وزیراعظم دی یقین دہانی اُتے جماعتِ اسلامی دا لانگ مارچ ملتوی0
شہباز شریف نے وطن واپسی اُتے پٹرولیم لیوی دے مسئلے دا حل کڈھن دا وعدہ کیتا اے، دھرنے جاری رہن گے: حافظ نعیم
حکومت نوں آخری موقع دے رہے آں، مطالبہ تسلیم نہ ہویا تاں اسلام آباد مارچ دا ملتان توں ہی آغاز ہووے گا: امیر جماعتِ اسلامی
ملتان جماعتِ اسلامی پاکستان نے پٹرولیم لیوی دے خلاف کراچی توں 20 ستمبر نوں شروع کیتے گئے اسلام آباد ول ٹرین مارچ نوں ملتان پہنچ کے اکتوبر دے پہلے ہفتے تک لئی ملتوی کرن دا اعلان کر دِتا۔
ایس حوالے نال امیر جماعتِ اسلامی پاکستان حافظ نعیم الرحمن نے ملتان وچ پریس کانفرنس کردیاں آکھیا کہ وزیراعظم شہباز شریف نے نیویارک توں فون کرکے اُنہاں نوں اسلام آباد لانگ مارچ ملتوی کرن دی درخواست کیتی تے وعدہ کیتا کہ وطن واپسی اُتے پہلی فرصت وچ جماعتِ اسلامی دی قیادت نال ملاقات کرکے لیوی دے مسئلے دا کوئی نہ کوئی حل کڈھن گے۔
اُنہاں آکھیا کہ وزیراعظم دی درخواست اُتے لانگ مارچ اکتوبر دے پہلے ہفتے تک ملتوی کر دِتا اے، تاہم پٹرولیم لیوی دے خلاف ملک گیر دھرنے تے احتجاجی کیمپ جاری رہن گے۔
اُنہاں مزید آکھیا کہ کراچی توں روہڑی تے روہڑی توں ملتان تک ٹرین مارچ کیتا، عوامی مسئلےآں لئی ڈٹ کے کھڑے آں۔ پٹرولیم دیاں قیمتاں دی وجہ نال ملک وچ بدترین صورتحال اے۔ حکومت عوام توں لیوی دی مد وچ بھتہ وصول کر رہی اے۔ پٹرول دی قیمت تے ٹیکس وصول کرکے حکومت اپنی کرپشن چھپاندی اے۔
امیر جماعتِ اسلامی نے آکھیا کہ حکومت حالات بارے جو مرضی آکھے، اسی نہیں رکاں گے۔ لانگ مارچ اکتوبر دے پہلے ہفتے تک ملتوی کیتا اے۔ ساڈا ایجنڈا فساد یا جھگڑا نہیں بلکہ عوام نوں ریلیف دینا اے۔ وزیراعظم جلدی وطن واپس آون، اُنہاں نال گل بات کراں گے۔
حافظ نعیم الرحمن نے آکھیا کہ وزیراعظم نے ریلیف دِتا تاں ٹھیک، ورنہ لانگ مارچ جاری رہوے گا۔ ملتان وچ ساڈا پڑاؤ اے، ریلیف نہ ملن دی صورت وچ لانگ مارچ اگے ودھے گا۔ ملاقات وی کراں گے تے گل بات وی، حکومت توں تحریری یقین دہانی لاواں گے۔ حکومت نوں عوام نوں ریلیف دین دا آخری موقع دے رہے آں۔
اُنہاں آکھیا کہ وزیراعظم شہباز شریف دی درخواست تے لیوی دے معاملے دا کوئی نہ کوئی حل کڈھن دے وعدے اُتے جماعتِ اسلامی نے کجھ دن لئی اسلام آباد ول روانگی وچ وقفہ دین دا فیصلہ کیتا اے۔
حافظ نعیم الرحمن نے پریس کانفرنس دوران واضح کیتا کہ وزیراعظم نال ملاقات وچ پٹرولیم لیوی ختم نہ ہوئی تاں اسلام آباد مارچ دا فوری آغاز ملتان توں ہی ہو جائے گا۔
امیر جماعتِ اسلامی نے آکھیا کہ جماعتِ اسلامی دا احتجاج پُرامن اے۔ اسی لیوی دے خلاف 510 مقامات اُتے سڑکاں بند کیتیاں تے 16 اگست نوں دھرنے شروع کیتے، جیہڑے ملک دے 42 مقامات اُتے جاری نیں۔
مذاکرات دے کئی دوراں وچ حکومت نوں جماعتِ اسلامی دی کمیٹی نے لیوی دے خاتمے لئی تجاویز دِتیاں، پر حکومت ولوں مسلسل ٹال مٹول ہُندی رہی، جس توں بعد جماعتِ اسلامی نے ٹرین مارچ شروع کیتا۔
ٹرین مارچ دو مرحلاں اُتے مشتمل سی۔ دوجے مرحلے دے ملتان وچ اختتام اُتے وزیراعظم نے اُنہاں نوں فون کیتا۔ وزیراعظم نوں دَس دِتا گیا کہ جماعتِ اسلامی دا واحد مطالبہ پٹرولیم لیوی دا خاتمہ اے۔
حافظ نعیم الرحمن نے آکھیا کہ جماعتِ اسلامی پی ٹی آئی دے احتجاج دی حمایت کردی اے تے ایس دے خلاف کریک ڈاؤن دی مذمت کردی اے۔ حکومت علامہ راجہ ناصر عباس ولوں دِتی گئی تجویز نوں سنجیدگی نال لے تے پی ٹی آئی نال مذاکرات دے ذریعے مسئلے دا حل کڈھے۔
