محسن نقوی دا سائبر جرماں خلاف کارروائیاں ہور تیز کرن دا حکم
وفاقی وزیر داخلہ دا لاہور وچ این سی سی آئی اے سنٹرل زون ہیڈکوارٹرز دا دورہ، مالیاتی فراڈ دی شکایت اُتے وی فوری رسپانس دا نظام مؤثر بناؤن لئی حکام نوں ہدایات
لاہور (دنیا نیوز) وفاقی وزیر داخلہ محسن نقوی نے سائبر جرماں خلاف کارروائیاں ہور تیز کرن دا حکم دے دتا اے۔
تفصیلات دے مطابق وفاقی وزیر داخلہ محسن نقوی نے گزشتہ روز لاہور وچ این سی سی آئی اے سنٹرل زون ہیڈکوارٹرز دا دورہ کیتا، جتھے انہاں دی زیرِ صدارت خصوصی اجلاس ہویا۔ اجلاس وچ سائبر کرائمز خلاف جاری آپریشنز تے تحقیقات دا تفصیلی جائزہ لیا گیا۔
ڈی جی این سی سی آئی اے نے وفاقی وزیر داخلہ نوں سنٹرل زون دی کارکردگی، زیرِ تفتیش مقدمیاں، سائبر فراڈ دے رجحانات تے جاری کارروائیاں بارے بریفنگ دتی۔ ڈی جی ایف آئی اے، آئی جی اسلام آباد پولیس، ڈائریکٹر ایف آئی اے لاہور زون تے متعلقہ حکام وی ایس موقعے اُتے موجود سن۔
اجلاس وچ آن لائن مالیاتی فراڈ، ہراسانی تے منظم سائبر کرائم نیٹ ورکس خلاف کریک ڈاؤن ہور تیز کرن دا فیصلہ کیتا گیا۔ وفاقی وزیر داخلہ نے شکایات سیل، فرانزک لیب تے انویسٹی گیشن ونگ دا معائنہ کیتا۔ شہریاں دیاں شکایتاں توں لے کے تفتیش تے ملزماں خلاف کارروائی تک پورے نظام دا جائزہ لیا گیا۔
محسن نقوی نے ایس موقعے اُتے آکھیا کہ سائبر کرائم کرن والا چاہے کتھے وی بیٹھا ہووے، اوہنوں قانون دی گرفت وچ لیانا اے۔ انہاں نے زیرِ التوا مقدمیاں تے شکایتاں دا کیس ٹو کیس جائزہ لین تے غیر ضروری تاخیر ختم کرن دا حکم دیندیاں آکھیا کہ ہر شکایت اُتے بروقت پیش رفت نظر آنی چاہیدی اے۔
وزیر داخلہ نے آن لائن مالیاتی فراڈ وچ ملوث منظم گروہاں، جعلی اکاؤنٹس، ڈیجیٹل بلیک میلنگ تے آن لائن ہراسانی وچ ملوث عناصر خلاف بلاامتیاز کارروائی کرن دی وی ہدایت کیتی۔
محسن نقوی نے آکھیا کہ مالیاتی فراڈ دی شکایت موصول ہوندیاں ہی فوری رسپانس دا نظام مؤثر بنایا جاوے۔ شہری نوں شکایت درج کراؤن توں بعد مہینیاں تک انتظار نہیں کرنا چاہیدا۔ ہر شکایت اُتے بروقت پیش رفت نظر آنی چاہیدی اے۔
انہاں آکھیا کہ این سی سی آئی اے نوں حقیقی معنیاں وچ پاکستان دی سائبر پولیس بنانا اے، جیڑی جدید ٹیکنالوجی دے ذریعے شہریاں نوں ڈیجیٹل دنیا وچ تحفظ فراہم کرے۔
وفاقی وزیر داخلہ نے خواتین تے بچیاں نوں آن لائن ہراسانی، بلیک میلنگ تے ڈیجیٹل استحصال نال متعلق شکایتاں نوں خصوصی ترجیح دین دی ہدایت وی کیتی۔
