افغانستان وچ پاکستان دے 10 تھاواں اُتے جوابی ڈرون حملے: کسے وی کارروائی دا فوری جواب دِتا جاوے گا: وفاقی وزیر اطلاعات

ڈرون ذخیرہ تے لانچ کرن والے تھاواں نوں درستگی نال نشانہ بنایا: عطا تارڑ، گلستان سیکٹر وچ افغان طالبان دی دراندازی دی کوشش ناکام، متعدد ہلاک، آخری اطلاعات تک فائرنگ جاری، فورسز دا شمالی وزیرستان وچ آپریشن، خوارج دے ٹھکانے تباہ، 8 دہشتگرد ہلاک، اسلحہ تے گولہ بارود برآمد، پشاور وچ فائرنگ دا تبادلہ، اک پولیس اہلکار شہید، 2 زخمی، حملہ آور ماریا گیا

راولپنڈی، اسلام آباد پاکستان نے 23 ستمبر نوں افغان سرزمین توں آؤن والے ڈرونز دی دراندازی اُتے دہشتگرداں نوں انہاں دی زبان وچ جواب دِتا۔ پاکستان نے دفاعِ وطن دے حق نوں استعمال کردیاں افغانستان وچ ڈرونز دے لانچنگ تے ذخیرہ کرن لئی استعمال ہون والے 10 تھاواں اُتے فضائی تے ڈرون حملے کیتے۔

وفاقی وزیر اطلاعات عطا اللہ تارڑ نے آکھیا کہ افغانستان وچ کیتے گئے جوابی حملے درست، متناسب تے محدود نوعیت دے سن۔ کسے وی کارروائی دا فوری تے فیصلہ کن جواب دِتا جاوے گا۔ اوہناں آکھیا کہ پاکستان 23 ستمبر نوں افغان سرزمین توں پاکستان وچ ڈرونز دے ذریعے کیتی گئی دانستہ تے غیر قانونی دراندازی دی شدید ترین الفاظ وچ مذمت کردا اے۔ ایہ پاکستان دی خودمختاری تے علاقائی سالمیت دی کھلی خلاف ورزی تے جارحیت دی اک سنگین تے ناقابلِ قبول کارروائی اے۔

عطا اللہ تارڑ نے آکھیا کہ پاکستان پچھلے کئی برسوں توں افغان طالبان حکومت تے اس دے متعلقہ فریقان نوں افغان سرزمین اُتے دہشتگرداں دیاں پناہ گاہاں تے انہاں دے معاون نیٹ ورکس دی مسلسل موجودگی بارے اپنی شدید تشویش توں آگاہ کردا رہیا اے۔

اوہناں آکھیا کہ افغان سرزمین نوں پاکستان خلاف دہشتگردی لئی استعمال کرن والے عناصر دے خلاف نیٹ ورکس نوں ختم کرن تے قابلِ اعتماد تے قابلِ تصدیق اقدامات کرن دی بجائے افغان طالبان حکومت نے پاکستان خلاف دشمنانہ ڈرون کارروائیاں دے ذریعے صورتحال نوں ہور کشیدہ کرن دا راستہ اختیار کیتا اے۔

اوہناں مزید آکھیا کہ پاکستان دے فضائی دفاعی نظام نے سارے درانداز ڈرونز دا بروقت سراغ لایا، انہاں نوں ٹریک کیتا تے انہاں دے مقررہ اہداف تک پہنچن توں پہلاں ہی ناکارہ بنا دِتا، جس دے نتیجے وچ حملے دی کوشش مکمل طور اُتے ناکام بنا دِتی گئی۔

وفاقی وزیر نے دسیا کہ اپنے دفاع دے حق دے استعمال وچ پاکستان نے افغانستان وچ ایسے 10 تھاواں اُتے درست تے محدود فضائی تے ڈرون حملے کیتے، جتھوں ایہ ڈرونز لانچ تے ذخیرہ کیتے جاندے سن۔ اوہناں مطابق ایہ حملے درست، متناسب تے محدود نوعیت دے سن تے صرف انہاں مخصوص فوجی اہداف تک محدود رہے جو پاکستان خلاف ہون والے حملیاں دی کوشش نال براہِ راست منسلک سن۔

اوہناں دسیا کہ پاکستان افغان سرزمین توں ہون والے حملیاں نوں، چاہے اوہ دہشتگرد گروہاں ولوں ہون یا خود افغان طالبان حکومت ولوں، نہ قبول کرے گا تے نہ برداشت کرے گا۔ پاکستان دی خودمختاری دی کسے وی خلاف ورزی دا فوری تے فیصلہ کن جواب دِتا جاوے گا۔

وزیر اطلاعات نے آکھیا کہ پاکستان افغان طالبان حکومت توں مطالبہ کردا اے کہ اوہ فوری طور اُتے پاکستان خلاف ساریاں دشمنانہ سرگرمیاں بند کرے تے اپنی بین الاقوامی ذمہ واریاں پوری کردیاں افغان سرزمین توں سرگرم دہشتگرد عناصر خلاف مؤثر، ٹھوس، قابلِ تصدیق تے مستقل اقدامات کرے۔ افغان سرزمین نوں پاکستان خلاف حملے یا دشمنانہ کارروائیاں کرن لئی استعمال نہیں کیتا جانا چاہیدا۔

دریں اثناء پاک افغان سرحدی علاقے گلستان سیکٹر وچ افغان طالبان ولوں پاکستانی حدود وچ داخل ہون تے جارحیت دی کوشش نوں سکیورٹی فورسز نے ناکام بنا دِتا۔ سکیورٹی ذرائع دے مطابق افغان طالبان ولوں جارحیت دی کوشش اُتے سکیورٹی فورسز نے بروقت تے مؤثر جوابی کارروائی کیتی، جس دے نتیجے وچ متعدد افغان طالبان ہلاک ہوئے۔ آخری اطلاعات تک سکیورٹی فورسز تے افغان طالبان وچ فائرنگ دا سلسلہ وقفے وقفے نال جاری رہیا۔

علاوہ ازیں شمالی وزیرستان وچ سکیورٹی فورسز دے آپریشن دوران 8 دہشتگرد مارے گئے۔ سکیورٹی ذرائع دے مطابق فورسز نے شمالی وزیرستان وچ انٹیلی جنس بیسڈ آپریشن کیتا، جس دوران دہشتگرداں دے ٹھکانے مکمل طور اُتے تباہ کر دِتے گئے۔

سکیورٹی ذرائع دا کہنا اے کہ آپریشن وچ 8 دہشتگرداں نوں ہلاک کر دِتا گیا، جنہاں دے قبضے توں بھاری مقدار وچ اسلحہ، گولہ بارود تے ہور سامان وی برآمد کیتا گیا اے۔ سکیورٹی ذرائع مطابق خوارج نے فورسز توں بچن لئی مسجد نوں بطور ڈھال استعمال کرن دی کوشش کیتی، تاہم فورسز نے مسجد دے تقدس نوں ملحوظِ خاطر رکھدیاں مہارت نال خوارج نوں نشانہ بنایا۔

سکیورٹی فورسز خیبرپختونخوا توں فتنۃ الخوارج دے دہشتگرداں دے مکمل خاتمے لئی پُرعزم نیں۔

علاوہ ازیں پشاور وچ وارسک روڈ اُتے پولیس تے حملہ آوراں وچ فائرنگ دا تبادلہ ہویا۔ ایس دوران اک پولیس اہلکار شہید تے 2 زخمی ہو گئے، جبکہ جوابی کارروائی وچ اک حملہ آور ماریا گیا۔ زخمی پولیس اہلکاراں نوں ہسپتال منتقل کر دِتا گیا اے۔ علاقے وچ سرچ آپریشن جاری اے۔