لاہور وچ کورونا فیر سر چکّن لگ پیا، مثبت کیسز سامنے آ گئے
کورونا، انفلوئنزا، فلو وائرس توں متاثر افراد نوں بخار، کھانسی، نزلہ، جسم درد دی شکایت، کورونا ویرینٹس دی شدت گھٹ ہو سکدی اے، علامات نوں نظرانداز نہ کیتا جاوے: پروفیسر سائرہ
لاہور (بلال چودھری) لاہور وچ کورونا دے مختلف ویرینٹس، انفلوئنزا تے فلو وائرس نال شہری متاثر ہون لگ پئے نیں، بخار، کھانسی، نزلہ، گلے تے جسم وچ درد دیاں شکایتاں وچ اضافہ ویکھن نوں مل ریا اے۔
ڈین انسٹی ٹیوٹ آف پبلک ہیلتھ پروفیسر سائرہ افضل دا کہنا اے کہ کورونا تے فلو دیاں علامات وچ مماثلت اے تے صرف علامات دی بنیاد اُتے حتمی تشخیص مشکل اے۔ فلو دے مریضاں وچ کورونا دی تشخیص لئی ریپڈ ٹیسٹنگ کیتی جا رہی اے، جِس وچ کورونا دے مثبت کیسز وی سامنے آ رہے نیں۔
اُنہاں نے آکھیا کہ کورونا دے مختلف ویرینٹس پہلے دے مقابلے وچ گھٹ شدت والے ہو سکدے نیں، تاہم علامات نوں نظرانداز نہ کیتا جاوے۔ کورونا تے فلو دونے سانس دیاں بیماریواں دیاں علامات پیدا کر سکدے نیں، ایس لئی فلو دیاں علامات ظاہر ہون اُتے شہری آپ تشخیص کرن دی بجائے ڈاکٹر نال رجوع کرن۔
طبی ماہرین دا کہنا اے کہ فلو توں بچاؤ لئی موسمی انفلوئنزا ویکسین لگوانی چاہیدی اے، جڑی بیماری دی شدت تے پیچیدگیاں دے خطرے نوں گھٹ کرن وچ مددگار اے۔
بزرگ، حاملہ خواتین تے دائمی بیماریواں دے شکار افراد فلو تے کورونا توں خصوصی احتیاط کرن۔ ماہرین نے ہدایت کیتی اے کہ کورونا تے فلو توں بچاؤ لئی رش والی جگہاں اُتے احتیاط برتی جاوے، ہتھاں دی صفائی دا خیال رکھیا جاوے تے بیمار ہون دی صورت وچ فاصلہ رکھیا جاوے۔
طبی ماہرین دے مطابق کورونا ویکسین تے موسمی فلو ویکسین اکّو دن وی لگوائیاں جا سکدیاں نیں۔
