دی وجہ نال متاثر نہیں ہوئی۔
دریں اثنا شہباز شریف نے زرعی شعبے تے زرعی برآمدات دے فروغ بارے اعلیٰ سطح دے اجلاس دی صدارت کردیاں آکھیا کہ زرعی شعبہ پاکستان دی معیشت دی ترقی تے استحکام وچ کلیدی کردار ادا کردا اے۔
فی ایکڑ زرعی پیداوار وچ اضافے، زراعت وچ جدت لیاؤن، لائیو سٹاک دے شعبے دی ترقی تے زرعی برآمدات دے فروغ لئی وفاق تے صوبیاں وچ مؤثر رابطہ تے شراکت داری ضروری اے۔
وزیرِاعظم نے آکھیا کہ پاکستان دیاں زرعی مصنوعات لئی عالمی منڈیاں وچ رسائی ودھاؤن تے نویاں منڈیاں لبھن لئی مربوط اقدامات کیتے جان۔
وزیرِاعظم نے ہدایت کیتی کہ زرعی برآمدات دے فروغ لئی پاکستان دے بیرونِ ملک مشنز وچ تعینات کمرشل افسراں نوں مؤثر کردار ادا کرنا چاہیدا اے۔ کساناں نوں فصل دی نگرانی لئی دستیاب موبائل ایپ بارے آگاہی ودھاؤن لئی مؤثر میڈیا مہم چلائی جاوے۔ زرعی شعبے دیاں برآمدات ودھاؤن لئی زرعی مصنوعات وچ ویلیو ایڈیشن ناگزیر اے۔
زرعی شعبے دے فروغ تے زرعی برآمدات ودھاؤن لئی اجلاس وچ مختلف تجاویز وی پیش کیتیاں گئیاں۔
بریفنگ وچ دَسیا گیا کہ پچھلے مالی سال وچ پاکستان دے زرعی شعبے توں برآمدات 5 ارب 18 کروڑ ڈالر رہیاں۔ چاول، فشریز، حلال گوشت، آلو، تل، تمباکو، آم تے مکئی پاکستان دیاں نمایاں زرعی برآمدات رہیاں۔
زرعی برآمدات وچ اضافے لئی ویلیو چینز تشکیل دین دی تجویز دتی گئی۔ بریفنگ وچ دَسیا گیا کہ چین، سعودی عرب، ایران تے خلیجی ممالک پاکستان دیاں زرعی برآمدات دے حوالے نال اہم منڈیاں نیں۔
نیشنل ایگریکلچر اینڈ فوڈ سکیورٹی کونسل نوں فعال کیتا جاوے گا۔ کونسل وچ وزرائے اعلیٰ اپنے اپنے صوبیاں دی نمائندگی کرن گے۔
ڈیجیٹل فارمرز ڈائری-ایگری سٹیک تشکیل دین دی تجویز وی دتی گئی، جس دے تحت ملک بھر دے کساناں تے زرعی لینڈ ریکارڈز نوں ڈیجیٹائز کیتا جاوے گا۔ بریفنگ وچ دَسیا گیا کہ ڈیجیٹل فارمرز ڈائری-ایگری سٹیک دے تحت زمین تے پانی دی جانچ دے ریکارڈ وی ڈیجیٹائز کیتے جان گے۔
بہتر نتائج والے زرعی طریقہ کاراں دے فروغ لئی پاک-گیپ (پاکستان گڈ ایگریکلچر پریکٹسز) نظام تشکیل دتا جاوے گا۔
زرعی شعبے دے برآمد کنندگان دے فروغ لئی زرعی فنانسنگ دے حوالے نال سہولتاں فراہم کیتیاں جان گیاں۔
