سندھ وچ سزا دا تصور ہی نہیں، قتل دیاں ایف آئی آرز وچ تاخیر ناقابلِ قبول: سپریم کورٹ
بس بہت ہو گیا، وڈیرے دی اجازت والا سلسلہ بند، فوری ایف آئی آر درج کیتی جاوے: جسٹس صلاح الدین، سفارشاں طلب، بیرون ملک بھجوان لئی کروڑاں دے فراڈ، رشوت دے الزام اُتے پشاور توں گرفتار ڈائریکٹر امیگریشن تے ڈرائیور دی ضمانت
اسلام آباد سپریم کورٹ نے سندھ وچ قتل دے مقدمیاں دی ایف آئی آر درج کرن وچ تاخیر اُتے سخت تشویش دا اظہار کردے ہوئے آئی جی تے پراسیکیوٹر جنرل سندھ توں اک ہفتے وچ تحریری سفارشاں طلب کر لئیاں۔ جسٹس ہاشم کاکڑ نے ریمارکس دِتے کہ دو تین دن دی تاخیر نال ایف آئی آر درج ہووے گی تاں ملزمان دی بریت ہووے گی، سندھ وچ سزا دا تصور ہی نہیں، قتل کیسز دی ایف آئی آر وچ تاخیر ناقابلِ قبول اے۔
جسٹس صلاح الدین پہنور نے آکھیا کہ گھناونے جرائم وچ فوری ایف آئی آر درج کیتی جاوے، ایف آئی آر درج کرن لئی اجازت لین دا سلسلہ بند کیتا جاوے۔ ملزم بااثر ہووے تاں روزنامچہ بند ہو جاندا اے۔ صاحب بہادر بیٹھے نیں، فریادی اوہی کہے گا جو تسی آکھو گے۔ قتل کیس وچ وڈیرے دی اجازت دا انتظار ہوندا اے۔ بہت ہو گیا، ایس پالیسی نوں چھڈو، گھناونے جرائم وچ فوری ایف آئی آر درج کرو۔ پولیس نوں ایف آئی آر درج کرن وچ تاخیر دی اجازت نہیں ہونی چاہیدی۔
جسٹس ہاشم کاکڑ نے واقعے دی اطلاع ملدے ہی ایف آئی آر درج کرن دا ایس او پی جاری کرن دی ہدایت کردے ہوئے ایف آئی آر وچ تاخیر اُتے ایس ایچ او تے ڈی ایس پی خلاف محکمانہ کارروائی دی تجویز دِتی۔ عدالت نے تاخیر نال ایف آئی آر دے معاملے اُتے آئی جی سندھ توں واضح تے دوٹوک پالیسی طلب کر لئی۔ جسٹس صلاح الدین پہنور نے آئی جی سندھ نال مکالمہ کردے ہوئے آکھیا، ’’جے ہتھ بندھے نیں تاں اسی انہاں نوں کھولنا چاہندے آں۔‘‘ مزید سماعت 6 اکتوبر تک ملتوی کر دِتی گئی۔
ادھر سپریم کورٹ نے شہریاں نوں بیرون ملک بھجوان دا جھانسہ دے کے کروڑاں روپے فراڈ کرن دے الزام وچ گرفتار ملزم محمد جہانزیب دی ضمانت منظور کر لئی۔
مزید براں سپریم کورٹ نے پشاور توں رشوت لین دے الزام وچ گرفتار ڈائریکٹر امیگریشن فرخ جمال صدیقی تے انہاں دے ڈرائیور محمد حکیم دی ضمانت وی منظور کر لئی۔
