فیلڈ مارشل عاصم منیر نال مالدیپ دے سپیکر دی ملاقات، تعاون ودھاؤن دا عزم
برادرانہ تعلقات نوں انتہائی قدر دی نگاہ نال ویکھدے آں: چیف آف ڈیفنس فورسز
راولپنڈی (خصوصی نیوز رپورٹر) مالدیپ دے سپیکر نے جی ایچ کیو دا دورہ کیتا تے فیلڈ مارشل عاصم منیر نال گل بات کیتی۔ پاک فوج دے شعبہ تعلقاتِ عامہ (آئی ایس پی آر) دے مطابق مالدیپ دی عوامی مجلس دے سپیکر عبدالرحیم عبداللہ تے چیف آف ڈیفنس فورسز عاصم منیر وچ ملاقات دوران باہمی دلچسپی دے امور، علاقائی سلامتی تے دوطرفہ تعاون اُتے تبادلۂ خیال کیتا گیا۔
فیلڈ مارشل نے مالدیپ نال برادرانہ تعلقات نوں اہمیت دین دا اعادہ کردیاں آکھیا کہ پاکستان مالدیپ نال اپنے برادرانہ تعلقات نوں انتہائی قدر دی نگاہ نال ویکھدا اے۔ اوہناں دوناں ملکاں دے باہمی مفاد اُتے مبنی تعلقات نوں ہور مضبوط بناؤن دے عزم دا اظہار کیتا۔
عبدالرحیم عبداللہ نے علاقائی امن تے استحکام دے فروغ وچ پاکستان دے تعمیری کردار نوں سراہیا۔ ملاقات دوران دوطرفہ روابط نوں ہور مضبوط کرن تے باہمی دلچسپی دے شعبیاں وچ تعاون ودھاؤن دی خواہش دا اظہار کیتا گیا۔
