رشتے دار گردہ دین لئی تیار نہیں ہُندے، مریض مر رہیا ہووے تے کی کرے؟: سپریم کورٹ
کی ڈاکٹر مریض نوں چیک کرن توں پہلاں شناختی کارڈ چیک کرے؟ ڈاکٹر تے بہت مصروف ہُندے نیں: جسٹس جمال مندوخیل
مذکورہ ڈاکٹر صرف گردیاں دے ٹرانسپلانٹ وچ مصروف اے: ایڈیشنل اٹارنی جنرل، ڈاکٹر نادر دی ضمانت منظور
اسلام آباد (کورٹ رپورٹر، مانیٹرنگ ڈیسک) سپریم کورٹ نے مبینہ غیرقانونی گردیاں دی پیوندکاری وچ ملوث ڈاکٹر نادر دی ضمانت منظور کر لئی۔
جسٹس جمال خان مندوخیل دی سربراہی وچ دو رکنی بینچ نے غیرقانونی گردیاں دی پیوندکاری دے کیس دی سماعت کیتی۔
سماعت دوران جسٹس ملک شہزاد نے پچھیا کہ جے ٹرانسپلانٹ لئی ڈونر نہیں مل رہیا تے مریض کی کرے؟ مریض مر رہے ہُندے نیں تے ایسے حالات وچ ٹرانسپلانٹ کروانا پیندا اے، مجبوری وچ ہی ٹرانسپلانٹ کروانا پیندا اے تے رشتے دار تے گردہ دین لئی تیار ہُندے ہی نہیں۔
ایڈیشنل اٹارنی جنرل نے عدالت نوں دَسیا کہ جے رشتے دار گردہ نہ دین تے خصوصی اجازت لینا پیندی اے۔
تفتیشی افسر نے عدالت نوں دَسیا کہ جنوبی پنجاب وچ بھٹہ مزدوراں نوں لے آ کے اوہناں دے گردے کڈھے جاندے نیں۔ ڈاکٹر دے موبائل فون دے فرانزک تجزیے توں پتا لگیا کہ اوہ 65 ٹرانسپلانٹ کیسز وچ شامل رہیا اے۔ موجودہ کیس وچ ٹرانسپلانٹ ہون توں پہلاں ہی ڈاکٹر نوں گرفتار کر لیا گیا سی۔
جسٹس جمال خان مندوخیل نے پچھیا کہ کی ڈاکٹر مریض نوں چیک کرن توں پہلاں اوہدا شناختی کارڈ چیک کرے؟ ڈاکٹر تے بہت مصروف ہُندے نیں۔
ایڈیشنل اٹارنی جنرل نے آکھیا کہ مذکورہ ڈاکٹر صرف گردیاں دے ٹرانسپلانٹ وچ مصروف اے۔
جسٹس ملک شہزاد احمد خان نے آکھیا کہ ماتحت عدالتاں وچ تے پہلاں ہی بہت سارے مقدمے موجود نیں۔
جسٹس جمال خان مندوخیل نے آکھیا کہ ایس دا مطلب اے کہ لوکاں نوں عدالتاں اُتے اعتماد اے۔
بعد وچ عدالت نے ڈاکٹر نادر دی ضمانت منظور کردیاں کیس نمٹا دِتا۔
