مریم نواز ناقص صفائی اُتے برہم، قصور، فیصل آباد تے اوکاڑہ دے ایم ڈی ستھرا پنجاب برطرف
ہٹائے جان والے افسراں نوں ہور پوسٹنگ نہ دین دا حکم، ستھرا پنجاب دے فیلڈ مانیٹرنگ آفیسر نوں باڈی کیم لاؤن دا فیصلہ، ویسٹ کولیکشن وچ بہتری لئی 15 دن دا ہدف دِتا گیا، صحت مند دل، صحت مند پنجاب ساڈا عزم اے: وزیراعلیٰ دا یومِ قلب اُتے پیغام
لاہور (سٹاف رپورٹر) وزیراعلیٰ پنجاب مریم نواز شریف دی زیرِ صدارت ستھرا پنجاب نال متعلق اجلاس منعقد ہویا۔ وزیراعلیٰ نے مختلف شہراں وچ صفائی دی ناقص صورتحال دیاں شکایتاں اُتے شدید برہمی دا اظہار کیتا تے قصور، فیصل آباد تے اوکاڑہ دے ستھرا پنجاب دے ایم ڈی برطرف کر دِتے۔
انہاں حکم دِتا کہ برطرف کیتے گئے افسراں نوں ہور پوسٹنگ نہ دِتی جاوے۔ وزیراعلیٰ نے صفائی دی ناقص صورتحال اُتے متعلقہ ایم ڈی نوں وارننگ جاری کرن دی ہدایت کیتی۔
اجلاس وچ ستھرا پنجاب دے فیلڈ مانیٹرنگ آفیسر دی ٹریکنگ لئی باڈی کیم لاؤن دا فیصلہ وی کیتا گیا۔ وزیراعلیٰ نے ڈپٹی کمشنراں نوں فیلڈ مانیٹرنگ آفیسر دی روزانہ مانیٹرنگ لئی اقدامات کرن دا حکم دِتا تے ایس حوالے نال باقاعدہ مانیٹرنگ سیکشن بناؤن دی ہدایت کیتی۔
تھاں تھاں کچرا سٹّن والے لوکاں خلاف اینٹی لٹرنگ کمپین دے تحت سیف سٹی کیمریاں نال ڈیجیٹل چالان شروع کر دِتے گئے نیں۔ وزیراعلیٰ نے ڈور ٹو ڈور ویسٹ کولیکشن مہم وچ بہتری لئی 15 دن دا ہدف دِتا تے ستھرا پنجاب بیٹ سسٹم نوں پوری طرح فعال کرن دی ہدایت کیتی۔
اجلاس وچ ستھرا پنجاب بارے وزیراعلیٰ نوں تفصیلی بریفنگ دِتی گئی، جس وچ دَسیا گیا کہ پنجاب دیاں بیشتر تحصیلاں وچ ستھرا پنجاب ورکرز نوں بروقت ادائیگی مکمل کر لئی گئی اے۔
سارے ڈویژناں وچ اینٹی لٹرنگ سکواڈ متحرک اے۔ 77,137 انسپیکشن کیتیاں گئیاں تے 9,353 وارننگاں جاری کیتیاں گئیاں، جدوں کہ اینٹی لٹرنگ سکواڈ نے گندگی دی وجہ نال 19 چالان جاری کیتے۔
لاہور وچ وی اینٹی لٹرنگ سکواڈ متحرک اے تے سیف سٹی کیمریاں دے ذریعے 2,156 ڈیجیٹل چالان جاری کیتے جا چکے نیں۔ پنجاب بھر وچ 37,852 مقامات اُتے کوڑا کرکٹ سٹن لئی بن (Bin) لا دِتے گئے نیں۔
دریں اثنا وزیراعلیٰ پنجاب نے عالمی یومِ قلب اُتے اپنے پیغام وچ آکھیا کہ صحت مند دل، صحت مند پنجاب ساڈا عزم اے۔ انہاں عالمی یومِ قلب اُتے ڈاکٹرز، نرسز تے پیرا میڈیکل سٹاف دیاں خدمات نوں خراجِ تحسین پیش کیتا۔
وزیراعلیٰ نے آکھیا کہ دل دے امراض توں بچاؤ لئی احتیاط علاج توں بہتر اے تے طرزِ زندگی وچ صحت مند تبدیلی ضروری اے۔ انہاں پنجاب دے سارے ضلعی ہسپتالاں وچ کیتھ لیب تے کارڈیالوجی سنٹرز قائم کرن دے عزم دا اعادہ کیتا تے دَسیا کہ پنجاب دے 6 اضلاع دیاں کیتھ لیباں وچ دل دے امراض وچ مبتلا 7,294 مریضاں دے کامیاب پروسیجر کیتے گئے نیں۔
جہلم، جھنگ، وہاڑی، قصور، میانوالی تے بہاولنگر دیاں کیتھ لیباں وچ 4,448 مریضاں دی انجیوگرافی تے 2,763 افراد دی انجیوپلاسٹی کیتی گئی، جدوں کہ ڈسٹرکٹ ہیڈ کوارٹر ہسپتال قصور دی کیتھ لیب وچ دو مریضاں نوں کامیابی نال عارضی پیس میکر لائے گئے۔
8 اضلاع وچ نومبر تے 7 اضلاع وچ فروری تک کیتھ لیباں قائم ہو جان گیاں۔ وزیراعلیٰ نے پنجاب انسٹی ٹیوٹ آف کارڈیالوجی سمیت سارے دل دے ہسپتالاں وچ مفت ادویات دی فراہمی یقینی بناؤن دی ہدایت کیتی۔
