افغانستان نال ملحقہ سرحدی علاقیاں وچ دہشتگرداں دے ٹھکانیاں اُتے فضائی حملے، 28 ہلاک

دہشتگردی دا خطرہ افغانستان توں جنم لے رہیا، فوج نے ٹھکانیاں نوں انتہائی درستی نال نشانہ بنایا، خودکش بمباراں دا تربیتی مرکز، اسلحہ تے گولہ بارود تباہ کر دتا: وزارت اطلاعات

خیبرپختونخوا دے علاقیاں کوہاٹ، ہنگو تے ٹل وچ زمینی کارروائی، 9 خوارج مارے گئے، بلوچستان وچ آپریشن ردالفتنہ 3 دے تحت فتنہ الہندوستان دے 4 دہشتگرد ہلاک

اسلام آباد، کوئٹہ سکیورٹی فورسز نے خیبرپختونخوا دے 3 شہراں تے سرحدی علاقیاں وچ زمینی تے فضائی کارروائی کردیاں 37 دہشتگرد ہلاک کر دتے۔

وفاقی وزارت اطلاعات و نشریات مطابق پاکستان دے اندر، خصوصی طور اُتے خیبرپختونخوا دے بےگناہ عوام خلاف ہون والے متعدد دہشتگرد حملیاں توں بعد سکیورٹی فورسز نے کوہاٹ، ہنگو تے ٹل دے علاقیاں وچ اک منظم انٹیلی جنس بیسڈ زمینی آپریشن کیتا، جس توں بعد دہشتگرد تنظیمیں دے ٹھکانیاں تے محفوظ پناہ گاہاں خلاف محدود تے ہدفی فضائی حملے کیتے گئے۔

وزارتِ اطلاعات و نشریات ولوں جاری کیتے گئے بیان وچ دَسیا گیا کہ کوہاٹ، ہنگو تے ٹل وچ 20 ستمبر نوں کیتی گئی زمینی کارروائی دوران 9 خوارج مارے گئے۔

افغانستان نال ملحقہ سرحدی علاقے وچ دہشتگرداں دے ٹھکانیاں نوں وی نشانہ بنایا گیا۔ فتنہ الخوارج تے اوہناں نال وابستہ دہشتگرداں دے 3 ٹھکانے تباہ کر دتے گئے۔

وزارت اطلاعات مطابق خودکش بمباراں دا تربیتی مرکز وی کارروائی وچ تباہ کر دتا گیا۔ ایس آپریشن وچ متعدد خودکش بمباراں سمیت 28 دہشتگرد مارے گئے۔ دہشتگرداں دے ٹھکانیاں وچ موجود اسلحے تے گولہ بارود دا ذخیرہ وی تباہ کر دتا گیا۔

بیان وچ آکھیا گیا اے کہ پاکستان نوں درپیش دہشتگردی دا خطرہ افغانستان توں جنم لے رہیا اے۔ پاکستان وچ شہریاں دی حفاظت تے سلامتی اولین ترجیح اے۔ دہشتگرداں دے مراکز نوں انتہائی درستی نال نشانہ بنایا گیا۔

وزارتِ اطلاعات مطابق کارروائی دوران کسے وی قسم دے جانی تے مالی نقصان توں بچن لئی زیادہ توں زیادہ احتیاط کیتی گئی۔ عزمِ استحکام دے تحت انسدادِ دہشتگردی مہم غضب للحق پوری رفتار نال جاری رہے گی۔ غیرملکی سرپرستی تے حمایت یافتہ دہشتگردی دا ملک توں مکمل خاتمہ کیتا جائے گا۔

سکیورٹی ذرائع مطابق بلوچستان وچ آپریشن ردالفتنہ 3 دے تحت پنجگور دے علاقے اپھان کوہ، پروم وچ فتنہ الہندوستان نال تعلق رکھن والے 4 دہشتگرد ہلاک کر دتے گئے۔

کارروائی دوران فورسز تے علاقے وچ موجود دہشتگرداں وچکار شدید فائرنگ دا تبادلہ ہویا۔ ہلاک دہشتگرداں دے قبضے توں وڈی مقدار وچ جدید اسلحہ تے گولہ بارود وی برآمد کیتا گیا۔

سکیورٹی ذرائع مطابق دہشتگرداں خلاف کارروائیاں بدستور جاری نیں تے علاقے وچ کلیئرنس آپریشن وی کیتا جا رہیا اے۔