دھرنا دین والیاں دے اگے عوام ہتھ جوڑدے، مہنگائی ہور ودھ جاندی اے: فضل الرحمٰن
ملک وچ چکّے جان والے مسئلے ہور ہوندے نیں تے اوہناں دے پچھے ایجنڈا کجھ ہور ہوندا اے، ناموسِ رسالت دے قانوناں نوں چھیڑیا گیا تاں بھرپور مزاحمت ہووے گی۔ مکہ اُتے حوثی باغیاں دے حملے دی دھمکی دی مذمت، اج دا اجتماع قادیانیت خلاف ریفرنڈم: تحفظِ ختمِ نبوت کانفرنس توں خطاب
کراچی (سٹاف رپورٹر) جمعیت علمائے اسلام دے سربراہ مولانا فضل الرحمٰن دا کہنا اے کہ ساڈے ملک وچ چکّے جان والے مسئلے ہور ہوندے نیں تے اوہناں دے پچھے ایجنڈا کجھ ہور ہوندا اے۔ میں عالمی طاقتاں تے پاکستان دی مقتدرہ نوں دَسنا چاہنا واں کہ تسی سانوں سبق پڑھانا چاہندے او، ایہ سانوں قبول نہیں۔
عالمی مجلس تحفظِ ختمِ نبوت دے زیرِ اہتمام عظیم الشان تحفظِ ختمِ نبوت کانفرنس وچ ملکی صورتحال اُتے گل کردیاں اوہناں آکھیا کہ ملک دا امن تباہ ہو چکیا اے، کے پی کے تے بلوچستان سڑ رہے نیں، سندھ وچ ڈاکو راج اے، بلوچستان وچ حالات خراب نیں، کوئی محفوظ نہیں۔
ریاست ماں ہوندی اے، اسیں آکھدے آں ریاست ماں بنے، ڈائن نہ بنے۔ ساڈے کجھ دوست مہنگائی خلاف دھرنے دیندے نیں، حکومت نال مذاکرات کردے نیں تے مہنگائی ہور ودھ جاندی اے۔ عوام ہتھ جوڑ کے آکھدے نیں کہ تسی ایہ دھرنے بند کر دیو۔ پٹرول دیاں قیمتاں ودھ رہیاں نیں، لوک احتجاج کرکے تھک چکے نیں۔
اوہناں آکھیا کہ اسیں دھاندلی والے الیکشن نہیں مننے، شفاف الیکشن دو تے عوام نوں فیصلہ کرن دیو۔ میں عام پاکستانی دے مسئلیاں لئی جنگ کر رہیا واں، ایس جنگ وچ ساڈا ساتھ دیو۔
اوہناں آکھیا کہ پاکستان نے کوشش کیتی کہ ایران تے امریکہ وچ صلح کرا دِتے۔ اج یمن توں اک گروہ اٹھیا اے جو سعودی عرب اُتے حملہ آور اے۔ اسیں سعودی عرب نوں دَسنا چاہندے آں کہ پاکستان دا بچہ بچہ حرمین شریفین دی حفاظت لئی جان دین نوں تیار اے۔
بندوق چھڈ کے اسیں جمہوریت دا رستہ اپنایا اے۔ ساڈیاں پگڑیاں ایس لئی نیں کہ سر اُچا رہے تے سینہ تان کے جدوجہد کردے رہئیے۔
مولانا فضل الرحمٰن نے آکھیا کہ پاکستان دے دینی مدرسے نشانے اُتے رکھے گئے نیں۔ تہاڈا باپ وی نہ مدرسے بند کر سکدا اے تے نہ مولوی بنن توں روک سکدا اے۔
