افغان حکومت عسکریت پسندانہ سوچ توں باہر نکلے: عطا تارڑ
افغانستان دے مسئلے عسکریت پسندانہ ذہنیت دا نتیجہ، ذمہ دار ریاست والی سوچ اپناؤ، امن دی خواہش نوں کمزوری نہ سمجھیا جاوے، دہشتگرداں دیاں پناہ گاہاں اُتے تشویش: خطاب
اسلام آباد وفاقی وزیرِ اطلاعات و نشریات عطا اللہ تارڑ نے آکھیا اے کہ افغانستان وچ امن نال خطے وچ استحکام تے ترقی دے امکانات ودھ سکدے نیں، پاکستان نوں غیر مستحکم کرن دی ہر کوشش دا جواب دِتا جاوے گا۔
اسلام آباد وچ افغانستان دی صورتحال تے امن ول پیش رفت دے موضوع اُتے تقریب نوں خطاب کردیاں اوہناں آکھیا کہ افغانستان دی صورتحال اک انتہائی پیچیدہ معاملہ اے، جِس لئی دیرپا تے پائیدار حل دی ضرورت اے۔ پاکستان نے افغانستان دے مسئلے دے حل لئی متعدد وفد افغانستان بھیجے نیں، جدویں کہ استنبول تے دوحہ وچ مذاکرات وی ہوئے نیں۔
اوہناں آکھیا کہ افغان عبوری حکومت نوں عسکریت پسندانہ سوچ توں نکل کے ذمہ دار ریاست والی سوچ اپنانی ہووے گی۔ اوہناں آکھیا کہ افغانستان نوں درپیش زیادہ تر مسئلے عسکریت پسندانہ ذہنیت دا نتیجہ نیں۔
افغانستان وچ تجارت تے علاقائی رابطیاں دے فروغ دی بے پناہ صلاحیت موجود اے۔ افغانستان وچ امن نال وسطی ایشیا توں پاکستان تک تجارتی راستے کھولن وچ مدد مل سکدی اے۔
اوہناں مزید آکھیا کہ افغانستان وچ دہشتگرداں تے کالعدم تنظیمیں دیاں محفوظ پناہ گاہاں تشویش دا باعث نیں۔ اوہناں آکھیا کہ افغان آبادی وچ وڈی تعداد نوجواناں دی اے، افغان خواتین دی وڈی تعداد افرادی قوت دا حصہ نہیں اے تے افغان عوام دے بعض طبقیاں نوں بنیادی حقوق توں محروم کیتا جا رہیا اے۔
پُرامن بقائے باہمی لئی ”آپ وی جیو تے دوجیاں نوں وی جین دیو” دے اصول نوں اپنانا ہووے گا، صرف امن ہی خوشحالی دی بنیاد بن سکدا اے۔
اوہناں آکھیا کہ پاکستان دی امن دی خواہش نوں کمزوری نہ سمجھیا جاوے۔ امن نوں سبوتاژ کرن دی کسے وی کوشش دا جواب دِتا گیا اے تے دِتا جاوے گا۔
