پاکستان ملائیشیا نوں چاول برآمدات تے دوطرفہ تعاون ودھاؤن اُتے اتفاق
دونوں ملکاں دا ادارہ جاتی رابطے ودھاؤن اُتے اتفاق، نومبر وچ سانجھا ورچوئل اجلاس ہووے گا، وفاقی سیکرٹریز عامر علی احمد تے جواد پال دیاں کوالالمپور وچ ملائیشین حکام نال ملاقاتاں
اسلام آباد (آن لائن) پاکستان تے ملائیشیا نے چاول دی برآمدات ودھاؤن، حلال سرٹیفکیشن دے معیاراں وچ ہم آہنگی تے غذائی تحفظ دے شعبے وچ دوطرفہ تعاون نوں ہور مضبوط بناؤن اُتے اتفاق کیتا اے۔
کوالالمپور وچ اعلیٰ سطح دیاں ملاقاتاں دوران دونوں ملکاں نے زرعی تجارت، تکنیکی تعاون، حلال مصنوعات دی مارکیٹ تک رسائی تے معلومات تے تجربیاں دے تبادلے نوں فروغ دین اُتے زور دتا۔
وفاقی سیکرٹری قومی غذائی تحفظ تے تحقیق عامر علی احمد تے وفاقی سیکرٹری تجارت جواد پال نے پاکستان دے ملائیشیا وچ ہائی کمشنر سید احسن رضا شاہ دے نال برناس، جاکم تے ملائیشیا دی وزارتِ زراعت تے غذائی تحفظ دے حکام نال ملاقاتاں کیتیاں۔
برناس حکام نال ملاقات وچ پاکستانی چاول دی برآمدات ودھاؤن تے معیار تے تقاضیاں اُتے سختی نال عملدرآمد یقینی بناؤن اُتے گل بات کیتی گئی۔
ملاقات وچ چاول، گوشت، پولٹری، ماہی گیری تے آبی زراعت، حیوانی ویکسینز، حیاتیاتی تحفظ تے حلال جیلاٹن دی فراہمی سمیت مختلف معاملے زیرِ بحث آئے۔
دونوں ملکاں نے ادارہ جاتی رابطیاں لئی باضابطہ طریقۂ کار قائم کرن اُتے اتفاق کیتا، جس دی شروعات نومبر وچ سانجھے ورچوئل اجلاس نال ہووے گی۔
