جمہوری عمل وچ ای راہ نجات !

تحریر:شاہد ندیم احمد

ہمیشہ اقتدار وچ رہن دی خواہش انسان نوں کدھرے دا نہیں چھڈدی، ایس دے باوجود اقتدار دے حصول وچ کوشاں رہندا اے، ایہہ اقتدار بوہت بے رحم شے تے اقتدار دی ہوش ایس توں وی تباہ کن اے۔ ایوانِ اقتدار وچ رہندے ہوئے اُتے تیکر جان لئی انسان کس حد تیکر ڈگ سکدا اے، ایس دا اندازہ ایہناں دناں ایوان اقتدار وچ ہون والی سازشی سیاست نوں ویکھ کے آسانی نال لایا جا سکدا اے۔ اگرچے ایس طرح دی گندی سیاست تے سازشاں نال ساڈی تریخ بھری پئی اے پر اسیں اپنی سیاسی تریخ توں اج تیکر نہ کوئی سبق حاصل کیتا تے نہ ای اپنے آپنوں بدلن دے روادار آں۔ ایوان اقتدار کل وی سازشاں دے گڑھ سی تے اج وی اوتھے سازشاں دے جال بُنے جا رہے نیں۔ ایوان اقتدار دی راہ داریاں وچ سیاست دان سازشاں دے تانے بانے بنن وچ مصروف، جد کہ عوام نوں پچھن والا کوئی نہیں۔عوام ودھدے مسئلیاں دا شکار میوس زدہ خودکشیاں کرن اُتے مجبور نیں، ملک دے معاشی حالات جس تیزی نال خراب ہو رہے نیں، ایس توں بعد انج لگدا اے کہ اک دو قربانیاں نال گزارہ نہیں ہوئے گا، کوئی بوہت وڈی قربانی ای دینی پئے گی۔
ایہہ امر واضح اے کہ جدوں وی سیاسی قیادت نے جمہوری روایات دی پاسداری چھڈی جمہوریت نوں نقصان ہویا اے تاں سیاسی قائدین اقتدار دی ہوس تے اپنے آپ نوں بچان لئی سب کجھ کھون لئی تیار نظر آندے نیں۔ ایس ویلے بالکل 1977 والا منظر نامہ پیش کیتا جا رہیا اے، اک وار فیر ساری سیاسی جماعتاں حکومت مخالفت وچ کھڑی اے۔ ایس نال قطع نظر کہ جمہوریت دی بساط لپیٹی جا سکدی اے تے کسے دے ہتھ کجھ نہیں آئے گا، ایس دے باوجود حکومت ڈیگن اُتے تلے ہوئے نیں۔ ایس کار خیر وچ صرف مخالف سیاسی جماعتاں ای نہیں، بلکے حکومت دے اتحادیاں دا شمار وی مخالفین وچ ہوندا اے، کوئی اک شعبہ یا دھڑا انج دا نہیں جیہڑا حکومت توں خوش یا ایس دی کارکردگی توں مطمئن ہوئے، ماسوائے ایہناں کجھ کنٹینر مزاج سیاست داناں دے جیہڑیے ہر ویلے قوم نوں گمراہ کرن لئی غلط بیانی توں کم لیندے رہندے نیں۔ ایہہ ایہناں ای کجھ بندیاں دی مہربانی اے کہ عمران خان وزیراعظم دی بجائے تحریک انصاف دے سربراہ زیادہ نظر آندے نیں۔
ملک دے سیاسی حالات دن بدن خراب ہو رہے نیں جد کہ حکومتی وزیر کدی مائنس ون تے کدی مائنس تھری دی بحث وچ الجھے وکھائی دیندے نیں، تحریک انصاف حکومت نوں تبدیلی دے خاب تے روشن امید دے نال اقتدار وچ لیایا گیا سی، پر اوہناں نے اپنی ناقص کارکردگی توں سب نوں مایوس کیتا تے عوام دے خاب چکنا چور ہوئے نیں۔ ملک پہلے ای قرضیاں دے بوجھ تھلے دبیا ہویا سی، ہن مزید بدحالی دی دلدل وچ دھنس چکیا اے، انج دے حالات وچ کوئی سمجھدا اے کہ مائنس اک دو تن نال کم چل جائے گا تے ایہہ بوہت وڈی بھُل اے۔ ایس ویلے بکرے دی قربانی نال کم نہیں چلے گا، بلکے اونٹ ذبح کرنا پئے گا۔ جے ایس نظام نوں بچان لئی ملک دی سیاسی قیادت سنجیدہ تے متحد نہ ہوئی تے کوئی باہر توں جمہوریت بچان لئی نہیں آئے گا۔ ایس توں پہلاں وی سیاسی قیادتاں ای غیر سیاسی قوتاں نوں دعوت اقتدار دیندیاں رہیاں نیں، اک وار فیر اندرون خانہ اک دوجے توں ودھ کے وفاداریاں دا یقین دلوایا جا رہیا اے جے انج ای سب کجھ چلدا رہیا تے پاکستان پیپلز پارٹی، مسلم لیگ ن دے بڑھکاں لان والیاں دے نال مولانا فضل الرحمن تے ایہناں دے ہم خیال وی یاد رکھن کہ صرف تحریک انصاف حکومت مائنس نہیں ہوئے گی، بلکے ایس دے نال سب ای اپنے اپنے گھراں نوں جان گے۔
ایہہ امر شرم دا کارن اے کہ اسیں بار بار آزمائے ہوئے نوں فیر آزمانا چاہنے آں، کجھ حلقیاں دا خیال اے کہ پی ٹی آئی توں پہلے دو وڈی سیاسی جماعتاں نے بوہت چنگی کارکردگی وکھائی اے جد کہ انج کجھ وی نہیں، ایہہ ایہناں ای دا کیا دھریا اے کہ اسیں دن بدن بدحالی دی دلدل وچ پھسدے چلے جا رہے آں۔ جے داہ ورھے دی تباہ کن جمہوریت وچ دو ورہے موجودہ حکومت دے وی شامل کر لئے جان تے ایہہ بارہ ورھے پاکستان دی تریخ اُتے بوہت بھاری نیں۔ داغدار، کرپشن، میرٹ دے قتل تے قرضیاں نال بھرے ماضی دے نال اک روشن مستقبل کنج ہو سکدا اے۔ ایس ناقص کارکردگی دے حمام وچ سب ننگے نیں تے سب نوں اپنی اپنی کارکردگی دا بوہت چنگی طرح علم اے، ایس دے باوجود عوام نوں اک وار فیر دھوکہ دین توں باز نہیں آ رہے۔
پاکستان تحریک انصاف حکومت دے کول ہجے کج ویلا بچیا اے کہ سنجیدگی اختیار کردے ہوئے اپنی بہتر کارکردگی نال کھویا مقام دوبارہ حاصل کر سکے۔ ایس لئی عمران خان نوں نویں باصلاحیت ٹیم تشکیل دینی ہوئے گی جس وچ سلجھے ہوئے سمجھدار تے باصلاحیت قابل بندیاں نوں شامل کیتا جائے، انج دے بندے جنہاں دی زبان گھٹ تے دماغ چوکھا چلے جیہڑے عوامی مسئلے حل کرن دی اہلیت تے شعور رکھدے ہون تے کارکردگی وچ یقینا بہتری آئے گی، عوام دے مسئلے وی حل ہون گے تے مائنس ون سوچ دے راہ وچ خودبخود سپیڈ بریکر آ جائے گا۔جے انج نہیں ہوندا تے فیر اک نہیں سب مائنس ہون لئی تیار ہو جائو، جس دے امکانات چوکھے نظر آ رہے نیں کیوں جے اپوزیشن تے حکومت دے یکساں غیر سنجیدہ رویئے نال بہتری دی توقع نہیں کیتی جا سکدی۔ سیاسی جماعتاں تے سیاسی قائدین آپ اپنی غلطیاں تے اقدامات توں ختم تے رسوا ہوندے نیں، الزام تے انتقام نال کدی ختم نہیں ہوندے، نہ ای کسے نوں ملک بدر کرن یا پھانسی لان نال کسے دی حیثیت تے شہرت گھٹ ہوندی اے ایس لئی جمہوریت وچ ای سب دی بقاء اے، جے جمہوریت اے تے جمہوری عمل وی ہونا چاہیدا اے، ایہو راہ نجات اے۔