سعد رفیق دا حکومت تے احتجاج کرن والیاں نوں مذاکرات دا مشورہ
مسئلے حل کرن دی نیت ہووے تے راہ ضرور نکلدا اے، پہل ریاست کرے، مہنگائی تے ناانصافی وچ پسیا عام بندہ ہور مشکلات دا متحمل نہیں: سابق وزیر
لاہور (مانیٹرنگ ڈیسک) سابق وفاقی وزیر خواجہ سعد رفیق نے حکومت تے احتجاج کرن والیاں اُتے زور دتا اے کہ اوہ اک دوجے نال گل بات کرن تے گفت و شنید دا سلسلہ جاری رکھن۔ مسئلے حل کرن دی نیت ہووے تے راہ ضرور نکلدا اے۔
سوشل میڈیا اُتے اپنے بیان وچ خواجہ سعد رفیق نے آکھیا کہ حکومتاں تے احتجاج کرن والے انا، ضد تے دھڑے بندیاں توں بالاتر ہو کے سوچن۔ یاد رکھو، تہاڈے وچوں کوئی فاتح نہیں ہووے گا کیونکہ سارے ہار رہے نیں، پہل ہمیشہ ریاست کردی اے، ایس لئی پہل کیتی جاوے۔ جانی تے مالی نقصان توں بچیا جاوے۔ اک دوجے دی عزتِ نفس نوں تار تار کرنا کم ظرفی اے، کوئی قابلِ فخر کم نہیں۔
مہنگائی، بے روزگاری، ناانصافی تے دہشتگردی دی اگ وچ جھلسیا ہویا پاکستان کراہ رہیا تے پکار رہیا اے، اوہدی پکار سنی جاوے۔ عام بندہ پس چکیا اے، اوہنوں تہاڈے مباحثیاں، دھینگا مشتی تے اپنی خدمتاں دا ڈھنڈورا پیٹن نال کوئی دلچسپی نہیں۔ اوہدے لئی جینا تقریباً ناممکن ہو چکیا اے۔
بروقت علاج نہ کیتا جاوے تے رسدے زخم ناسور بن جاندے نیں تے فیر پوری قوم دہائیاں تک اوہدی قیمت ادا کردی رہندی اے۔ تاریخ لکھی جا رہی اے، اینوں قید نہیں کیتا جا سکدا تے نہ ہی روکیا جا سکدا اے۔ لاعلاج زخم چھڈ کے جان والے ہمیشہ تاریخ دے کٹہرے وچ کھڑے رہندے نیں۔
اوہناں نے سول سوسائٹی تے اہلِ درد نوں بیدار ہون دی اپیل کردیاں آکھیا کہ اذانِ حق دا تسلسل وقت دی لوڑ اے، جو جتھے وی اے اپنی آواز بلند کرے۔
