موبائل پولیس سٹیشن دا افتتاح، پولیسنگ سروسز شہریاں دی دہلیز اُتے پہنچائیاں جان گیاں: مریم نواز
33 موبائل پولیس سٹیشن فعال، ہر وین وچ انچارج سب انسپکٹر، فیلڈ سپروائزر، سینئر سٹیشن اسسٹنٹ، میل تے فی میل کانسٹیبل، 5 فروری نوں کشمیر ڈے اُتے بسنت وچ وقفہ، امید اے انسانی جان دی حفاظت لئی شہری ذمہ داری دی مثال قائم کرن گے: وزیراعلیٰ، لاہور وچ 29 جنوری توں 7 فروری تک 10 روزہ بسنت دی منظوری، پہلاں توں بہتر انتظامات دی ہدایت
لاہور (سٹاف رپورٹر) وزیراعلیٰ پنجاب مریم نواز شریف نے جدید ترین سہولتاں تے ٹیکنالوجی نال مزین موبائل پولیس سٹیشن وین دا باقاعدہ آغاز کر دِتا۔ 33 موبائل پولیس سٹیشن وین مختلف اضلاع وچ فنکشنل ہون گیاں۔
وزیراعلیٰ مریم نواز نے موبائل پولیس سٹیشن وین دا معائنہ کیتا تے انہاں دی ورکنگ دا مشاہدہ کیتا۔ انہاں نے پولیس وین وچ موجود سٹاف نال گل بات کیتی تے طریقہ کار بارے پچھیا۔ وزیراعلیٰ نوں ہوم سیکرٹری احمد جاوید قاضی نے بریفنگ دِتی تے دَسیا کہ پنجاب وچ 33 موبائل پولیس سٹیشن فنکشنل کر دِتے گئے نیں تے 6 موبائل پولیس سٹیشن خواتین نال متعلق امور لئی مخصوص نیں۔
ہر موبائل پولیس سٹیشن وین وچ انچارج سب انسپکٹر، فیلڈ سپروائزر، سینئر سٹیشن اسسٹنٹ، میل تے فی میل کانسٹیبل دا سٹاف موجود ہووے گا۔
بریفنگ وچ مزید دَسیا گیا کہ موبائل پولیس سٹیشن وین یونیورسٹیاں تے گرلز کالجاں وچ شیڈول دے مطابق جاوے گی۔ 15 اُتے کال دے ڈیٹا دے مطابق موبائل پولیس سٹیشن وین نوں مختلف علاقے وچ بھیجیا جاوے گا۔
ہر موبائل پولیس سٹیشن وین اُتے پولیس نال متعلق 14 مختلف قسماں دیاں سروسز میسر ہون گیاں۔ ایف آئی آر، آن لائن ای ٹیگنگ، گمشدگی رپورٹ، کریمنل ریکارڈ چیکنگ تے کرایہ دار دا اندراج کرایا جا سکے گا۔
گھریلو تے دکاناں دے ملازماں دا اندراج تے کریکٹر سرٹیفکیٹ ویریفکیشن دی سہولت وی میسر ہووے گی۔ لرنر لائسنس، ڈرائیونگ لائسنس، تجدید، ڈپلیکیٹ لائسنس تے انٹرنیشنل لائسنس وی بنائے جا سکّن گے۔
وین دی آمد دا شیڈول سوشل میڈیا تے ہور چینلاں اُتے نشر کیتا جاوے گا، جدوں کہ متعلقہ علاقے دیاں مسجداں وچ اعلانات وی کیتے جان گے۔
وزیراعلیٰ مریم نواز نے ایس موقع اُتے آکھیا کہ موبائل پولیس سٹیشن وین دا مقصد عزت تے وقار دے نال پولیسنگ سروسز براہِ راست شہریاں دی دہلیز اُتے پہنچانا اے۔ موبائل پولیس سٹیشن وین عوام تے پولیس وچکار فاصلہ گھٹ کرے گی۔ موبائل پولیس سٹیشن دور دراز علاقے وچ پہنچن نال شہریاں دے وقت تے سفری اخراجات دی بچت ہووے گی۔
وزیراعلیٰ مریم نواز شریف نے مزید آکھیا کہ پنک موبائل پولیس سٹیشن وچ خواتین لئی مخصوص عملہ تعینات اے۔
دریں اثنا وزیراعلیٰ پنجاب نے زندہ دلاں لاہور لئی 10 روزہ بسنت مناؤن دی وڈی خوشخبری دا اعلان کر دِتا تے اس دی منظوری وی دے دِتی اے۔
25 سال دے تعطل توں بعد رواں سال فروری وچ 6 توں 8 فروری تک لاہور وچ بسنت منائی گئی سی۔ وزیراعلیٰ نے نویں سال 2027 دی آمد اُتے لاہوریوں نوں 10 روزہ بسنت دا تحفہ دین دی ہدایت کیتی۔
29 جنوری توں 7 فروری تک بسنت منائی جاوے گی، جدوں کہ 5 فروری نوں کشمیر ڈے مناؤن لئی اک دن دا وقفہ ہووے گا۔
وزیراعلیٰ نے ہدایت کیتی کہ پچھلی بسنت توں وی ودھ کے شہریاں دی حفاظت تے سہولت لئی بہتر انتظامات کیتے جان۔ انہاں لاہور دے عوام نوں اپیل کردیاں امید ظاہر کیتی کہ انسانی جان دی حفاظت یقینی بناؤن لئی فرض شناسی، ذمہ داری تے احساس دے نال پچھلی بسنت وانگ اک نویں مثال وی قائم کرن گے۔
