قومی عدالتی پالیسی ساز کمیٹی: عدالتاں لئی قومی ای فائلنگ تے الیکٹرانک ریکارڈ نظام دی منظوری
چیف جسٹس دی زیرِصدارت اجلاس، عدالتی اصلاحاتی فریم ورک نوں عالمی قانون نال ہم آہنگ کرن دا فیصلہ
15 مارچ 2027 تک اصلاحاتی ٹریکر پورٹل فعال، خاندانی مقدمیاں وچ ای فائلنگ نظام دا تجرباتی نفاذ ہووے گا، ضلعی عدلیہ دے ججز تے عملے لئی ہیلتھ انشورنس دا فیصلہ، جبری گمشدگیاں تے مجوزہ کمیشن بارے جامع رپورٹ طلب
اسلام آباد (اے پی پی) چیف جسٹس پاکستان جسٹس یحییٰ آفریدی دی زیرِصدارت قومی عدالتی پالیسی ساز کمیٹی دے 62ویں اجلاس وچ ادارہ جاتی استعدادِ کار مضبوط بناؤن، انصاف تک رسائی تیز کرن تے مؤثر تے شفاف نظامِ انصاف یقینی بناؤن دے عزم دا اعادہ کیتا گیا، جدوں کہ پاکستان دیاں عدالتاں لئی قومی متحدہ ای فائلنگ تے الیکٹرانک عدالتی ریکارڈ نظام دی اصولی منظوری وی دے دِتی گئی۔
سپریم کورٹ دے اعلامیے مطابق اجلاس وچ لاہور ہائیکورٹ، پشاور ہائیکورٹ تے سندھ ہائیکورٹ دے چیف جسٹس صاحبان، جدوں کہ اسلام آباد ہائیکورٹ دے رجسٹرار نے وی شرکت کیتی۔
اجلاس وچ قومی عدالتی اصلاحاتی فریم ورک نوں عالمی قانون دی حکمرانی دے اشاریے نال ہم آہنگ کرن، قانون دی حکمرانی تے عدالتی اصلاحات ٹریکر پورٹل نوں 15 مارچ 2027 تک تمام عدالتی سطحاں اُتے مکمل فعال کرن تے عدالتی اعدادوشمار دی بروقت، درست تے مربوط ترسیل لئی میڈیا تے سٹریٹجک کمیونیکیشن سیل نوں فوری طور اُتے فعال کرن دے فیصلے کیتے گئے۔
کمیٹی نے جبری گمشدگیاں دے مقدمیاں نال نمٹّن لئی ازالے دے طریقۂ کار تے مجوزہ کمیشن دی تشکیل دے معاملے اُتے وزارتِ قانون و انصاف نوں کارروائی جلد مکمل کرکے اگلے اجلاس وچ جامع رپورٹ پیش کرن دی ہدایت کیتی۔
نظام دے یکساں ای فائلنگ فارم نوں حتمی شکل دین لئی سارے ہائیکورٹس دے رجسٹرارز یا اوہناں دے نامزد نمائندیاں تے صوبائی تے اسلام آباد بار کونسلز دے نامزد ارکان اُتے مشتمل کمیٹی تشکیل دین دا فیصلہ وی کیتا گیا۔
نویں نظام دا ابتدائی تجرباتی نفاذ ہر صوبے تے اسلام آباد دے منتخب مقامات اُتے خاندانی مقدمیاں وچ کیتا جاوے گا، جتھے فیملی کورٹ، ضلعی عدالت، متعلقہ ہائیکورٹ تے سپریم کورٹ شامل ہون گے۔
کمیٹی نے قومی عدالتی تجزیاتی ڈیش بورڈ وچ 17 ترجیحی مقدمیاں دیاں قسماں دے کامیاب انضمام نوں سراہیا تے ہائیکورٹس دے رجسٹرارز نوں اعدادوشمار دی مکمل تے درست فراہمی یقینی بناؤن دی ذمہ داری سونپی۔
چیف جسٹس صاحبان نوں مقدمیاں دے فیصلے، زیرِالتوا مقدمے، بیک لاگ تے ہور کارکردگی بارے ماہانہ بریفنگ دین دا وی فیصلہ کیتا گیا۔
قومی عدالتی پالیسی ساز کمیٹی نے یکم ستمبر 2025 توں 31 جولائی 2026 دے دوران ٹائم باؤنڈ مقدمیاں دے 14 لاکھ 67 ہزار 675 فیصلے کیتے جان اُتے ضلعی عدلیہ دی غیرمعمولی کارکردگی نوں سراہیا۔
اجلاس وچ ضلعی عدلیہ دے ججز تے عملے لئی طبی سہولتاں دی فراہمی دے سلسلے وچ لاہور ہائیکورٹ دی منظورشدہ ہیلتھ انشورنس پالیسی اپنان دا متفقہ فیصلہ وی کیتا گیا۔
