قائمہ کمیٹی: بغیر لائسنس جانوراں دیاں ویکسیناں دی تیاری تے فروخت دا انکشاف
کمیٹی ولوں ڈی جی لائیو سٹاک پختونخوا دی سرزنش، تمباکو نوں فصل قرار دین لئی کمیٹی قائم، زیتون دے پودے دی لائف ایک ہزار سال، اک پودے توں 413 کلو آئل حاصل ہویا، کمیٹی نوں بریفنگ
اسلام آباد (نامہ نگار) سینیٹ دی قائمہ کمیٹی برائے قومی غذائی تحفظ تے تحقیق وچ پاکستان وچ جانوراں دیاں ویکسیناں بغیر لائسنس بناؤن تے فروخت کرن دا انکشاف ہویا۔ کمیٹی نے برہمی دا اظہار کردیاں ڈائریکٹر جنرل لائیو سٹاک خیبر پختونخوا دی سرزنش کر دتی۔ اجلاس چیئرمین مسرور احسن دی زیرِ صدارت ہویا۔
سینیٹر ایمل ولی خان نے پچھیا کہ کی بغیر لائسنس جانوراں دی ویکسینیشن کیتی جا رہی اے؟ ڈی جی لائیو سٹاک کے پی نے آکھیا کہ 2019 توں لائسنس لئی اپلائی کیتا ہویا اے، پر ڈریپ نے لائسنس جاری نہیں کیتا۔
ایمل ولی خان نے آکھیا کہ لائیو سٹاک حساس شعبہ اے، غریب لوکاں دا روزگار ایس نال جڑیا ہویا اے، بغیر لائسنس جانوراں نوں ویکسین لائی جا رہی اے یا پانی؟
اجلاس وچ تمباکو دی کاشت اُتے وی بحث ہوئی۔ حکام نے دَسیا کہ 90 فیصد تمباکو خیبر پختونخوا وچ، جدوں کہ پنجاب وچ وی کاشت کیتا جاندا اے۔
ایمل ولی خان نے آکھیا کہ حکومت نوں تمباکو نوں فصل قرار دینا چاہیدا اے، تمباکو اُگاؤن والے کسان مذاق بن کے رہ گئے نیں۔ مڈل مین 300 روپے فی کلو تمباکو خرید کے 700 روپے وچ فروخت کر رہیا اے۔ چیئرمین پی ٹی بی نے دَسیا کہ 45، 46 فیصد تمباکو درآمد ہوندا اے تے پی ٹی بی دے کل 17 ممبران نیں۔
کمیٹی نے تمباکو نوں بطور فصل شمار کرن لئی سب کمیٹی بنا دتی۔
کمیٹی نوں وفاقی وزیر رانا تنویر حسین نے دَسیا کہ پاکستان انٹرنیشنل آلیو کونسل دا ممبر بن چکیا اے، ایس سال 10 لاکھ پودے لائے جان گے۔
وزارت دے حکام نے دَسیا کہ اسی 80 ہزار ڈالر دا زیتون ایکسپورٹ کر رہے آں۔ پاکستان اٹلی، سپین تے ترکی توں پودے امپورٹ کردا رہیا اے، پر ہُن ساڈیاں اپنی نرسریاں وی پودے تیار کر رہیاں نیں۔
حکام نے دَسیا کہ زیتون دے پودے دی لائف ایک ہزار سال اے۔ اک ایکڑ اُتے 135 پودے لگدے نیں۔ اک پودے توں 413 کلو آئل حاصل ہویا اے۔
دنیش کمار نے اصلاحات تے زرعی پیداوار بارے سوال چکیا۔ شہادت اعوان نے گندم تے کپاس دی پیداوار وچ کمی اُتے تشویش دا اظہار کیتا۔ وفاقی وزیر رانا تنویر حسین نے اگلی میٹنگ وچ تقابلی جائزہ پیش کرن دی یقین دہانی کرائی۔
