ایم ڈی کیٹ دے نتائج، 37 ہزار توں ودھ ایم بی بی ایس لئی اہل
بی ڈی ایس لئی 50 فیصد گھٹ توں گھٹ نمبراں دے معیار اُتے 40 ہزار توں ودھ کامیاب، 47 ہزار 475 امیدواراں دی شرکت، نتائج یو ایچ ایس دی ویب سائٹ اُتے جاری
لاہور (ہیلتھ رپورٹر) یونیورسٹی آف ہیلتھ سائنسز لاہور نے ایم ڈی کیٹ 2026 دے نتائج دا اعلان کر دِتا اے۔ یو ایچ ایس دے مطابق ایم ڈی کیٹ 2026 دا امتحان 20 ستمبر نوں پنجاب بھر وچ منعقد ہویا سی، جِس وچ مجموعی طور اُتے 47 ہزار 475 امیدواراں نے شرکت کیتی۔
نتائج دے مطابق ایم ڈی کیٹ وچ 170 توں 180 دے درمیان نمبر حاصل کرن والے امیدواراں دی تعداد 1772 اے، جدویں 160 توں 169 تک نمبر حاصل کرن والے 6682 امیدوار کامیاب قرار دتے گئے نیں۔
اِسی طرح 150 توں 159 نمبر لین والے امیدواراں دی تعداد 6260 اے، 140 توں 149 تک نمبر لین والے 5357 نیں، 130 توں 139 تک نمبر لین والے 4939 نیں، 120 توں 129 تک نمبر لین والے 4382 نیں، 110 توں 119 تک نمبر لین والے 4188 نیں، 100 توں 109 تک نمبر لین والے 3766، 90 توں 99 نمبر لین والے 3111 تے 89 یا اس توں گھٹ نمبر حاصل کرن والے امیدواراں دی تعداد 7018 اے۔
یو ایچ ایس دے مطابق ایم بی بی ایس لئی 55 فیصد گھٹ توں گھٹ نمبراں دے معیار اُتے 37 ہزار 708 امیدوار اہل قرار پائے نیں تے ایم بی بی ایس لئی ایم ڈی کیٹ 2026 دا کوالیفائنگ تناسب 79.43 فیصد ریا۔
جدویں بی ڈی ایس لئی 50 فیصد گھٹ توں گھٹ نمبراں دے معیار اُتے 40 ہزار 457 امیدوار اہل قرار پائے نیں تے بی ڈی ایس لئی کوالیفائنگ تناسب 85.22 فیصد ریا۔
یو ایچ ایس نے دَسیا کہ ایم ڈی کیٹ 2026 دے نتائج یونیورسٹی آف ہیلتھ سائنسز لاہور دی ویب سائٹ اُتے ویکھے جا سکدے نیں۔
