پی آئی اے لئی جہاز خرید رہے آں، نہ قرض دا اعلان کیتا: مشیرِ خزانہ

اسلام آباد (مانیٹرنگ ڈیسک) مشیرِ وزیرِ خزانہ خرم شہزاد نے آکھیا اے کہ حکومت نہ تاں نجکاری توں بعد پی آئی اے لئی طیارے خرید رہی اے تے نہ ہی ایس مقصد لئی کسے حکومتی ضمانت یا ٹیکس دہندگان دے پیسیاں نال قرضے دا اعلان کیتا گیا اے۔

گردش کر رہیاں کجھ تبصریاں وچ نجکاری تے برآمدی قرضہ فراہم کرن والے ادارے دے کردار نوں درست طور اُتے نہیں سمجھیا گیا۔

اپنے بیان وچ خرم شہزاد نے مزید آکھیا اے کہ امریکی ایکسپورٹ امپورٹ بینک دے فریم ورک وچ اثاثیاں دی بنیاد اُتے طیاریاں دی فنانسنگ دی گنجائش موجود اے، طیارہ آپ فنانسنگ لئی سکیورٹی دے طور اُتے استعمال ہو سکدا اے تے حکومتی ضمانت لازمی شرط نہیں۔

خرم شہزاد نے آکھیا کہ حکومت دا کردار پاکستانی کاروباری اداریاں لئی بین الاقوامی فنانسنگ، ٹیکنالوجی، سپلائرز تے سرمایہ کاری دے دروازے کھولنا تے سہولت فراہم کرنا اے۔ وزیرِ خزانہ دی امریکی ایکسپورٹ امپورٹ بینک نال گل بات صرف پی آئی اے تک محدود نہیں سی۔ پی آئی اے لئی حکومتی قرض یا حکومتی ضمانت دا کوئی اعلان نہیں کیتا گیا۔