پاک بحریہ دی آبدوز ہانگور ولوں پہلا لائیو ویپن فائرنگ دا شاندار مظاہرہ
آبدوز نے بحیرۂ عرب وچ لمی مار کرن والا اینٹی شپ کروز میزائل فائر کیتا، ہدف نوں درستگی نال نشانہ بنایا: آئی ایس پی آر
ساڈیاں جدید جنگی صلاحیتاں علاقائی امن دی ضامن نیں: نیول چیف ایڈمرل نوید اشرف، صدر تے وزیراعظم دا خراجِ تحسین
کراچی، اسلام آباد (دنیا نیوز، مانیٹرنگ ڈیسک، اے پی پی) پاک بحریہ نے اپنی دفاعی تے جنگی صلاحیتاں نوں ہور مضبوط کردیاں نویں شامل کیتی گئی آبدوز پی این ایس ایم ہنگور توں پہلی لائیو ویپن فائرنگ دا کامیاب مظاہرہ مکمل کر لیا اے۔ دوجے پاسے صدرِ مملکت آصف علی زرداری تے وزیراعظم شہباز شریف نے نئی آبدوز ہنگور دی پہلی کامیاب لائیو ویپن فائرنگ اُتے پاک بحریہ نوں خراجِ تحسین پیش کیتا اے۔
پاک فوج دے شعبہ تعلقاتِ عامہ (آئی ایس پی آر) دے مطابق پاک بحریہ دی نئی آبدوز ہنگور نے شمالی بحیرۂ عرب وچ پہلی لائیو ویپن فائرنگ کامیابی نال مکمل کیتی تے لمی فاصلے تک مار کرن والا اینٹی شپ کروز میزائل فائر کیتا۔ اینٹی شپ کروز میزائل نے مقررہ ہدف نوں انتہائی درستگی نال نشانہ بنایا۔
سربراہ پاک بحریہ ایڈمرل نوید اشرف نے پی این ایس ایم ہنگور دی پہلی لائیو ویپن فائرنگ دا مشاہدہ کیتا تے پی این ایس ایم ہنگور دی جنگی صلاحیت تے عملے دی پیشہ ورانہ مہارت نوں سراہندیاں آکھیا کہ پاک بحریہ قومی سمندری حدود دے تحفظ لئی اک جدید تے ہر ویلے تیار فورس اے۔ انہاں آکھیا کہ ساڈیاں ایہہ جدید جنگی صلاحیتاں علاقائی امن تے بحری سلامتی دی ضامن نیں۔
پاک بحریہ دے حکام دا کہنا اے کہ پی این ایس ہنگور توں کامیاب فائرنگ پاک بحریہ دے قومی بحری مفادات دے تحفظ دے پکے عزم دا اظہار اے۔ ایہہ مشقاں ایس گل دا ثبوت نیں کہ فورسز کسے وی قسم دے چیلنج نال نمٹن لئی مکمل طور اُتے تیار نیں تے سمندری سرحداں دی حفاظت یقینی بناؤن لئی اپنی آپریشنل تیاریاں اعلیٰ ترین سطح اُتے برقرار رکھن گیاں۔
دوجے پاسے صدرِ مملکت آصف علی زرداری تے وزیراعظم شہباز شریف نے وکھ وکھ بیان وچ چیف آف نیول سٹاف ایڈمرل نوید اشرف دی قیادت وچ پاک بحریہ دی آپریشنل تیاری تے بحری دفاعی صلاحیتاں وچ اضافے نوں سراہیا۔ انہاں آکھیا کہ جدید جنگی صلاحیتاں نال لیس پاک بحریہ قومی بحری حدود دے تحفظ تے خطے دے امن تے سلامتی وچ اہم کردار ادا کر رہی اے۔
پاکستان دیاں بحری دفاعی صلاحیتاں وچ اضافہ ملکی سمندری حدود دے مؤثر دفاع تے خطے وچ امن قائم کرن دے عزم دا عکاس اے۔
