ہسپتالاں وچ روایتی سرنجاں دے استعمال تے خرید اُتے پابندی
ڈسپوزیبل سرنجاں، انفیوژن تے ڈرپ سیٹ تے کینولاواں دی ری سائیکلنگ روکّن دی ہدایت، اک انجکشن کئی مریضاں نوں لانا ممنوع، پنجاب ہیلتھ کیئر کمیشن ولّوں ہیلتھ فسیلیٹیز نوں مراسلہ
لاہور پنجاب ہیلتھ کیئر کمیشن نے وڈا فیصلہ کردیاں پنجاب بھر دے ہسپتالاں وچ روایتی سرنجاں دے استعمال تے خرید اُتے پابندی لا دِتّی اے۔ یکم جنوری 2027 توں 10 سی سی تک دیاں روایتی سرنجاں دا استعمال بند کر دِتا جاوے گا، تے یکم جنوری توں صرف سنگل یوز سرنجاں ہی استعمال کیتیاں جا سکن گیاں۔
ہیلتھ فسیلیٹیز نوں لکھے گئے مراسلے دے مطابق طبی فضلے نوں ٹھکانے لاؤن دا مؤثر انتظام یقینی بنایا جاوے۔ سنگل یوز ڈسپوزیبل اشیا، جنہاں وچ سرنجاں، انفیوژن تے ڈرپ سیٹ تے کینولا شامل نیں، دی ری سائیکلنگ مکمل طور اُتے روک دِتّی جاوے۔
متعدی بیماریاں دے پھیلاؤ نوں روکّن لئی سرنجاں تے ڈرپ سیٹ دوبارہ استعمال نہیں کیتے جان گے۔ اک انجکشن کئی مریضاں نوں لانا سختی نال ممنوع قرار دِتا گیا اے۔
مراسلے دے مطابق سارے ہسپتالاں تے کلینکاں دی انتظامیہ اِنہاں ہدایات اُتے سختی نال عمل کرے۔ پنجاب ہیلتھ کیئر کمیشن ہسپتالاں، کلینکاں تے ہیلتھ فسیلیٹیز دی انسپکشن کرے گا۔ خلاف ورزی دی صورت وچ پنجاب ہیلتھ کیئر کمیشن ایکٹ 2010 دے تحت کارروائی کیتی جاوے گی۔
