ایس سی او قومی کوارڈی نیٹرز دا 3 روزہ اجلاس اج شروع
رکن ملکاں دے کوارڈی نیٹرز، ایس سی او سیکرٹریٹ دے نمائندے شریک ہون گے، اجلاس وچ باہمی تعاون تے رابطہ کاری نال متعلق مختلف معاملے دا جائزہ لیا جاوے گا
اسلام آباد (نمائندہ دنیا) پاکستان دی زیرِ صدارت شنگھائی تعاون تنظیم دے قومی کوارڈی نیٹرز دا پہلا تین روزہ اجلاس اج اسلام آباد وچ شروع ہووے گا، جس وچ تنظیم دے رکن ملکاں دے قومی کوارڈی نیٹرز تے ایس سی او سیکرٹریٹ دے نمائندے شرکت کرن گے۔
ایس سی او دی کونسل آف ہیڈز آف سٹیٹ دی 2026-27 دی سربراہی ایس ویلے پاکستان کول اے۔ اجلاس 28 توں 30 ستمبر تک ہووے گا۔ دفترِ خارجہ دے مطابق اجلاس دی صدارت پاکستان دے ایس سی او نیشنل کوارڈی نیٹر ڈاکٹر فیصل کرن گے تے ایس سی او دے رکن ملکاں دے نیشنل کوارڈی نیٹرز تے ایس سی او سیکرٹریٹ دے نمائندے اجلاس وچ شرکت کرن گے۔
اجلاس وچ تعاون تے رابطہ کاری نال متعلق مختلف معاملے اُتے تبادلۂ خیال کیتا جاوے گا۔ پاکستان دی سربراہی دوران مختلف سرگرمیاں تے پروگراماں اُتے وی گل بات ہووے گی۔
دفترِ خارجہ دے مطابق پاکستان دی سربراہی دوران رابطہ کاری نوں فروغ دین، جدت دی حوصلہ افزائی، اقتصادی تعاون وچ اضافے تے عوامی سطح اُتے رابطیاں نوں مضبوط بناؤن اُتے توجہ مرکوز کیتی جاوے گی، تاں جو رکن ملکاں دے سانجھے وژن نوں عملی تے باہمی مفاد اُتے مبنی اقدامات وچ تبدیل کیتا جا سکے۔
پاکستان انہاں ترجیحاں نوں اگے ودھاؤن تے ایس سی او وچ تعاون نوں ہور مضبوط بناؤن لئی سارے رکن ملکاں تے ایس سی او سیکرٹریٹ نال قریبی تعاون کرے گا۔
اگست 2027 وچ پاکستان ایس سی او کونسل آف ہیڈز آف سٹیٹ دے اجلاس دی میزبانی کرے گا۔
