منیشہ نے عالمی سطح اُتے پاکستان دا پرچم سربلند کر دتا، بلاول بھٹو

کراچی (این این آئی) چیئرمین پیپلز پارٹی بلاول بھٹو زرداری نے انگولا وچ منعقدہ IMMAF ورلڈ کپ وچ پاکستانی فائٹر منیشہ علی دی شاندار کامیابی اُتے اوہناں نوں مبارکباد دتی اے۔

بلاول بھٹو نے آکھیا کہ سرزمین گلگت بلتستان دی دھی منیشہ علی نے عالمی سطح اُتے پاکستان دا پرچم سربلند کر دتا اے، اوہناں دی کامیابی صرف اک گولڈ میڈل نہیں بلکہ پاکستان دیاں دھیاں دے عزم، حوصلے تے صلاحیت دی عالمی پذیرائی اے۔

انہاں آکھیا کہ نوجوان کھلاڑیاں، بالخصوص خواتین کھلاڑیاں نوں اپنی صلاحیتاں نکھارن لئی ہور مواقع تے عالمی معیار دیاں تربیتی سہولتاں فراہم کرنیاں پین گیاں۔

چیئرمین پیپلز پارٹی نے آکھیا کہ منیشہ علی دی کامیابی پاکستان دے کھیل میدان دے روشن مستقبل تے خواتین دے ودھدے کردار دا امید افزا پیغام اے۔ خواتین نوں بااختیار بنانا تے انہاں نوں ہر میدان وچ اگے ودھن دے مواقع فراہم کرنا شہید محترمہ بینظیر بھٹو دے خواب دا بنیادی حصہ سی۔

انہاں آکھیا کہ منیشہ علی دی عالمی کامیابی شہید محترمہ بینظیر بھٹو دے ایس خواب دی تکمیل ول اک خوبصورت قدم اے، جس وچ پاکستان دی ہر دھی نوں اپنی صلاحیتاں دے اظہار دے برابر مواقع حاصل ہون۔

بلاول بھٹو نے منیشہ علی، اوہناں دے والدین، کوچز تے پاکستان دی پوری MMA فیملی نوں ایس شاندار تے تاریخی کامیابی اُتے دل دیاں گہرائیاں توں مبارکباد وی دتی۔