قلت ہوئی تے پٹرول ہزار روپے لٹر وی نہیں ملے گا: دنیا وچ تیل دیاں قیمتاں 80 فیصد، پاکستان وچ 50 فیصد ودھیاں، لوکاں دیاں تکلیفاں اُتے سیاست نہ چمکائی جاوے: وزیرِ پٹرولیم

ہمسایہ مُلکاں وچ افراتفری ویکھی، شہباز شریف نے پٹرول دی قیمت دے اگے بند باندھ دِتا، پی ٹی آئی دوجیاں دے بچیاں نوں ایندھن نہ بنائے، اسلام آباد اُتے چڑھائی دی اجازت نہیں دیواں گے: علی پرویز ملک

پہلی بجلی وہیلنگ نیلامی دا آغاز، مجموعی طور اُتے 800 میگاواٹ نیلام کرن دا منصوبہ، ابتدائی طور اُتے نواں نظام صنعتی تے وڈے صارفین لئی نافذ ہووے گا، حکومت بجلی نہ ویچے گی نہ خریدے گی: اویس لغاری

لاہور وفاقی وزیر پٹرولیم علی پرویز ملک نے آکھیا کہ فی الحال مُلک وچ پٹرول دی کوئی قلت نہیں، تاہم جے قلت پیدا ہو گئی تے فی لٹر قیمت اک ہزار روپے تک وی جا سکدی اے۔ تیل دی قلت دی وجہ نال اسیں ہمسایہ مُلکاں وچ افراتفری ویکھی اے۔ سانوں نہیں پتا ایہ تنازع کدوں ختم ہووے گا، پر ایس تنازع دی وجہ نال دنیا وچ تیل دیاں قیمتاں وچ 80 فیصد تک اضافہ ہویا، جدوں کہ پاکستان وچ 50 فیصد اضافہ ہویا، جو حکومت دی کوشش نال ہی ممکن ہویا۔

سردیاں وچ عوام نوں گیس دی تنگی نہیں ہون دیواں گے، چاہے 3 کروڑ ڈالر دی بجائے 100 ملین ڈالر دی گیس منگوانی پئے۔ لاہور وچ میڈیا نال گل کردیاں علی پرویز ملک نے آکھیا کہ اک ذمہ دار وزیراعظم دے طور اُتے شہباز شریف نے پٹرول دی قیمت دے اگے بند باندھ دِتا اے۔ گزشتہ روز اک دن وچ 18 کروڑ روپے دے ٹوکن جاری کیتے گئے۔ جماعتِ اسلامی لوکاں دیاں تکلیفاں اُتے سیاست چمکاؤن توں گریز کرے۔ جماعتِ اسلامی دے وفد نوں دَس دِتا گیا سی کہ سانوں چیلنجز دا سامنا اے، کنواں اُتے کم شروع ہو گیا اے، تے اکتوبر وچ زیرِ سمندر تیل دی تلاش لئی ترکی دا جہاز پاکستان آ رہیا اے۔

وفاقی وزیر پٹرولیم نے آکھیا کہ حکومت وزیراعظم دی قیادت وچ مشکل حالات دے باوجود مُلک وچ پٹرولیم مصنوعات دی بلا تعطل فراہمی یقینی بناؤن لئی بھرپور کوششاں کر رہی اے۔

مشکل عالمی حالات وچ عوام نوں اکیلا نہیں چھڈاں گے تے پٹرولیم مصنوعات دی مسلسل فراہمی، توانائی دے تحفظ تے معاشی طور اُتے کمزور طبقیاں نوں ریلیف دین لئی سارے دستیاب وسائل بروئے کار لیاندے جان گے۔ انہاں آکھیا کہ پاکستان ایس وقت انتہائی نازک علاقائی صورتحال وچوں گزر رہیا اے۔ گزشتہ کئی مہینیاں توں عالمی سطح اُتے ایندھن دیاں قیمتاں وچ اضافے دے باعث پاکستان سمیت کئی مُلکاں نوں مشکلات دا سامنا اے۔

سعودی عرب دے توانائی دے بنیادی ڈھانچے تے تیل دی ترسیل نوں متاثر کرن والے حوثی حملیاں سمیت علاقائی کشیدگی نے عالمی تیل دی رسد تے قیمتاں اُتے براہِ راست اثر پایا اے۔ ریاست دے مفاد وچ جو کچھ ضروری ہویا اوہ کیتا جاوے گا۔ سستی سیاست دی بجائے ریاست دے مفادات تے قومی معیشت دے تحفظ نوں ترجیح دِتی جاوے گی۔

علی پرویز ملک نے آکھیا کہ موجودہ بحران کسے اک مُلک یا حکومت تک محدود نہیں بلکہ عالمی سطح اُتے توانائی دے شعبے نوں متاثر کر رہیا اے تے ڈیزل دیاں قیمتاں وچ غیر معمولی اضافہ ایس صورتحال دی عکاسی کردا اے۔

یکم مارچ نوں مُلک وچ پٹرول دی قیمت تقریباً 260 روپے، جدوں کہ ڈیزل دی قیمت 270 توں 280 روپے فی لٹر دے وچکار سی، تے اُس ویلے موجودہ جنگی صورتحال نہیں سی۔ انہاں مزید آکھیا کہ اوہ پی ٹی آئی والیاں نوں آکھن گے کہ حکومت دی مخالفت وچ دوجیاں دے بچیاں نوں ایندھن نہ بناؤن۔ اسلام آباد اُتے کسے نوں چڑھائی دی اجازت نہیں دیواں گے۔ علیمہ خان دی حراست دا علم نہیں، بلدیاتی نظام یا انتظامی یونٹاں اُتے اسمبلی وچ بحث کراں گے۔

دوجے پاسے یمن دے حوثیاں دی بحیرۂ احمر نال ملحقہ شہراں ول پیش قدمی تے سعودی عرب دیاں تیل تنصیبات اُتے حملیاں نے پاکستان دیاں تیل درآمدات نوں ہور پیچیدہ بنا دِتا اے۔ فروری وچ اسرائیل تے امریکہ دی ایران دے خلاف جنگ شروع ہون توں بعد آبنائے ہرمز عملی طور اُتے بند ہو گئی سی تے ایس دی بندش دے سبب دنیا بھر وچ تیل دیاں قیمتاں ودھن لگ پئیاں۔

اسلام آباد(نامہ نگار، اے پی پی، مانیٹرنگ ڈیسک) وفاقی حکومت نے بجلی دی خرید و فروخت دے عمل توں دستبردار ہون دا اعلان کردیاں مُلک دی پہلی وہیلنگ نیلامی لئی درخواست برائے تجاویز (آر ایف پی) جاری کر دِتی اے۔ ایس نظام دے تحت اگلے پنج سالاں وچ مجموعی طور اُتے 800 میگاواٹ بجلی نیلام کرن دا منصوبہ اے۔ پہلے مرحلے وچ 400 میگاواٹ بجلی مسابقتی بنیاداں اُتے فراہم کیتی جاوے گی۔

کمپیٹیٹو ٹریڈنگ بائی لیٹرل کنٹریکٹ مارکیٹ (سی ٹی بی سی ایم) دے تحت کاروباری تے صنعتی صارفین بجلی پیدا کرن والیاں کمپنیاں توں براہِ راست مسابقتی بنیاداں اُتے بجلی خرید سکّن گے۔

وفاقی وزیر توانائی سردار اویس احمد خان لغاری نے آکھیا کہ نویں نظام دے تحت بجلی پیدا کرن والے تے استعمال کرن والے آپس وچ لین دین کرن گے۔ وہیلنگ آکشن گائیڈ لائنز 2025 دے تحت اگلے پنج سالاں وچ مجموعی طور اُتے 800 میگاواٹ دی گنجائش نیلام کیتی جاوے گی، جدویں کہ 400 میگاواٹ پہلی نیلامی وچ پیش کیتی جا رہی اے۔

جاری اعلامیے دے مطابق وفاقی وزیر توانائی نے نیلامی دے عمل دے آغاز دا اعلان کردیاں آکھیا کہ تِن دہائیاں توں بجلی دی قیمت، آئی پی پیز تے واپڈا سمیت مختلف معاملے اُتے سوال وی اٹھدے رہے نیں، تے پاکستان دے مرکزی خریداری نظام نوں مسابقتی بجلی منڈی وچ تبدیل کرن دا مقصد زیرِ غور رہیا اے۔ موجودہ حکومت نے ایس مقصد نوں محض پالیسی عزم تک محدود رکھن دی بجائے اینوں عملی شکل دین دا عمل شروع کر دِتا اے۔

انہاں آکھیا کہ اج توں حکومت عملی طور اُتے بجلی دی خریداری دے عمل توں باہر نکل رہی اے۔ نویں نظام دے تحت حکومت نہ تے بجلی فروخت کرن دی مجاز ہووے گی تے نہ روایتی طریقے نال بجلی پیدا کرن والیاں توں بجلی خریدے گی۔ بجلی پیدا کرن والے تے اینوں استعمال کرن والے براہِ راست بجلی خرید تے فروخت کر سکّن گے تے ایہ نظام شفافیت تے مسابقت دی بنیاد اُتے کم کرے گا۔

ابتدائی طور اُتے ایہ نظام صنعتی تے وڈے صارفین، خاص طور اُتے اک میگاواٹ توں ودھ بجلی استعمال کرن والے صارفین لئی نافذ کیتا جاوے گا۔ وفاقی وزیر توانائی نے آکھیا کہ ایس وقت پاکستان وچ بجلی حکومت خرید دی اے تے اپنے ترسیلی نظام دے ذریعے صارفین تک پہنچاندی اے، تاہم وہیلنگ نیلامی دے تحت بجلی پیدا کرن والے تے استعمال کرن والے صارفین آپس وچ براہِ راست بجلی دی خرید و فروخت کر سکّن گے۔

مستقبل وچ عام صارف وی اپنی پسند دے مطابق بجلی خریدن دے قابل ہو سکے گا۔ شفاف طریقۂ کار دے تحت صارفین اپنی ضرورت دے مطابق سستی بجلی خرید سکّن گے۔ اویس لغاری نے آکھیا کہ ایہ نظام بتدریج وسعت اختیار کرے گا تے اگلے کجھ سالاں وچ عام صارفین، جنہاں وچ 200 تے 400 یونٹ بجلی استعمال کرن والے صارفین وی شامل نیں، تک ایس دے فائدے پہنچن گے۔ بجلی دے اخراجات وچ کمی نال پاکستانی مصنوعات دیاں برآمدات وچ وی مدد ملے گی۔