پی ٹی آئی ہوش دے ناخن لے، نہیں تے جو کراں گے یاد رہ جائے گا: عطا تارڑ
عمران دی بھیناں نوں امن و امان خراب کرن دی مصدقہ اطلاع اُتے گرفتار کیتا گیا، بیرسٹر گوہر دی تے پی ٹی آئی وچ کوئی نہیں سندا، گل کرنی اے تے کس نال کرن؟
پشاور (مانیٹرنگ ڈیسک) وفاقی وزیر اطلاعات و نشریات عطا تارڑ نے آکھیا اے کہ پی ٹی آئی والے ہوش دے ناخن لین، نہیں تے انہاں نال جو ہووے گا اوہ ہمیشہ یاد رکھن گے، انہاں نوں اسلام آباد آ کے امن خراب کرن دی اجازت نہیں دیواں گے۔
پشاور وچ میڈیا نال گل کردیاں وزیر اطلاعات نے آکھیا کہ انسدادِ دہشت گردی دی مد وچ این ایف سی ایوارڈ دے تحت ہر سال خیبرپختونخوا حکومت نوں حصہ دِتا جاندا اے۔ ڈیڑھ سو ارب توں اُتے دی رقم لا اینڈ آرڈر اُتے کتھے لگی، کوئی دَس سکدا اے؟
مزید آکھیا کہ ایہ کہندے نیں ساڈا مینڈیٹ قیدی نوں رہا کرانا اے، کی ڈویلپمنٹ مینڈیٹ نہیں اے؟ انہاں نے آکھیا کہ اسلام آباد ہائی کورٹ دے واضح احکامات نیں کہ شہریاں دی آمدورفت وچ کوئی خلل نہیں پایا جائے گا۔ اک دھرنے نال تاجراں نوں 120 ارب روپے دا نقصان ہوندا اے۔ پی ٹی آئی نے نوجواناں دی غلط ذہن سازی کیتی اے۔
دریں اثنا ٹی وی نال گل کردیاں وزیر اطلاعات نے آکھیا کہ کچھ وی ہو جائے، اسی انہاں نوں اسلام آباد وچ امن و امان خراب نہیں کرن دیواں گے۔ اج تک اسی پی ٹی آئی نوں پُرامن احتجاج کردیاں نہیں ویکھیا۔ ایہ ہوش دے ناخن لین، نہیں تے انہاں نال جو کراں گے، اوہ ہمیشہ یاد رکھن گے۔
عطا تارڑ نے آکھیا کہ عمران خان دیاں بھیناں نوں مصدقہ اطلاع اُتے گرفتار کیتا گیا کہ اوہ امن و امان خراب کرن گیاں نیں۔ انہاں نے آکھیا کہ پی ٹی آئی وچ گل کرنی اے تے کس نال کرن؟ انہاں دے ہاں انچارج تے فیصلہ ساز کون اے؟ بیرسٹر گوہر فارغ نیں، پی ٹی آئی وچ انہاں دی کوئی نہیں سندا۔ ایہ جو دو تین بندے کہندے نیں گل کر لو، انہاں دے پلے کی اے؟ انہاں نال مذاکرات دا کوئی جواز تے فائدہ نہیں، انہاں دی زبان اُتے اعتبار نہیں اے۔
