کورنگی فشریز ہاربر اُتے 100 ایکڑ رقبے وچ میری کلچر اسٹیٹ قائم کرن دا منصوبہ
برآمدات وچ اضافہ، ترقی تے ساحلی علاقیاں وچ معاشی سرگرمیاں نوں فروغ ملے گا، فش فارمنگ، پراسیسنگ تے ویلیو ایڈیشن دیاں جدید سہولتاں فراہم کیتیاں جان گیاں: جنید انور
اسلام آباد (خصوصی نیوز رپورٹر) کورنگی فشریز ہاربر اُتے میری کلچر اسٹیٹ دا منصوبہ بلیو اکانومی دے فروغ ول اک اہم قدم قرار دِتا جا ریا اے۔ وفاقی وزیرِ بحری امور محمد جنید انور چودھری نے کورنگی فشریز ہاربر اُتے 100 ایکڑ اُتے محیط میری کلچر انویسٹمنٹ اینڈ ڈویلپمنٹ اسٹیٹ قائم کرن دا منصوبہ پیش کیتا اے۔ کورنگی فشریز ہاربر کراچی وچ ماہی گیری تے فشریز نال متعلق سرگرمیاں لئی اک اہم بندرگاہ دے طور اُتے کم کر ریا اے۔
مجوزہ میری کلچر اسٹیٹ وچ فش فارمنگ، ہیچریز، تحقیق، پراسیسنگ تے ویلیو ایڈیشن دیاں جدید سہولتاں فراہم کیتیاں جان گیاں۔ منصوبے وچ 30 ایکڑ اُتے میری کلچر زون، 20 ایکڑ اُتے ہیچری زون، 20 ایکڑ اُتے ایکوا ریسرچ پارک تے 20 ایکڑ اُتے کمرشل ڈسٹرکٹ قائم کرن دی تجویز اے۔
میری کلچر اسٹیٹ وچ کولڈ چین، کمرشل سہولتاں، جدید انفراسٹرکچر تے پائیدار ترقی دے نظام وی قائم کیتے جان گے۔ ایس نال فشریز دے شعبے نوں جدید خطوط اُتے استوار کرن، برآمدات ودھاؤن تے ساحلی علاقیاں وچ معاشی سرگرمیاں نوں فروغ ملے گا۔
